¹ Noka ri'ik ni pursinaaza Dangwanzəzak, n oorən gamn gapta iit na yii derkaa Bil dennənnak. ² N oorən po'kənkən naa kamska zur naa ɓəska baar, sə i kweekən ində te' naa iika. ³ yaan sə i kam dakska zura Rumsəl naa gapta oomit. ⁴ Zok pii mukə, Rums pi musə, ni i dennaak zo'ka mu'kakrək. ⁵ Daa pu muzo, eska timr mulo, batisma muzo. ⁶ Bil mulo Daa koo anyarəz yas, ura pu paarizzə yas, ullə yas nettə yas. ⁷ Aarə te' yas i esaapu koo neeya esəka go'numrə ni Kweebaaz riinak. ⁸ Ni naasi dook: ''Na deg paari, sə geesək bansa senirəz ar senurə, sə esə esək marirə.'' ⁹ ''Anni i doo bonge, ''Dəg paa ya,'' tii haa buttə dii ninka paya? ¹⁰ Ura tiitəz gə gwanzi dəg paari haa assə paari, səna yi'is koo anya yas. ¹¹ Kweebaaz esə esək uri gakkpa manzaani, uri boo Anabaawai, uri iya i borə wa'azii, uri boo pastoi naa lami. ¹² Nok sə ina go'rəz iya ipu ookapai nok tomsa ulləssə, nok woomkpa zoka Kweebaazzək. ¹³ Rek mu'ka naa momkpa zoka ullək sei an yas ana reksapu dakska zura eska timləllə, nok me̱e̱kaa Waza Billəzzək, naa gə iya daksapu me̱e̱kaa Kweebaazzək. ¹⁴ Nok sə ka'ana goo ni yangik gəbən pa, kaina yedaa ni yangək pa, iya koo bənaya i zaa kubruskənarəi, i pe'es timra iil ɓe'kuwa marirəurə naa dankaama iim naa umkeerei. ¹⁵ Gobtəra ri'il, sei a doo ina zəma zə'ən gbaakənkarə, sə a dag te'ka koo andeya nok uzi zur, uzi Kweebaaz. ¹⁶ Kweebaaz dags zogrəm rə iya i esə timrai yas, zok sə da'kən naa po'ka dalləta zokrət yas naa tomsa dalləttirəs, a bo'rə sə zok dag no̱k womkpa zura gwandəl gbaakənkarə te'. ¹⁷ Noka ri'ik, npu dooskəndə' kai gəə sə i ri'gə ni menkiyak pa nok timra iil puna təgrarə. ¹⁸ Sundumiya ii pun təgra rək, ginii zəngsa Bil esəssə nok mə'əma pu iirəm, wenka zura iirə timterəm. ¹⁹ I gee deksa zurpa i yii zu'teya gwanirət neta səəttə, nok səbo tommə neta səəru rət naa ningsa. ²⁰ Ri'zi sə i kubrutə Kweebaazə pa. ²¹ N mee minge i geepu paka ullək ni i kubrusə ullə paak, ni zəmaa Yesso rəl pinnak. ²² I kubrusən ina daa goosa iirə do̱o̱s, ina tus maza do̱o̱zaz. No̱k maza do̱oza̱ rooz pu oomi pa laapu nok sutum baaraz. ²³ Kosən zoka do̱o̱kak, sə i go'rəs goosa timteya iirəz. ²⁴ Go'rən ri' pe'en goosa pəssas a i go'tən roos goosa Billəssəs, naa go'numa zəmassəm naa riisəm. ²⁵ Noka ri'ik daan songb, pagən paka wessak naa maza moorə pourəz, nok aa zeeuwa muwowwi. ²⁶ Baar na sugən ama kai bo'rə hakkei pa. Ubla kana wiisən sugsa baalə pa. ²⁷ Kai essə Seetan bila pa. ²⁸ Ura ru̱u̱rəz kana gəə ruulə pa. Ama doolezi kamkp toms, a wessat nata ullət səna kinə baka ina pissundə nok sə ina mar naa iya una pisi pai. ²⁹ Noka ri'ik kai dàà səəra pak na keetə iirə su'rə pa. Sei paka wessak nok po'ka uri sə ina kinə gbam, ni i iinak, no̱k paka iik na gau ina po'karən iya i geendəi. ³⁰ Kai bə'əs Rumsa Billəz pa, nok ulləzi sə i bi'saa na' rekarə ublaa kweeska rəkrə. ³¹ Daan Suksa baar naa zeem naa wiik, bi'irkənka, naa də'əs, naa gə kala neta engkurət yas. ³² Gbaakənkən ində te'ka, naa yirku, naa yaafuka ində te'ka, ni Bil ra'səsən ii Kweebaazək.