¹ Nok ri'ik mii Bulus pursinazza Kweebaaz Yeeso rəzzi nok ii menki. ² Ina ka gee gen gekkpaa go'numa Billəm a i esənnak. ³ Npu biiskən ina rudum yiisə miin. paka zəma sə sums zokkakki n biisən topa diga ma'karə. ⁴ Ina zangəpu, i le'ek len meegəska paka zəma sə sums zok Kweebaazə paak. ⁵ Ru'a i do̱o̱ eyirə i po'gəsən mari pa. Ama ri'ak i po'gəsən pu naa Rumsa manzaani naa Anabaawairək iya i teegi no̱k tomsa ulləsai. ⁶ Paka sums zokkak uki menki bən pe'ba ɓinteiyi, sə gə apu yam zoka ulləkrə, sə a marək koo anya naa ii alkawalla Kweebaaz Yeeso rəz paka tingkakrə. ⁷ Nok n yerəpu senza paka tingkakrə no̱k essəka go'numa Bil esemrə naa gə gbama ullə to̱msəmrə. ⁸ Miizi i ese esəka ak, koo nok miizi wa topa mariya naa riisəm Billəi. Esəka eki mina doosə menki paka tingka ge'ka pipaa Kweebaazək. ⁹ Esəka Billək miirə uki mina po'gəsə koo neya ina Bil iin. Ina Roon pu sumskawi Billə wi'a i arairən, ura go'rə koo anyas tele. ¹⁰ Ina roon po'gəsapu zok ikiliisiyairə no̱k gwani naa iya naa gbi'kəmai billə paa i zaa me̱e̱k me̱e̱gəskəna Billək ɓesə ɓe'. ¹¹ Ina eni bo'rum zok no̱k yi'iska ina iin a ɓamna piipan Kweebaaz Yeesorə Dangwanza aaz. ¹² Kweebaazə apunaa wengska timr naa bila nok eska timra aal ullə. ¹³ Nok ri'ik kai taps zok no̱k npu ɓərk baalə nok ii pa, uki noosəka iik. ¹⁴ Nok neta etiti sə n gu' rukteya miirə Daa rə mu'ka, ¹⁵ ura go'rə zeeuwiya billə paai naa a dəllə rooi sə də'si riir. ¹⁶ N weerə minge eskən koo anya go'numa ulləmrə, sə wengrəsən naa gbam Rumsa ulləssə, ura pu iirə te'essə. ¹⁷ N weerə nok sə kweebaaz na gau iirə timlə nok eska timra iil, nok gbaaka na gau naa yiise iirə timlə. ¹⁸ Nok ri'ik i le'ek len meeka, ii naa iya naa riisəm Billəi yas, ani sə ye'enak naa gə ni dagən sə surənak, ¹⁹ nok sə ina me̱e̱ gɓi'kəma iikaa Kweebaazəmrək, nok sə ina yi'sən naa yi'səkaa Billək. ²⁰ Ri'ak ullə ura le'len bo'rəka koo anyaz, sə bo'rə ar koo anya ina a sunde koo a oorun yas, nok gɓi'kəma ullə kamə toms aarə te'em, ²¹ ulləzi nooska ikiliisiyairə naa Kweebaaz Yeesorə iya dənandəi naa a zakaz ɓamna pipa ting ting. Nagauri.