¹ Ama moo, a wərpu moorə hakkeirə. ² Hakkeiya airəyi sə ipu ri'gəttə naa goosa do̱o̱ dəlləs naa gwaniya naa gɓi'kəmma zakarəmai, rumsa assi kam to̱ms yangiya i le'su iirə te'ei. ³ An yas a gapsapu iya i esə timr pairə te'ka, sə a kam to̱ms naa gbama zokrəm naa ina timr iin, sə a sundə enku sə i goo yangiya i go'pai ni urik. ⁴ Ama Bil puna yirku gənɲa naa iikaa ullək wessawe' ni iinaak. ⁵ Dena a wər hakkeirəmrə, sə ruutaa zəngsə yam Kweebaazə nok go'nəm sə i kweeyaa. ⁶ Bil ruusa yam naa Kweebaaz, sə gə gapsa yam ar gapta billə paarittə Kweebaaz Yeeso rə. ⁷ Bo'rə ri'zi nok wi'a i zakkairə sə boo yiisaa gbi'kəma ullə kəspam naa yirkuwa yiisaa Kweebaaz Yeeso rə. ⁸ Nok go'numa ulləmmi sə i kweeya eska timlə. Keetə aarə zipa, ama esəka Billəkki. ⁹ Nok go'num keetə tomsə pa noka ri'ik uza təg zur pa. ¹⁰ Nok an to̱msa gwandə na'rəssi, go'raa Kweebaaz Yeesorə sə a kam tomsa wessas nok to̱mtiya aiyi sə Bil keetaa ana bo'rə diga wi'a do̱o̱irə sə ana kam toms. ¹¹ Noka ri'ik sundun do̱o̱ ii menkii tomtiya zokrəirə. I derən ''iya i nau pai'' ina i der ''gangsan'' zokro roo na'a marirəi go'ron, ¹² Nok zoora elirə i markənsapu naa Kweebaaz. Ii mara ginii mariya Israilairə te'ka. Ii giniyi do'kaa alkawalləz. Ipunaa zo'ka una mu'ka ang pa, ipunaa Bil pa dəllə. ¹³ Am ri'ak Kweebaaz Yeesorə ninka ipu ar ye'na naa Bil i səətənpu mis naa kwaala Kweebaaz Yeeso rəi. ¹⁴ Uzi kamtaa gabta wessat. Gwanzi gən ittənə muno. Gwandə zokrozi sə wa'as ko̱ngza maraaz aarə te'ez. ¹⁵ Ri'zi, ka'az dookaiya bissəi sə bo'rə maz muzo pəzzəz gwandə, sə kamtə gabta wessat. ¹⁶ Kweebaaz bo'rə ri'zi sə geekənsə mari sə gau zoka mukokrə Billə rekarə vagaraurə, sə ips be'səm iirə te'. ¹⁷ Yeeso zaa sə doo paka gabta wessattət iya ar ye'nairə naa gabta wessat iya derairə. ¹⁸ Nok Yeeso uzi essaa billa muko Ruumsə rekarə Daarə. ¹⁹ Nok ri'ik, ii menki i gakp ni genik pa. Gobtəra ri'il, an yas aa mariya riisəm Billəiyi naa mariya Billə gwa' aiyi. ²⁰ Ii iya i woomi - woomkpaa Manzaani naa Anabawaiyakki, Kweebaaz Yesso uzi billa gbi'la womratirəl. ²¹ Naa gbi'kəma ulləmmi sə i kur womr ulləzi womrti dakən sə noo sə gau ni gwaaga Billə kak. ²² Gwandəzi sə i womun yam ar gapta Billət rekarə Rumsə.