¹ A meemen goosa zongna a gamn dəlləm am a wo'os zok, apu naa zongna Bill woman saa paari. Gwaaga mazzi wom pak, gwaaga zengsa gbam pas paari. ² Nok Zongna andə anni apu peesarə, apu lo'ok rə. I eska ar gapta aat Billə paari nok sə ina teegaa naa zongna arrə paarin. ³ Nok ina tè'saapu a gakp kandiyi pa. ⁴ De' pu ri' a Ii in ina te'sa, ama noka i toskəna, nok ura punaa zengsaz naa gee ura weeraz. ⁵ Ura go'rusa yerka a ri'ik az Billi gwanzi esaa rums nok oruka ina bo'rungban naa borumgba mu'kan. ̃ ⁶ Noka ri'ik koo benya a gau na zoka, nok ana markən punaa zoka aak, markən puna Bill. ⁷ (Noka ri'ik rigətta ittə na gau a eska timlə, kana gau a mari i okənnak pa). ⁸ Nok ri'ik a punaa eska timr naa gbam, e iisa pu markənka naa zoka aak sə è gau naa dangwanz. ⁹ Ni a yer nuk ina a' iin, koo apu zokro te' koo ar ye'na sə a go'su. ¹⁰ Nok an pat i pi'ka , sə a dakən tengwansa Billəsə, zeesika bissək rə Kweebaazzə mu', nok sə koo neya na kweek faasəma ulləm neta bo'rotto, bo'rə zokrot, koo a go'ot koo a go'pat. ¹¹ Noka ri'ik, a meemen sera Billəl, a seerə sen mari. Bil oga on ni a pinnak, ni n ogak pu ri'zi sundimiya iirə. ¹² E yaaanin seerika ki, nok sə i bge'see ni ee mariya wessa we'ei pa. No̱k ri'ik epu eskin, ina i bo'kən segbime naa ee, noka sə i kin ina i iya naa dootai, naa gakpa iik, no̱k ri'ik. ¹³ Zengsa aas na kepu nok Billi, ama ena pu Omi endə zengsə nok ii, . ¹⁴ Nok werka kweebaazzək, sə yii si saa koo anya, noka eki sə maz muzo wer nok iya yasai. ¹⁵ Nok Kweebaaz wer nok mari yas, nok iya ipunaa zengsa, kai na gau gapta gwanirə, zullot pa, noka ri'ik inaa gau gapta ura wer, sə i ruusuz. ¹⁶ Diga ri'ak rekarə mu' è bisək maz bisa zokros pa, nok ri'ik è ri'gəskən kweebaaz bilaa ekirə. ¹⁷ Noka ri'ik ura pu kweebaazəz, maza pezzazi. Neta dootat asapu; gwenən getəpu pettit. ¹⁸ Neti eti yas keetə Billə. Gwan ura ge̱e̱kən saa naa Kweebaazaz sə asa gbi'kəma geekənka remmi; ¹⁹ Bill kweebazzi sə geekəns mari naa zura gwandəl, gəə aibəya zu'teya gwanirə pa, sə de'es sa'a paka geekən karə ak. ²⁰ Noka ri'ik aayi i kaa nok Kweebaaz, ni gwan Bill derin mari aarək. E pu oorəkəndə nok kweebaaz, "Gəəkənnin naa Bil" ²¹ Yer kweebaaz ma'ka net (Hadaya) ra'aska hakei rət nok aa ura bo̱'rə hakəi paz, nok Kweebaazzəzi a king gwanta Omi billət.