¹ Mii npu keesənzəz paya? Mii manzo paya? N og Yeeso Dangwanza az paya? Mooi ii n doosən paka Dangwanzək paya? ² Na mii manzozi urirə pa, zəmazi iirə gə mii manzozi. Nok mooi ii i me̱e̱men tomsa miis manzozi Dangwanzə. ³ Ina an uni keeska zura miil iya i gwegeirə: ⁴ Epuna gbi'kuma e kinkən rek naa ina bo'karənnak paya? ⁵ Epunaa gbikəma e ri'gəkən naa kiiza ez ura esə timraz, ni manzaniya i setəi ak, naa uriyangiya Dangwanzəi, naa Kefas paya? ⁶ Koo mii naa Barnabas zi kotto e bo'ok toms ya? ⁷ Ura pazzi kam tomsa soojairəs sə kamgbə gwan ya? Ura pazzi ruk nen tetta inabirət sə le' reka a reewət paya? Koo ura pazzi nee neu sə bo' bom paya? Pangna n doo an nok goosa mazzəz zi kotto ya? Rababaaz bən doo ri'zi paya? ⁹ Pu biisənən rababaaza Musarə bisəs zə, ''Kaa doksə negəza ba'rəz su' bəlla pu su'kun koourə allə pa.'' Bil gbaa negəzzi kotto ya? ¹⁰ Pag aarə paazi paya? I biisaa ayi, nok sə ura baa baakaz naa sundə ina kinkan naa ura su'us naa su' naa eska timr kinka una rəl. ¹¹ E ta'sunpu neta rumsət moo iirə timterə ak, e kink net moo iirə paya? ¹² Ii uri ina kin esəka akki iirə to̱o̱ e uri paya? Koo naa ri'ik kweek gbi'kəma aam pa. Gobtəra ri'il, apu ɓəsək baalə nok ni koo rigakya kaa le'en paka tingka Kweebaazək reka mu' pa. ¹³ Moo ii gə i meepa inge iya i kam toms gwaaga Billəkrəi i kink rek roo, iya i kam tomsa hadayarək erizi sə i kink faasəma hadayarəm paya? ¹⁴ Ri'erizi bən Daa Bil doo bonge to̱o̱ iya i wa'azi paka tingkakrə ai ina kamgbi nok paka tingkak. ¹⁵ Mii gə n kinə ko munə ina tooye min te'pa. Gə n bii ina an nok sə ina bo'rə ri'pa. Miirə gə wərk ase an naa ara uza doorəskəne net ɓe'se ɓe'ek. ¹⁶ Mina bo'rə wa'azi a paka tingkakrək, to̱o̱ ara n ka ɗunsun kur no̱ka ri'ik pa gapsepu ri' miirə. Ina go'panni miirə mina bo'ok wa'azi a paka tingkak pa! ¹⁷ Minaka bo'rə naa sundumeya miiyi, ika toge. Mina bo'rə naa sundumeya mindəi pa, i esepu zəma miirə. ¹⁸ Anni bən faasuma miim ya? Mina bo'rə wa'azi, n dook paka tingkak no̱k wees pa ri'zi bən zoora npu dookən paka tingkak rəllə, miirə iikarə gə naa faasum pa. ¹⁹ No̱ka mii sənza uza rəzzi pa, n yes zura miil ni senza koo neerəzyak nok sə n gobtə mari gənŋa. ²⁰ Yahudaawairə n yerə ni yahudawaazak, nok sə n gobtə yahudaawai, iya ipunaa gbi'kəma bissəmrəi, n yerə ni maza bissəzak noka npu bissək pa ama no̱k sə n keetətə iya ipu bissəi. ²¹ Iya ipu bissə pairə n gau ni maza pu bissə pak, na wei bissa Billəs punaa gbam miirə paa pa, ama bissa Kweebaazəz punaa gbi'kəm miirə, nok sə n gobtə iya ipunaa bis pai. ²² Iya naa yapruirə n gau naa yapru, nok sə n gobtə iya ipunaa yaprui. ²³ N bo'rə koo anya yas nok paka tingkak, nok sə n kinə sə'səm. ²⁴ A see i mee pa ara i nogən nomakrə iya nomrəi koo neeya ii aska doome am maz muzozi kotto kink faasuma i esək am paya? No̱ka ri'ik nogən sə i kin faasum. ²⁵ Iya i bo'rə beerətta gbə'səmrəttai i kubrə ɓəska baar naa zuteya gwanirət naa goosa paz səya yas. I gəə i bo'rə ri'eri nok sə boo kinə faasuma laakam, ee gə faasuma laakpam. ²⁶ Noka riik mii n nog nom kotto pa ko dəgkpaa miik n dəu zaka pa. ²⁷ Ama mii n ɓəs zoka miik baar sə n yerə senz nok sə kan gau n doosəsəpu uri pak, min naa tim zura mindəl i keese.