¹ Uriyangi n ii mingə ika mee, do̱'ga mariya ai, koli zi gbe'si gwani yas sə i ga' gbəna. ² Gwani yas i bo'si batisma Muusarə kolirə roo naa gəbən gbənarə. ³ Gwani yas i regə rekaa rumsək. ⁴ Gwani bo yas i bo' maama mumom rumsə. I bo̱' maama keetə ge'a rumsə dui sa'akrə, ge'a eki Kweebaazi. ⁵ Uri iirə te' genŋa Bil zok yagnui pa, nok wənna iin kodə zok do̱o̱lə roo. ⁶ Neta eti gapsapu riigəskəna aarə, nok sə kaina ɗəngs neta go'pat təpa nii ii i dəngsənak. ⁷ Kai gau ni mariya i duu langsiiyak pa, ni uri iirə te' i duunak. Ni pun biisənən bonge, "Mari i gau dii sə i reg i bo̱', sə i ruu sə i nau waag.'' ⁸ Kaa laa ki' ni uri iirə te', i bo'ok ak pa. No̱k a eni mari mu' zur naa taarəi i wər ublaa mukəkrə. ⁹ Kai gwegə Kweebaaz ni uri i bo'on ak pa, ha big i wo̱'si. ¹⁰ Kai gau naa gootəmə pa, ni uri i bo'on ak sə malaika wo'os ar az wo̱'si. ¹¹ Neta eti bo'rum riigəskənarə aarə paa. I bii neta eti no̱k kubruskənaa aak apu zoora dəl ɓamnarəllə. ¹² Uza kana doo bo de'sapu pa bo'ta ɓagəm. ¹³ Gwekaa askən gbamak pipa, a keesə gwegna mazak. Gobtəra ri'il, Bil punaa go'num. Daak sə i gwega naa neta arkəna gbamat pa. Ama naa gwekaa eki geeska bilaa a keekən ak, ni a le'kən ak. ¹⁴ Noka ri'ik, uriyagiya miirəi, kai səə langsirə pourə pa. ¹⁵ N pag naa ii ni mariya i me̱e̱gəsaiyak sə i duugus paka n dook. ¹⁶ To'naa sə'səma e sə'əs ak, a dakska zur naa kwaala Kweebaazəlli paya? Buroodiya e uwe'gusak a dakska zulli Kweebaazə zokrə paya? ¹⁷ De' buroodi muzozi, aa apu genŋai zoka mukokrə. An yas a rəgə buroodiya muzozzi; ¹⁸ Gwenən mariya Israilai: iya i regə hadadaya bagadirəiyi paya? ¹⁹ Anni npu dookrə ya? koo hadaya i esə langsi unani ya? ²⁰ N doo mingə, neta menkiya i mee Bil pai i esə hadayat, e esə maazi Billi pa. N ii ara i gakp naa mai ar mukək pa! ²¹ I bo'ok to'naa Dangwanzekrə sə gə i bo̱' naa a maazək pa. Ipunaa gamna go'numa i rekən rek ar gabtta Dangwanzəttək naa mairək pa. ²² A see haa apu laakaɓerə Dangwanzə səna bo'rə keerəs ya? A annu an gbam ya? ²³ "Net yas a mindətti," ama net yas uti a wessat pa. Net yas a mindətti," ama net yas uti təg maz pa. ²⁴ Maz kana go'sə zura gwandəl koto ina wessan pa. Gobtəra ri'il, na bo'sə kura gwaagəya ulləz ina wessan. ²⁵ Təmn galaa lumarək, kai des pa, nok zəngs. ²⁶ No̱k ''Dəl a Billətti naa neta pu root yas.'' ²⁷ Uza ura esə timr Billə paz na derən ina za bo regə rək ina iisi sə ina duu, kala ina i kamtən iirə mu'un regən ama kai des pa nok zəngs. ²⁸ Ama uza na doosən bonge, "Reka ak a ar langsəz zəkki," kai regə pa. Nok eska ura doosən gbi'kəm, naa gə nok zəngs. ²⁹ Zəngsa moosi n doo pa ama zəngsa ulləs. No̱k an sə zəngsa usa rəs pa'ak gbiskaa miik ya? ³⁰ Mina iisə Bil useeko nok rek nok an sə uza paksəke no̱k rekkiya? ³¹ Nok rek, kala ina a regən koo a bo̱', koo ina a bo'rən, bo'on yas nok noosəka Bil. ³² Kai gau ina dəgkpa də'rən Yahudaawairə koo menki, koo ikiliisiya Billəz. ³³ Ni n yaan bo'oskəna mari koo anyak yas, nok ina n kinkən mindən pa, ama nok mari yas. Bo'rə ri' nok sə ina kinə kweeka.