¹ Kubrun miirə, ni mii n kubrun Kweebaazək. ² N zanən ak nok i sundəsun naa mii. N zanən ak no̱k i duudun dookaiya mii n doosənən ak. ³ Ri'ak n ii minge ika mee Kweebaazi dangwanza marirəz yas, Yara maz uzi dangwanza kita kiizəz, Bil uzi dangwanza Kweebaazəz. ⁴ Yara maz tele ura weerə koo na doo ina bo'rumkpan sə na gbe'es zur saapu Dangwanza ulləz. ⁵ Ri'zi bo̱ kita kiiza weerə koo na doo ina bo'rumkpan sə naa zur kottəz saapu Dangwanza ulləz. Kwerkən kwen naa ni i kəsusu zurak. ⁶ Kita kiiz na doksək zura ulləl pa, na ɗe'rəs suka ullək. Na og ɗe'rəska suk ina dəgsa zullən ni ullə koo kəəsəka zur, na doks zura ulləl. ⁷ Yara maz kana gbə'əs zur pa, no̱k ur go̱o̱sa gbi'ma billəmmi. Ama kita kiiz gbi'kəma yara mazzəmmi. ⁸ Nok yara maza i go'tu kita kiizə zokrə pa. Gobtəra ri'il kita kiiz keetə yara mazzə zokrə. ⁹ No̱k yara maz i go'tu nok kita kiiz pa. Gobtəra ri'il, kita kiiz nok yara maz. ¹⁰ Noka ri'ikki bo'rə sə minge kita kiiz na doks zura ulləl no̱k səna yii gbi'kəma ya'za ulləzzəm gwandə zullə no̱k malaikui. ¹¹ Naa ri'ik tele, kita kiiz dogsapu zok yara mazzə, yara maz maa doksapu zok kita kiizə Billə mu'. ¹² Ni kita kiiz keetən yara mazzək, ri'zi bən yara maz keetə kita kiizə ama net yas keetə Billə. ¹³ In naa zuteya indəi gwenən i og: To̱o̱ ton ara kita kiiz ka weerən weerək Billə mu' zur kottok ya? ¹⁴ Asee koo goosa iis bən yiisən ge yara maz na daa suk sugutsu', ina dəgsa zullənni paya? ¹⁵ Ri gəbən kita kiiz na punaa suk ye'ənkək, ina yaksa zokrənni paya? nok i esu suka ye'enkak səna gbe'es zur. ¹⁶ Uza napunaa sinəm ina andə paa, e gə e mee langsa uka pa, sei ikiliisiya Billək. ¹⁷ Ina n doosən andə, n zanən pa. No̱k dakənkaa iik a oomikki pa. ¹⁸ Ama ma'karəgə i doose i dakən ikiliisiyarə markənka pii iirə te', sə n ma' kweeka pangni. ¹⁹ Zəmazi ika kin markənka iirə te', nok sə ina kin masək iya naa go'numai rə te'. ²⁰ Nok ina dakən ində ar muko, i regə buroodiya zoka Billəkrəzzi pa. ²¹ Ina pi rekrə koo neeya regə a ullə tengrək uza wodu pu gomgburo, uza bo wak kamsupu. ²² Ipunaa gwaama ika regən sə ika bo'on an paya? koo i saa iya i esə timr Billəi sə ipu sinkən iya una pisipai paya? N dooskən anya? Mina zanən ya? N zankən pa! ²³ N kweetə ina an Daa Billə sə n kamtən ii, gə Dangwanz Yesso toksa i yingunus sə pe' buroodi. ²⁴ Zoka iisən Bil iseeko, sə uwe'gusu sə doo bonge, ''Zoka miik aa ak, n esən mooi ii bo'rən riang noka i sundəkən naa miik." ²⁵ Ri'erizi bən pe' to'na sa'kaa roozo sə doo bonge, "To'naa ak a dokaa pəkkaki kwaala miilə. Bo'rən rieri zoka i bo'on ak no̱k sə i sundə naa mii." ²⁶ Koo bənaya ina regə buroodiya az sə ina bo̱' to̱'na akrə, ipu sundəkrə naa wərka Dangwanzək nagə gətə. ²⁷ Noka ri'ik, maza regə buroodiya az sə gə bo̱' to'naa Dangwanzəkrə naa sundəmeya go'pai, bo'rəpu ana go'pan laksəka zok naa kwaala Dangwanzəl. ²⁸ Sə koo neeya na rii zura gwandəl zanga, nagə regə buroodi sə na gəə bo̱' to̱'naa ekirə. ²⁹ Ura regə sə bo̱' na mas naa sundumeya zok rəi pa, regə sə bo̱' bisa gwandə zulləssi. ³⁰ Uki sə bo'rə uri genŋa iirə te' i weng pa uri bo ipu kunuyi, uri bo i wərpu. ³¹ Ama ana riigəs zu'teya ai, i biska pa. ³² Ama Dangwanzi na bisaapu dinska to' rozi, naa mariya delləi i wo'oska pa. ³³ Noka ri''ik uriyangi, ina dakən nok reka rək zo'on dommei. ³⁴ Uza wodu na gomu, naretə rek gwa, kana gau dakən kaa iik səna kamntən bis pa. Ama neta i biitət te' pa, mina zaa n geeskən bila.