¹ Ri'ak neta i des nok langsət a me̱e̱man "apunaa meegəskəna a yas.'' Meegəskəna tos ton maz sə təg zur, ama gbaakənk wom won maza. ² Uza na sundə bo meemen una, haa es maza ezi mee ina to̱o̱ ka meegəs an pa. ³ Uza naa gbaa gban Bil, maza ezi gwan Bil me'u men. ⁴ Ri'ak rekaa ina i de'es langsi rən a me̱e̱men ''langsi pu dəllə roo neta zuk atti'' naa gə ''Bil ula piipa sei Bil mulo.'' ⁵ Urirə dookarə bonge langsi i pii, koo billə paa koo dəllə roo, ''langsi'' i pii gənɲa naa ''dangwani''. ⁶ Ama aarə gə, ''Bil pii mulə Daa, ullə zi net yas, gə a gau ulləzi, naa Dangwanz muzo Yeeso Kweebaaz neta kink zokkat yas, ullozi bo koo anya pat kink zok." ⁷ me̱e̱gəskənaa ak tele pu koo neerəya pa. Gobtəra ri'il, nok ii uri do̱o̱ i duudun langsi, sə i regə reka langsirək ni i de'esən langsik. Noka ri'ik rumsa iirə timterəs esi mo'pa. ⁸ Rek uki kweeka Billə mu' pa. Ama an regə pa bakskaa unapa, ana regə bo koo una yarəm aarə pa. ⁹ Noka ri'ik geegen keeskaa iirək kana gau ina dəkɓa də'rən iya i esə timr pairə pa. ¹⁰ Uza punaa rumsa de'eska zokrəspa na oga mona pu rek neta langsirəttə rora langsirəllə. Mooa apunaa meegəskəna ri'isgə, rumsa ulləs tosku sə reg neta eti paya? ¹¹ Nok meegəskəna mook langsirə paa gbans gban iya ipunaa yaprui, ungwanza Kweebaaz wər nok uraz. ¹² Ri'erizi i bo'sə uriyangi ina go'pan sə i gbans rumsa iirə i le'en pas, sə i bo'rə hakkei Kweebaazə. ¹³ Na nok rekki sə ɓəsək doomeya miiz baar gə, n rek neta langsirət espa, nok sə mina bo'rə doomeiya miiz na kasə pa.