¹ Uriyangi mii, n le' paksəkən ni n paksən mariya naa rumsai ak pa, sei n doosun ni mariya naa go̱o̱sa zokrəi yak, ni yangiya Kweebaazəi. ² Waami n aaməsən, n esən koowa weng auwi pa, nok i reks dən rekarə pa, koo ri'ak bən i reks pa. ³ Haa es ipu go̱o̱sa zokrəssə. Nok keerəs naa sinəm napu iirə te', asee iyii naa go̱o̱sa zokrəz paya, sə i kam tomsa go̱o̱sa zokrəssi paya? ⁴ Nok uza na doo bonge, "Mii a Bulus səzzi," uza gəbən naa doo bonge, "Mii a Afolos səzzi,'' i gau naa go̱o̱ zokrəssi paya? ⁵ Neezi Afolos ya? Gə neezi Bulus ya? Se̱ni uri tan paya iya i esə timr iirəi, koo neeya ni Daa Bil esnuk. ⁶ Mii n ta' Afolos kuurə maam Bil noos. ⁷ Noka ri'ik ura ta'az naa ura kuuro maamaz ipu unarə te'pa. Sei gwan Bil kotto ura noos az. ⁸ Ura ta'az naa ura kuuro maamaz ii yas ipu muyo, koo neeya kink faasum ni ur bo'on tomsak. ⁹ Aa doowiya Billə tomsəiyi. Ii baaka Billəkki womra Billət. ¹⁰ Ni go'numa Bil esə mii wombaazam n kur uza woom. Koo neeya naa mee ni womnak. ¹¹ Nok ura le'ek kurka bes ni ura kur seenzaz ak piipa, waato Yesso Kweebaaz. ¹² Ri'ak uza na wom womr ara i kur ekirə naa kangeeri, koo we̱e̱sa suktunsas koo bileya i seekəmai ko de'si ko wo'os naa gbams, ¹³ tomsa ulləs gbərk kaaka allə, nok ublaki sə gbərk zok. Nok gbərk rarə. Ra'a eki gwek irəm tomsa koo neeya kammas. ¹⁴ Ura womra ullət de'et kink faasum; ¹⁵ ura tomsa ulləs doosas, ɓərk baar, ama gwan ɓiik, ni gbitə ra'rəkki. ¹⁶ I mee inge moo ii gwaaga Billəkki paya, Rumsa Billəs pu gamnarə iirə te' paya? ¹⁷ Uza na laks gwaaga Billək. Bil laksu. Nok gwaaga Billək pu ookapa, moo ii ma ri. ¹⁸ Uza kana seerə zura gwandəl pa. Uza a iirə te'es na sundə boo maza bo ɓe'eszi bəlla allə, na yer zura gwandəl "mə'səs" nok səna gau ɓe'enzəz. ¹⁹ Nok ɓe'kuwa dəlləu mə'əmi Billə mu. Nok pu biisənən, "Kam iya i ɓe'ei naa ɓe'kuwa iu.'' ²⁰ Gəbən Daa Bill meemen sundumeya ɓe'bairəu zukzi." ²¹ Noka ri'ik maz kaza noos zur nok mari, ko anya a indənni yas, ²² Koo Bulus, koo Afolos, koo Kefas, koo dəl, koo zəngs, koo werk, koo neta ri'akat, koo a zak mu'kat. Yas a indətti, ²³ iya Kweebaaz zəiyi, Kweebaaz bo a Billəz.