¹ Mina zaa iirə uriyangi, n zaa naa le'gəska pak koo naa me̱e̱gəskəna pa n doosun neta sumsumt Billət. ² N ii me̱e̱gəskəna una iirə te'pa sei Yesso Kweebaaz, ura i ɓaau az. ³ Npuna ii yaprurə te', naa sellə, naa zok ningsənk wessa we'. ⁴ Paka miik naa wa'aziya miik punaa paka paarəkarək koo ɓe'ku pa. Gobtəra ri'il, sei dei ri'gəskənaa gbama Rumsəm, ⁵ nok eska timra iil kana de' le'kaa marirəkrə pa, ama naa gbi'kəma Billəmrə. ⁶ Naa ri'ik pat e doo paka ləkarək iya ipu i doorəsapuirə, ama me̱e̱kaa dəlla allək pa koo gwaniya dənandəi pa, iya ipu ipu wo'okrəi. ⁷ Gobtəra ri'il, e doo paka zəma me̱e̱gəskəna Billə sumsumrə te'ek, me̱e̱gəskənaa pu sumsənkək do̱o̱i Bil sums bəlla ma'karəllə no̱k gbi'kəma aam. ⁸ Iya ipu gwanta bəllal ləi ko uza meepa bəlla elirə ina ka me̱e̱men ika ɓaa Daa Billa naa gbi'kəm rəl pa. ⁹ Ni pu biisənənak, ''Neta nor meɗə okpat, tok meɗə geepat, timr meɗə sunduka pa, neta Bill bo̱'rə nok iya i iiu ai." ¹⁰ Neta atti Bil yiisa Rumsə te'. Nok Rums wi'gəs net yas, naa neta sums zok surunta Billət. ¹¹ Neezi me̱e̱gəsən neta sundumerə mazzə timlət ya? sei rumsa pu gwandə timləz ri'erizi maza me̱e̱ neta pu sumsumrə Billət piipa sei gwan Rumsa Billəz. ¹² Ama a kwee rumsa dəlləz pa, ama Rumsa keetə Billəssi, nok ana me̱e̱gəsən esəka Bil esaak. ¹³ E pag neta at naa paka me̱e̱gəskaa mazzək le' gee pak, ama naa geeka Rumsək. Rums gən paka rumsək naa meegəskaa rumsək. ¹⁴ Maza puna rums paz kwee neta Rumsa Billəssət pa, nok mə'əmi ullə. Le' meegəskəna pa nok rumssə zi i meegəs netti. ¹⁵ Maza puna rumsaz masman koo anya, gwan naa zura gwandəl boo maza zeesukuz piipa. ¹⁶ "Neezi meɗə meeka sundumeya Daa Billəi ya, haa səka geesu ya?" Sundumiya ai a Kweebaazəiyi.