¹ Bulus ura Kweebaaz Yeeso deru na gau manzo naa iikaa Billək, naa ur waza ulləz Sostanisu. ² Rekarə ikiliisiya Billəz buta Korintus allə, naa iya Yesso Kweebaaz ra'si okapai, naa iya deri ina gau mariya wessai. Gə epu biisək iya i der riira Daa aaz Yesso Kweebaazzəl koo araya tele, Daa Billa iil naa aal. ³ Go'num naa gapta weesat na gau naa ii a Daa Billa aazət naa Dangwanz Yesso Kweebaaz. ⁴ Koo bənaya n iisə Billa miil useeko nok moo ii nok go'numa Billəm Kweebaaz Yeeso esənnallə. ⁵ Yerənpu mariya naa zaudii koo andəya, pagrəmrə naa gə meegəskənarə tele. ⁶ Ni do̱o̱ma Yeesorə paamak ri'zi rekarə iirə. ⁷ Nok ipunaa esəka Rumsək, noka ipu zo'kən gbətkaa Daa Yesso Kweebaaz zək. ⁸ Leerəskən rekarə ɓapsarə, nok kai gau ina də'ənan pa ublaa Daa Yeeso Kweebaaz zakənakrə. ⁹ Bil punaa doka, ulləzi sə de'rən ina to̱tə dakska zur Waza ulləzzə, Dangwanz Yeeso Kweebaazə. ¹⁰ Ri'ak n oorəkəndə uriyangi, riira Dangwanz Yeeso Kweebaaz zəllə, ii yas i iisapu, markənka kana totə iirə te'pa. Npu oorukəndə daksən zur ar muko naa timra iil naa sundumeya muyoi. ¹¹ Mariya kuluwii i dose bonge geekənka pii iirə te'pa. ¹² Ri'ak ina sundumərən uni: Iirə te' koo neeya doo bonge, "Mii a Bulus səzzi," koo "Miiya Afolos səzzi," koo "Miiya Kefas səzzi," koo "Miiya Kweebaaz zəzzi." ¹³ Kweebaaz massəpu zok ya? I ɓaa Bulus nok ii ya? Koo i bo'sən batisma riira Bulus səllə ya? ¹⁴ N iisə Bil useeko nok n bo'sə koo maz batisma iirə te'pa, sei Kirinus naa Gayus. ¹⁵ Nok uza kana doo bonge i bo'su bo batisma miirə riilə pa. ¹⁶ (Gə n bo̱'sə mariya Istifanussə gwa'ai batisma. N me̱e̱ pa gə mina bo'sə bon maz uza batisma gə.) ¹⁷ Kweebaaz tomtə nok bo̱'ka batisma pa, ama mina doosə mari paka tingkak. Naa le'kaa meegəskənaa mazzək pa, nok ɓaakaa Kweebaazzək kana gau kotto gbi'kuma ulləmrə pa. ¹⁸ Paka vaga raurək mə'əmi iya ipu wərkrəi. Ama iya Bil pu kweeki rəi gbi'kəma Billəmi. ¹⁹ Nok pu biisənən, "N laasə me̱e̱gəskənaa iya i meeirək. N gbagəska meekaa iya naa ɓe'kui.'' ²⁰ Ura naa ɓakuz aa paz ya? Biibaaz a paz ya? Ura wəgəsək a paz ya? Bil yerpu Me̱e̱gəskəna dəllət mə'əm paya? ²¹ De dəl naa me̱e̱gəskənaa ullək i me̱e̱ Bil pa, Bil zok yagu kweeka iya i esə timr naa kubruskəna paka tingkak mə'əmrək sə bo kwee iya isə timrai. ²² Yahudaawai gə i ii oka ina məsəmrən Helinaawai bo i laa me̱e̱gəskəna. ²³ Aa gə a bo'rə wa'aziya ɓaakaa Kweebaazək, ina dəkkpa də'rənni Yahudaawairə səgə mə'əmi Helinaawairə. ²⁴ Ama iya Bil derii rə, Yahudaawai naa Helinaawai yas, e doo gbi'kəma Kweebaazəm naa me̱e̱gəskənaa Billək. ²⁵ Mə'əma Billəm ar an me̱e̱gəskənaa marirək, yapruwa Billəu bo ar an wengkaa marirək. ²⁶ Gwenən derkaa Bil denənnak, uriyangi. I der iya naa me̱e̱gəskənaa neta dəllət pa. I der iya naa gbi'kəmaiyi genɲa iirə te' pa. Naa iya ipunaa asalii gənɲa pa. ²⁷ Bil teegə neta mə'ənta dəllət sə bo dəgs iya i me̱e̱gəsai zur.. Bil teegə ina naa gbampan dellə sə bo dəgs iya naa gbamai zur. ²⁸ Bil teegə ina waa fintinsə mu'us zok dəllə roon. Sə gə teegə neta zukkat, no̱k sə bo yes neta wessa we'et ina zukkan. ²⁹ Bo̱'rə ri'eri sə maz kana təg zur Billə mu'pa. ³⁰ Nok neta Bil bo̱'rə eti, sə ipu Kweebaaz Yessorə ri'ak, ura gau me̱e̱gəskəna aarə diga Billəz. Ura gapsapu go̱'numa aam, riisəm, naa kweekaa aak. ³¹ Noka ri'ikki ni rababaaz doog, "Ura təg zuraz, na təg Daa Billə."