¹ She zhipti shinngǝn Coki kǝ nanndames vuɗ mwaari wos. Mǝ yel caar ɗi gaami a ndaaɗ ɗi ɗǝgn. Tǝ vǝr caares piis kǝ tǝpm giir yo ɗaŋ nǝghǝ ɓanngǝni hŋǝi. ² A ɗǝrǝ tǝpm ngǝ giires ɗaŋ nǝghǝ ɓanngǝni hǝŋǝi, she yagn nyol ɗi ɗa ken ɓiiles ɗaŋkutu nǝ yaagn ngǝ dǝllǝ giir wuɗ. Dzaŋ tǝ yetar tǝ suui nǝ jii, nǝ durvhǝ yaakes ɗaŋ ca nyol ɗi ɗa ɓil giires. ³ Ɗa giɓ yaakes zai tǝ nywaal ɗi gha ɗǝgn, tǝ vǝr shi vartǝ ɗaŋ kǝ nannjaŋ a ɗǝgn. ⁴ Tǝ fuushi tǝ tu tǝ malar yaar a ɗǝgn hŋ, ko ɗeɓaɗ paatsǝ ko gwaas yo ɗaŋ ɗaghas nǝ kornoi hŋ, beɗ tǝ gii nǝ zarsǝ yo ɗaŋ tǝ yir rǝtsǝghǝn kǝ taas Coghn a gamken waasǝŋ ɗyaŋraŋ hŋ ⁵ Taa vǝrshi lǝɓ tǝ tlaa gyagii hŋ, beɗ tǝ gii tǝ firshi forǝm nǝghǝ lǝpm nanndam. Vaaghen waasǝŋ wo naa ɗaŋ kǝ mbwaaghǝn nannjaŋ ǝŋ yaa mbwaa zaar. ⁶ A mbuɗkǝni gyagi zaarsǝ ta ŋal mǝskǝni, beɗ tǝ gii ta tu tǝ hŋ. Taa suu mǝskǝni nǝ ŋaanyi hŋ, beɗ tǝ gii mǝskǝni wo kiri bashi. ⁷ Zhetes tǝ yaal ɗaŋkutu nǝ pǝrshi yo ɗaŋ taa mbǝrshi nǝ maanndǝ. A gaam waasǝŋ ngǝtn won ngai ɗaŋ kur gaam kǝ jinaari, yir waasǝŋ yi ɗaŋ kǝ yir zarsǝ. ⁸ Tǝ yir mbitlǝŋ gaam ɗaŋ mbitlǝŋ gaam guɗi. Shin waasǝŋ yi ɗaŋ shin daa namtsǝ. ⁹ Tǝ yir pipii gǝǝɓ ɗaŋ pipii gǝǝɓ kǝ dwaam. Yer ghǝ gyomtli waasǝŋ yini ɗaŋ wulghǝn yerghǝ keke mǝnndǝ monnda tǝ pǝrshi ɗaŋ caa kir nǝ durghǝ maanndǝ. ¹⁰ Tǝ yir kiir tǝ ngǝtn ngǝ mbwaaghǝn ɗaŋ nannjaŋ; a kiir waasǝŋ tǝ yir vartǝ tǝ kuus zarsǝ mǝn nǝghǝ lǝpm nanndam. ¹¹ Tǝ yir gon ɗaŋ guŋ a gamawaasǝŋ zhipti shinngǝn kǝ giir ghǝ shoŋni baa ngitaali. Sǝm wos tǝ vii Yehudawa tu Abadon, tǝ vii Helenawa tu Afoliyon. ¹² Girghǝni kǝ keni a laatsǝi. Yeli! A kaar gin, vuughǝni gyagon mbǝtlǝm a manngǝnɗi saɗɗa. ¹³ Zhipti shinngǝn Cogn kǝ limi vuɗ mwaari wos, mǝ wum yer ɗaŋ ca wul ɗi a nyeri kǝ lǝɓ dlǝǝrghǝni dǝn Cogn kǝ jinari ɗaŋ yigha ken Cogn. ¹⁴ Yeres wul zhipti shinngǝn Cogn kǝ limi ɗaŋ yir mwaares tu, "Gǝm zhipti shinngǝn Cogn wuɓsǝi ɗaŋ cinǝ naaɗkǝni a dǝllǝ ghǝ rupm Yufiretishi." ¹⁵ Zhipti shinngǝn Cogn wuɓsǝi ɗaŋ tǝ ɓumtsǝshi nǝ dǝlli gii, tǝ dzanyi gii, tǝ lǝɓi gii, tǝ voni gii tǝ ta gǝm shi tǝ ɗu namboŋ a giɓkǝ mayi kǝ zarsǝ. ¹⁶ Lǝǝɗkǝni kǝ mǝn maanndǝ a kaar pǝrshi tǝ ta yi tashi goɓri kuri mbǝtlǝm (200,000,000) Maa ta wum lǝǝɗkǝni waasǝŋ. ¹⁷ Cig ghǝnnda mǝ ta yel gya pǝrshes a yelghǝn ngǝtn ngǝ jaanatn tǝ mǝn taghǝn ɓashi, ngǝtn ngǝ lyaaghǝni gǝǝɓ waasǝŋ tǝ ta yi nǝ zhelaŋshi ɗaŋ wuɗ, diɓkǝn shuuni, tǝ fyaali ture. Gamtsǝ pǝrshes tǝ ta yi ɗaŋ gaamtsǝ daanamtsǝ a vii waasǝŋ, wuɗ tǝ yaagn, tǝ fyal wuɗ. ¹⁸ Namboŋ a giɓkǝ mayi kǝ zarses balayiɗi gyagin tǝ ta tlaa shi waashii: wuɗ tǝ yagn, tǝ fyal wuɗ ɗaŋ tǝ ta nywaal ɗi a vii waasǝŋ. ¹⁹ Durghǝ yo tu vartǝ kǝ pǝrshes ta yi gha vii waasǝŋ tǝ kiir waasǝŋ-durghǝ yo tu kiir waasǝŋ ta yi ɗaŋ nyici tǝ yir gamtsǝ yo ɗaŋ tǝ yaŋshi ghuŋ caa ngaa wus zarsǝ ghai. ²⁰ Ɓanci zarsǝ gyagyo ɗaŋ balayiɗes tlaa shi hŋ tǝ kaɓ ndaaɗkǝn waasǝŋ, tǝ kaɓ ndaaɗkǝn waasǝŋ nǝ ngǝtn ɗaŋ tǝ ta fi hŋ, tǝ ndǝr tǝ gaa mbuughǝn mǝnndǝŋsǝ tǝ waarvkǝ jinari, azurfa, dwaam, puus, tǝ ŋamtsǝ hŋ beɗ- beɗ ngershi gyagii ɗaŋ caa ɗyavtǝ yaal, ko tǝ wumi, ko tǝ rii hŋ. ²¹ Tǝ ndǝr tǝ kaɓ ndaaɗkǝni waasǝŋ nǝghǝ ɗughǝn zaar, tǝ zugn, tǝ mbǝllǝ tǝ laaghǝ cighǝn mǝǝr hŋ.