¹ A kili gii mǝ ta yel dǝllǝ ghǝ zhipti shinngǝn Cogn a shiighǝn ɗi te tsogn. A ta yi nǝ naaɗkǝn a giɓ kurvon, gaami tǝ gaam wos, falaŋ ta yighai. Yir wos tayi ɗaŋ dzaŋ, yesaŋsǝ wos tǝ ta yi ɗaŋ jenndǝm wuɗ. ² A ta ngaɓ tagarta a taas wos ɗaŋ nǝ ɗǝrǝghǝni a ta gaa yaasǝŋ zaari wos a dǝllǝ ghǝ zha gaa yaasǝŋ napti wos ɗa yaatli. ³ She a ta ɗu kaaghǝni tǝ yer tlyaa tlyaa ɗaŋ daa namtsǝ. A kili yo ɗaŋ a ta ɗu kaaghǝnii, she falaŋ wottsǝmai tǝ ta wul vii tǝ yer waasǝŋ. ⁴ Kili yo ɗaŋ falaŋ wottsǝmaiyes tǝ ta wul vii, ata naam ɗa hŋ mǝ naɓ dlaaɗkǝni, beɗ tǝ gii mǝ ta wum yer won ɗi gaami tu, "Gaa sǝǝr yo ɗaŋ falaŋ wottsǝmai yi tǝ kon. Dlyaaɗ hŋ." ⁵ She zhipti shinngǝn Cokes ɗaŋ mǝ yel tǝ a dlǝǝrghǝn a dulghǝ dǝllǝ ghǝ zhes tǝ dulghǝ yaatles, a mbwaa taas zaari wos tsogn. ⁶ A ta ŋas puus tǝ gyo ɗaŋ ci gwaam zhaaɗ zhaaɗ kǝ zhaaɗ zhaaɗi, gyo ɗaŋ a ndǝr tsogn tǝ ɓurug ngǝtn yo ɗaŋ yi ɗa giɓi, tǝ ɗǝgn tǝ ɓurug ngetn yo ɗaŋ yi ɗa duuli, tǝ dǝllǝ ghǝ zha tǝ ɓurug ngǝtn yo ɗaŋ yighai ɗa giɓi. She zhipti shinngǝn Cokes ta wul tu, "Dlǝǝrghǝn ngai ɗa hŋ. ⁷ Beɗ tǝ gii, ɗa dzanyi a kili yo ɗaŋ zhipti shinngǝn Cogn kǝ wottsǝmai yes yaa naa ɗaŋ tǝ vuɗ mwaari goshii, a kiles sǝǝr ghǝ Cogn wo yugngarii ɗaŋ gyo ɗaŋ a kon a monsǝ wos mǝn shinngǝn Cokes. ⁸ Yeres ɗaŋ mǝ wumi te tsoghǝi a man wul vii tǝ myan ɗa: "Tlǝ, mbi tagartai ɗaŋ nǝ ɗǝrǝghǝnii, ɗaŋ yigha giɓ taas kǝ zhipti shinngǝn Coki gii ɗaŋ aa dlǝǝr gha dulghǝ dǝllǝ ghǝ zhes tǝ dulghǝ yaatles." ⁹ She mǝ tlii a zhipti shinngǝn Cokes mǝ wul tǝ tu tǝ taam ŋaa tagartas. A wulǝm tu, "Mbi tagartas aa ci tii. Wo caa vwaa wa baŋngǝni, beɗ tǝ gii, a vii waa wo mwaa ɗaŋ duum." ¹⁰ Mǝ kaɓ ŋaa tagartashii a taas zhipti shinngǝn Cokes mǝ cii. A ta mwaa ɗaŋ zhak duum a vietn, beɗ tǝ gii ɗaŋ mǝ ta cii, vwaatn ta baŋǝi. ¹¹ She gon wulǝm tu, "A naa ciɓ aa kon ngǝtn ngǝ jaan ɗa a dulgaam zarsǝ monnda, dǝllǝŋsǝ yaatl, vii zarsǝ tǝ guŋsǝ."