¹ Tǝǝ taa vǝrǝm shirǝŋ mǝ fi laghai ɗaŋ tu nǝ shirǝŋ ɓǝǝɗkǝn ngǝtn. Tǝǝ taa wulǝm tu, "shishi a ɓǝǝɗ dǝn coghǝi tǝ lǝɓ dlǝǝrghǝn ngǝ dǝn cogn, tǝ gyaa gyo ɗaŋ caa mbuughai ɗa giɓi. ² Beɗ tǝ gii a ɓǝǝɗ ɓǝdlǝŋ dǝn cokes hŋ dur yo tu taa vǝr mǝn ɗǝgn. Taa daɓtsǝ yaatl kǝ ndzǝkkǝnes nǝghǝ lǝpm tashi wuɓsǝ tliiti mɓǝtlǝŋ. ³ Ma vǝr mǝn tlyaghǝn zheti zarsǝ mbǝtlǝŋǝi vartǝ tǝǝon ngǝtn jaan nǝghǝ dzaŋ zaŋ ngu namboŋ tǝ kuuri mbǝtlǝŋ tǝ tashi lim (1,260), ta caa lǝŋsǝi." ⁴ Mǝn tlyaghǝn zhes yaŋshighǝn ci gwaas mɓǝtlǝŋ kǝ zaituni tǝ kuuɓk ngaɓkǝn wuɗ mbǝtlǝŋ ɗaŋ cigha dlǝǝrghǝn a ken Daadǝn kǝ ɗǝgn. ⁵ Kǝn gǝn yaa bwaa tǝ malarshi waashi, wuɗ wo nyolɗi a vii waasǝŋ ndǝr ci mǝn nyaŋngaskǝn waasǝŋǝi. Gyo ɗaŋ caa suu tǝ malarshi waashi a naa ciɓ tǝ ɗutii a tǝpi gin. ⁶ Mǝn tylaghǝnzha gyaa gin tǝ yir vartǝ tǝ dlǝpm gaami ɗaŋ von wo mn shiiɗa hŋ a kili yo ɗaŋ caa kon ngǝtn jaan. Tǝǝ yir vartǝ tǝ sular zha tǝ naai nǝ vwaraŋ tǝǝ ndǝr tǝǝ ɗu ɗǝgn tǝ ko naa alobai gyo a kili yo ɗaŋ caa suu a raa waasǝŋ. ⁷ A kili yo ɗaŋ caa ɓan tlyaghǝn zha waasǝŋǝi, tluk namtsǝ gii ɗaŋ a mbwaaɗi giɓ giir shoŋnii wo shisher manndǝ caa gaa gǝǝɓ tǝ yaŋshi. Wo tu mbar zanyi ɓashi ndǝr tlaa shi waashi. ⁸ Gǝmmɓǝli waasǝŋ taa mbuɗni a datǝpm ngǝ dǝllǝŋsǝ yaatles (gyo ɗaŋ dyak wos caa cim tu saduma tǝ Masar) tǝɓ yo ɗaŋ tǝ ghǝmmbal Daadǝn wopm ngai. ⁹ Ngǝnngǝ mbuɗkǝni mayi tǝ kummbei gyaa gonɗi a ko Zarsǝ gyo, tǝ kabila, tǝ yatl taa yel gǝmmbǝli waasǝŋ. Taa kaɓ tǝǝ gǝmshi a vii giir hŋ. ¹⁰ Mǝn tsǝtnngǝn ɗǝgn wo polishi taa ndǝr taa fi belak. Hal taa shinndar dlǝŋ sǝwaasǝŋ vǝrghǝn kǝ ɓem mǝn dur yo tu mǝn shinngǝn coghǝn mbǝtlǝŋǝi tǝǝ fir forǝm gyaa gyo ɗaŋ caa tsǝtn a ɗǝgn. ¹¹ Beɗ tǝ gii a kaar mbuɗkǝn mayi tǝ kummbe sǝǝghǝn rai ɗi a cogn wo ndashi, taa ndǝr tǝǝ dlǝǝr tǝ yaasǝŋ waasǝŋ. mǝn yo ɗaŋ tǝǝ yelshi, taa ci vǝrtǝ nǝ ŋaanyi hŋ. ¹² A kili gii taa wum dǝllǝghǝ yer wo bwaaɗi gaami wulshi tu, "Tanɗi ɗuun!" A kili gii taa tai tsogn a giɓ kurvon, mǝn nyaŋngaskǝn waasǝŋ a yelghǝn. ¹³ A dǝǝli gii dǝllǝghǝ zhighǝɗkǝn yaatl ɗ, dǝni namboŋ a giɓ dzuɓ kǝ yaatli wo daaɗii. taa tlaa Zarsǝ zaŋngu watlsǝ mayi a zhighǝɗkǝnyaatles, mǝn fuuɗkǝn taa ci vǝrtǝ tǝǝ ndǝr tǝǝ zhim cogn kǝ gaami. ¹⁴ Girghǝn kǝ mbǝtlǝŋi aa laatsǝi. Yelǝn! Girghǝn kǝ mayes caa manngǝnɗi motlak. ¹⁵ Kiles zhiɓti shinngǝn cogn kǝ wattsǝmayes a vuɗ mwaari wos, she dǝllǝŋsǝ yer tǝǝ wul vii gaami tǝǝ wul tu, "Guŋdu kǝ ɗǝgn a naai nǝ guŋdu kǝ Daadǝnwopm tǝ kǝ Ɓorghǝn kǝ cognwos. Wo fi guŋdu nǝghǝ ndok-ndok kǝ ndok-ndok." ¹⁶ Kiles Zarsǝ ghǝ varaŋshi tashi mbǝtlǝŋ tliiti wuɓsǝ ɗaŋ caa tsǝtnngǝn a daan waasǝŋ a ken coŋǝi, tǝǝ daaɗ tǝ yir waasǝŋ yaatl. Tǝǝ mbuu cogn. ¹⁷ Tǝǝ wul tu, "Mǝ nyarghǝ mǝn, Daadǝn cogn, murghǝ zhimngǝn, gyo ɗaŋ ci ɗaŋngǝni tǝ gyo ɗaŋ ata yi, dur yo tu kaa kaɓ vartǝ kǝ vari waai kǝ ndǝr kǝ nguɓ guŋndǝ. ¹⁸ A tlii dǝllǝŋsǝ yaatl, bǝɗ tǝ gii loŋsǝ waa a man. Dǝǝl a man ɗaŋ taa ɗǝǝl vii mǝn mǝǝskǝn mǝn ɗaŋ ka vǝr ɓakmi monsǝ waa mǝn shinngǝn cogn, tǝ mǝn caaghǝnraa, tǝ mǝn yo ɗaŋ tǝǝ ci vǝrtǝ sǝmwaa, bǝɗ mǝn yo ɗaŋ cigha bamvii ngǝtnwon hŋ tǝ mǝn varaŋsǝ. Dǝǝl a man ɗaŋ ka kwaaɓ mǝn kwaaɓkǝn ɗǝghǝi." ¹⁹ Kiles tǝǝ taa ɗera dǝn cognǝi, she tǝǝ taa yel kuluŋ mbighǝn ɗa raawoshi ɗa giɓ viin laades. Ɗanni she lǝɓ yaalighǝni paraɗ, tǝ yer, tǝ tlaaghǝn falaŋ, tǝ zhighǝɗkǝn yaatl, tǝ dǝllǝŋsǝ shomndi ɗaŋ yi tǝ yatar.