¹ Tǝǝ yel dǝllǝ giɗkǝn wonɗi tsogn gaami: Geɗ won a dlǝpmti tǝ dzaŋ tǝ lǝpm beɗ a giɓkǝ yasǝŋ wos tǝ woŋ gaam kǝ caar dzuɓ tliiti mbǝtlǝm a gaam wos. ² Ci tǝ ŋaavwa, cigha ngwaarghǝn nǝ wumngǝnngǝ ɓwaaghǝn, a giɓkẹ buŋngǝn kǝ ɓwaaghǝn. ³ She tǝ yel giɗkǝni gonɗi tsogn gaami: Yelǝn! Dǝllǝk nyici zheli won ɗa ɗaŋ citǝ gamtsǝ wottsǝmai a gaamwos. Tǝ nyeri dzuɓ, tǝ woŋ gaam wattsǝmai a gaamwos. ⁴ Kiirwos tuɗ namboŋ caari giɗi a giɓi gya gi maayi tsogn gaami shinshi waashi ɗi ɗǝgn. Nyices tlǝn dlǝǝri a kenngǝ gǝɗes ɗaŋ ca ŋal tǝ ɓwaayes, duryo tu kili yo ɗaŋ ya ɓwaai tǝ ci ŋaaishi. ⁵ She a ɓwaa ŋaa mwaan, gyo ɗaŋ wo fi guŋndu kǝ ɗǝgn ɓuruk tǝ shirǝŋ dwaam. Tǝ vuum ŋaawoshe shi tǝbtlǝǝri a Cognvon a giɓkǝ guŋndu wos. ⁶ Gǝɗes beɗ a kiir tlǝn ndǝr lǝǝɓ yo ɗaŋ Cognvon ndǝr tǝ mǝn duryo tu tǝ ɗya tǝbpaŋtǝ nǝ kǝ mbuɗkǝn zaŋngu namboŋ tǝ kuri mbǝtlǝm tasii liim 1,260. ⁷ A kiles manndǝ ta shishi tsogn gaami. Mika'ilu tǝ zhipti shinngǝnwos tǝ ta fi manndǝ tǝ nyices, she nyices tǝ zhioti shinngǝn goshes tǝǝ ta fi manndǝ tǝ yanshi ɗaŋ. ⁸ Beɗ tǝ gi nyices citǝ tlyaaghǝn kos ɗaŋ wo tlyaagam wasǝŋ hŋ. Nǝ durghǝ cik, yan tẹ zhipti shinngǝn woshes tǝǝ ta man tu lǝǝɓ tsogn gaami ɗa hŋ. ⁹ She tǝǝ ta gǝm dǝllǝk nyiceshi ɗi tǝ gya zhipti shinngǝn woshes ɗǝgn, yan nǝ ndotsǝ nyici ɗaŋ caa cimtǝ tu Ibilis ko Shetan gi ɗaŋ ca mor mǝn ɗǝgn ɓurughǝi. ¹⁰ She mǝ wum yer wonɗi tlya tlyaa tsogn gaami: Ɗaŋnin vumngǝn a man, tlyaaghǝn, guŋndu kǝ Cogn wopm, vartǝ ghǝ gi ɗaŋ nǝ Ɓorghǝnni. Duryo tu taa gǝm murghǝ caaghǝn vi gya yestǝ wopi ɗǝgn, yan ɗaŋ ca caashi a ken Cognvon dzaŋ tǝ kaviɗ. ¹¹ Tǝǝ tlya gamashi a te voraŋ kǝ ŋaa tǝǝmes tǝ tlyaghǝn zha kǝ vi wasǝŋ, nǝ yo tu tǝǝ suu raai wasǝŋ hŋ hal nǝ kǝ mǝskǝn. ¹² Nǝ durghǝ cik, fin polghǝn kyani tsogn gaami tǝ ɓuruk mǝn tsǝtnngǝn ɗa giɓes. Beɗ tǝ gi a giir ɗǝgn tǝ zha duryo tu Ibilis a shiiɗi ɓaski. Ci nǝ yugnngǝn tǝ tliitiyer, duruo tu a yisǝŋǝi tu kili wos a naai njwatn. ¹³ Ɗaŋ nyices yisǝŋǝi tu taa gǝm ti ɗi ɗǝgn, she a kaɗ gǝɗes ɗaŋ a ɓwaa ŋaa mwaani. ¹⁴ Beɗ tǝ gi tǝ vǝr gǝɗes gyomtlii mbǝtlǝm kǝ dǝllǝk zhaŋ duryo tu tǝ kiir tǝ tlii a lǝǝɓ yo ɗaŋ tǝ ndǝr tǝ mǝn dlǝk ndǝǝr. A lǝɓi ges ǝnnda taa paŋtǝ nǝ kǝ kili njwaatn, tǝ kili monnda tǝ kumbai ghǝ kili a kili yo ɗaŋ nyices ciɗa hŋ ¹⁵ Nyices a pyaatsǝ zha ɗi a viwos ɗaŋ laar, nǝ yo tu tǝ yugn tǝ mbiti. ¹⁶ Beɗ tǝbgi yatl som gǝɗes ɗa. Yatl ŋǝǝr vi ɗǝǝɗ lareshi ɗaŋ nyices pyatsǝ ɗi a vi woshes. She a tlii nyices a gǝɗes, ¹⁷ she a tlǝ tǝ fi manndǝ tǝ ɓanci ghǝ usuli wos, gya gyo ɗaŋ tǝ laaɓ mborkighǝ Cognvon tǝ ndǝr tǝ naa nǝ mǝn tlyaaghǝn zha a dul gaam Yesu. ¹⁸ She nyices a ta dlǝǝrni a dulghǝ yatl, a kenngǝ zha.