¹ She mǝ ta yel tluk namtsǝ won ca nyolghǝn ɗi a zyak vaar ci tǝ gamtsǝ wattsǝmai tǝ nyeri dzuɓ. A gya nyeri woshes ta ga guŋndǝ ghai dzuɓ, a ko gami gyo sǝǝm kemaskǝnngai. ² Tluk namci gin ɗaŋ mǝ ta yelu, cinǝ ɗaŋ zhii gya yasǝŋ wos cinǝ ɗaŋ zaki, vi wos yi ɗaŋ kǝ zaki. Tluk namces a vǝr tǝ vatǝ wos tǝ woŋ gaam guŋndǝ wos tǝ dǝllǝ vartǝ wos tǝ fi guŋndǝ ³ Namboŋ a giɓkǝ gamtsǝ tluk namces a yal ɗaŋ tu taa ɗuu tli, beɗ tǝ gi wus dlii woshes a nyaŋǝi. She dzaŋngǝ kosarghǝn ɗeɓaɗ ɗǝgn ɗaŋ caa laaɓ tluk namces. ⁴ Tǝǝ mbuu tluk namces beɗ, duryo tu aa vǝr vartǝ wos tkuk namces. Tǝǝ ta mbuu tluk namces ɗaŋ, ci wul tu, ''Nu ghǝn cinǝ ɗaŋ tluk namces so?'' ''Nǝ nuu ghǝn wo ɗya fi manndǝ tǝ yani yo?'' ⁵ She tǝǝ ta vǝr tluk namces vi ɗaŋ wo ɗya wul vi ɓitǝgam tǝ vik kemaskǝn Cogn tǝ ta gaatǝ tǝ fi guŋndu nǝ kǝ lǝpm taashi wuɓsǝ tliiti wuɓsǝ. ⁶ Nǝ gi tluk namces a ta ɗǝrǝ vi tǝ wul vik kemaskǝn Cogn. Yi kemas sǝǝm Cogn tǝ lǝǝɓ tsǝtnngǝn wos tǝ gya gyo ɗaŋ caa tsǝtn gaami tsogn. ⁷ Tǝǝ ta vǝr dǝǝl tluk namces tǝ fi manndǝ tǝ mǝn laaɓjǝ tǝ tu tlyaaghǝn gaam ɗeɓaɗ zarsǝ tǝ yisǝŋ tǝ yaatli. ⁸ Zarsǝ ɗaŋ caa tsǝtn a ɗǝgn ɗeɓaɗ ta mbuu tǝ, ɗeɓaɗ gyo ɗaŋ tun a ngaɓkǝn ɗǝgn kǝni sǝǝm wasǝŋ nǝ dlyaaɗkǝn a tagarta raai kǝ ŋaa tiim ɗaŋ tǝ ta ngyerii hŋ. ⁹ Gyo ɗaŋ citǝ kǝǝm tǝ wummi. ¹⁰ Gyo ɗaŋ ka tlǝǝn tu nǝ mon, wo tu wo mǝshi tǝ sǝɓǝr, gin nǝ cimngǝn kǝ morghǝn raa nǝ gya gyo ɗaŋ cindzǝk ndzǝk. ¹¹ She mǝ ta yel tluk namci gon ci a nyolghǝnɗi a dzaŋ a ta yi tǝ nyeri mbǝtlǝm ɗaŋ nǝ kǝ dǝllǝ tluk namtsǝ. ¹² Ata fi laa tǝ vartǝ tluk namces nǝ konii ɗeɓaɗ a ken wos beɗ ata caa dzaŋ tǝ ɗeɓaɗ gya gyo ɗaŋ caa tsǝtn a giɓi wos tǝ mbuu tluk namces keni gi ɗaŋ dǝllǝ wos woshii a nyaŋǝi. ¹² Ata fi laa tǝ vartǝ tluk namces nǝ konii ɗeɓaɗ a ken wos beɗ ata caa dzaŋ tǝ ɗeɓaɗ gya gyo ɗaŋ caa tsǝtn a giɓi wos tǝ mbuu tluk namces keni gi ɗaŋ dǝllǝ wos woshii a nyaŋǝi. ¹³ A ta fi ngǝtnngǝ kosarghǝn nǝ varaŋshi monnda, a ta caa wuɗ tǝ shii ɗi gami a ɗǝgn a ken zarsǝ. ¹⁴ A ta mor mǝn tsǝtnngǝn dzaŋ tǝ tǝ gya ngǝtn kosatghǝn yo ɗaŋ tǝ ta gatǝ tǝ fi. ¹⁵ Tǝ ta gaa tǝ tǝ vǝr sǝǝghǝn sifa ghǝ tluk namces, duryo tu sifa tluk namces ɗya tǝ wul vi tǝ caa tǝ taa gya gyo ɗaŋ tǝ nyaŋngas tǝ mbuu tluu namceshi ɗeɓaɗ. ¹⁶ A ndǝr caa zarsǝ ɗeɓaɗ mǝn varaŋsǝ tǝ ɓatsakni, mǝ tughǝn tǝ mǝn dwaanndǝ, monsǝ tǝ gya gyo ɗaŋ nǝ monsǝ hŋ tǝ kaɓ ngǝtnngǝ ziɗkǝn won a taaghǝ zaari wasǝŋ ko a gamken wasǝŋ. ¹⁷ Gon wa ɗya ɗiiɓ ngǝtn ko ɗiɓar hŋ she yan citǝ ngǝtnngǝ zhiɗkǝn kǝ mǝn vartes, dadtsǝ ɗaŋ aa zhiɗ sǝǝm wos ngǝnndi. ¹⁸ Gin caa ŋal yisǝŋngǝn. Gyo ɗaŋ citǝ yisǝŋngǝn, she tǝ kwaan lamɓa mǝn vartǝ. Lambai nǝ kǝ zarsǝ lambai nǝ kǝ 666.