¹ Mǝ yaal mǝ yel ŋaa tǝǝm a dlǝrghǝn dul wuur zaitun. Citǝ 144,000 gyo ɗaŋ tǝǝ wum sǝǝm wos tǝ sǝǝm Daagos nǝ dlyaaɗkǝn a gaamken wasǝŋ. ² Mǝ wum yer ɗi tsogn ca wul ɗi ɗaŋ tu zha ǝŋ ca kiir tǝ byatlkǝn fyalaŋ. ngǝrshes ɗaŋ mǝ wum ta yi ɗaŋ tu nǝ mǝn mwari ca vuɗ mwari wasǝŋ. ³ Tǝǝ waa ngil muri a kenngǝ daan guŋndes a ken ngǝ ngǝtnngǝ raai wuɓses tǝ mǝn varaŋsǝ. Gon kǝǝm kuuɓ ngiles hŋ she 144,000 gyo ɗaŋ tǝǝ kǝǝnɗi ɗǝgn. ⁴ Gya gin nǝ gya gyo ɗaŋ taa malar gamawasǝŋ tǝ guɗi hŋ, duryo tu caa gaa gamawasǝŋ tǝ ndzǝkni a te mbǝllǝ. Nǝ gya gin ǝŋ tǝǝ laaɓ ŋaa tǝǝm ɓuruk lǝǝɓ yo ɗaŋ ya tlǝghai. Gya gin tǝ nyolarshi ɗi a zarsǝ tu tǝ naai nǝ gami durghǝ Cogn nǝ tǝǝmes. ⁵ Mberni won ta yi gha vi wasǝŋ hŋ; Citǝ ngǝtn caaghǝn vi hŋ. ⁶ Mǝ yel zhipti shinngǝn Cogn gon ɗaŋ cigha tlǝǝɗkǝn Cogn gaami, gyo ɗaŋ citǝ vik wusni ɗaŋ wo fuu mǝn ɗǝgn ɗeɓaɗ riisǝŋ, usuli tǝ zarsǝ ɓuruk. ⁷ A cim tǝ yer vari tu, ''Ci vǝrtǝ Cogn a luutǝ. duryo tu dǝǝl ghǝ ɗǝǝlghǝn vi a tuliɗi. Mbuu tǝ, gyo ɗaŋ a ndǝr gaami, ɗǝgn, rupm, tǝ tlǝrǝŋ zhak.'' ⁸ Zhipti shinngǝn gon, Zhipti shinngǝn kǝ mbǝtlǝmi a laaɓ ɗi ca wultu, ''Ndaɗkǝ, ndaɗkǝn nǝ kǝ Babila ɗaŋ nǝ vari, gyo ɗaŋ acaa yatl ɓuruk tǝ tlyaa zhak darndu dǝn kǝ mbǝllǝ woshi.'' ⁹ Zhipti shinngǝn Cogn gon kǝ mayi a laaɓ shiɗi tǝ yer tlya tlyaa ca wul tu, ''Ǝŋ gon ya mbuu ngǝtnngǝ yaasǝŋ wuɓsǝ, ya kaɓ zhiɗkǝn a gaamkẽen wos ko taas wos, ¹⁰ wo tlyaa darndu dǝn kǝ loŋsǝ Cogn, zhak darndu dǝn yo ɗaŋ tǝǝ shin a koɗkǝ loŋsǝ woshes. Gyo ɗaŋ ya tlya ta fiir tǝ forǝm a wuɗ, tǝ wuɗ fyali, a ken ngǝ zhipti shinngǝn Cogn kǝ ndzǝkkǝnngǝ Cogn tǝ ŋaa tǝǝmes. ¹¹ Yagn kǝ firghǝn wasǝŋ forǝm wo taai hal nǝ kǝ ndok ndoki, tǝǝ yir ngaaghǝn laa ɗa hŋ dzaŋ tǝ kaviɗ- gya gi ɗaŋ tǝǝ mbuu ngǝtnngǝ yaasǝŋ wuɓsǝ, tǝ ɓuruk gyo ɗaŋ a kaɓ zhiɗkǝn sǝǝm wosheshi. ¹² Gin nǝ cimngǝ dluughǝn vwaa ghǝ gya gi ɗaŋ citǝ ndzǝkkǝn, gyo ɗaŋ caa kiir mborkighǝ Cogn tǝ Caaghǝn raa a Yesu.'' ¹³ Mǝ wum yer won ɗi gaam tu, ''Dlyaaɗ ginǝnni: mbuuni nǝ kǝ mǝn mǝskǝn yo ɗaŋ tǝ mǝǝs a giɓkǝ Daadǝn.'' ''yi cik,'' nǝ zhipti a kon, ''duryo tu ta ngaa laa a laawasǝŋ, duryo tu laa wasǝŋ wo laaɓshi.'' ¹⁴ Mǝ yaal, she kurvon fyaali won ghǝnni. gyo ɗaŋ cigha tsǝtnngǝn ɗa kurvones cin ɗaŋ ŋaa zaar. Citǝ woŋ gaam kǝ zinariya a gaam wos tǝ roɓzhi pele pele a taas wos. ¹⁵ She zhipti shinngǝn Cokes gon a nyolɗi dǝn Cogn a cimtǝ yer tlya tlyaa nǝ gi ɗaŋ cigha tsǝtnngǝ a kurvones: mbi roɓzhi waai a nguɓ jwaamngǝn darndu dǝn kǝ nyaŋnes. Duryo tu kili jwaamngǝn a tuli ɗi, duryo tu kili jwaamngǝn ɗǝgn a fi.'' ¹⁶ She gi ɗaŋ cigha tsǝtnngǝn dul kurvones kur roɓzhi ɗi ɗǝgn tǝ ndǝr tǝ tlaa ɗǝgǝi. ¹⁷ Zhipti shinngǝn Cogn gon a nyolɗi a dǝn Cogn gaami, yan beɗ citǝ roɓzhi pele pele. ¹⁸ Saɗɗa zhipti shinngǝn Cogn gonmbwaaɗi te bagadi kǝ gǝǝmngǝn ngǝtn zhoŋngǝ dlǝrǝŋ dlǝrǝŋ, gyo ɗaŋ citǝ vartǝ a dulgam wuɗes. A cim tǝ yer won tlya tlyaa nǝ gi ɗaŋ citǝ roɓzhi pele pele, ''Mbi roɓzhi waai pele pele a jwaam darndu dǝn kǝ nyaŋneshiɗi a gwas kǝ darndu dǝn kǝ ɗǝgn, nǝ duryo tu darndu dǝnnes a nyaŋǝi.'' ¹⁹ Zhipti shinngǝnnes kur roɓzhi woshe sji ɗi ɗǝgn tǝ jwaam darndu dǝnngǝ ɗǝkeshi. A shinshi washi a dǝllǝk koɗkǝ tsaɗkǝn zhak darndu dǝn kǝ loŋsǝ Cognvon. ²⁰ Tǝ ɓuruk lǝǝɓ kǝ tsaɗkǝn darndu dǝneshi a te kaar ghǝ yatles, voraŋ fi tǝ paaskǝn a te lǝǝɓ kǝ tsaɗkǝn zhak darndu dǝnnes, fupmngǝn wos tuli ɗaŋ tlǝrǝŋngǝ vik pǝrshi, hal miil kuri mbǝtlǝm.