¹ Ɗaŋ Daaguɓzhes ɗǝrǝ rǝchi kǝ guŋndu kǝ wottsǝ mai yeshii, lǝɓ ta fii kelag Tsogn gaami nǝghǝ kummbai ghǝ kili. ² Annda mǝ ta yel zhipti shinngǝn Cogn wottsǝmai gyagyo ɗaŋ caa dlǝǝr a ken Cognvon, she tǝ vǝrshi nyeri kǝ vuɗkǝni wottsǝmai ³ Zhipti shinngǝni Cogn gon ɗa a man cigha ngaɓkǝni puŋndi jinari kǝ miir koɗkǝni kǝ naa dlǝrǝŋ dlǝrǝnyi, cigha dlǝǝrghǝni gha lǝɓ ɗaŋ nǝ nalghǝni kǝ koɗkǝni miir naa dlǝrǝŋ dlǝrǝnyi. Tǝ vǝr tǝ miir naa dlǝrǝŋ dlǝrǝnyi monnda durghǝ yo tu tǝ vǝr shi waashii tǝ gya karaghǝni mǝn laaɓkǝni burug a dulghǝ lǝɓii ɗaŋ nǝ nalghǝni ɗaŋ nǝ nalghǝni tǝ jinari kǝ miir dlǝrǝŋ dlǝrǝnyi gyo ɗaŋ yigha ken daan guŋndǝi. ⁴ Yaagn kǝ miiri tǝ gya karaghǝn kǝ mǝn laaɓkǝn a shishi a taas kǝ zhipti shinngǝn Cokes a tai gaami a Cognvon. ⁵ She zhipti shinngǝn Cokes a mbi puŋndi miir kǝ dlǝrǝŋ dlǝrǝnyes a yugn tii tǝ wuɗ ɗaŋ a ngaa ɗi a lǝɓ ɗaŋ tǝ nal nǝ gǝǝpm ngǝn ngǝtii, annda akur tǝ ɗi ɗǝgn, she falaŋ ngaɓ byaatlkǝn, tǝ gǝmngǝn vii kǝ von, falaŋ yi tlaa tǝ zhighǝɗkǝni ɗǝgn. ⁶ Zhipti shinngǝni Cognvon wottsǝmaiyii tǝ ngerii tǝ vuɗkǝni, tǝ mbǝrshi waasǝŋǝi tǝ vuɗ gya nyeres. ⁷ Zhipti shinngǝn Cognvon kǝ kenes a vuɗ nyeri goshii, she guruŋshi shemndi tǝ wuɗ nǝ lǝǝghǝni tǝ voraŋ tǝ mbwaaɗi , she a dlaa shi ɗi tǝ ndaaɗ ɗi a dulghǝ ɗǝgn, nǝ durghǝ gii dǝni namboŋ a giɓkǝ dǝni mayi tǝ gǝǝpii, tǝ ɓǝǝlii dǝni mayi, dǝni namboŋ gǝǝpii, yaar ɗǝki tǝ gǝǝpii. ⁸ Zhipti shinngǝn Cognvon kǝ mbǝtlǝmi a vuɗ nyeri goshii, she ngǝtn won ɗaŋ dellǝghǝ wuur tǝ wuɗ kai cigha cighǝni tǝ ta kur tii giɓ dǝllǝ ghǝ zha. Kya ɓǝǝl dǝllǝ ghǝ zhai dǝni mayi, dǝni namboŋ a naai nǝ voraŋ, ⁹ ngǝtn yo ɗaŋ caa tsǝtn a dǝllǝ ghǝ zhai dǝni namboŋ .a giɓkǝ dǝni mayi tǝ mǝǝshii. ¹⁰ Zhipti shinngǝn Cognvon kǝ mayes a vuɗ nyeri goshii, she dǝllǝ ghǝ caar won vunnda ɗi a yetar gaami, ca tlaa ɗi ɗaŋ wuɗ ɗaŋ tǝ ngaɓ a mbatlaŋ kaviɗ, she a dulghǝ dǝni namboŋ a giɓkǝ dǝni mayi ɗaŋ kya ɓǝǝlii,kaɓkǝ gya rupm tǝ kaɓkǝ zhai gya gii ɗaŋ caa ɓuɗɗi yaatlii. ¹¹ Sǝm caari tu baŋndi. Namboŋ a giɓkǝ mayi kǝ zha tǝ baŋei, zarsǝ monnda tǝ mǝǝshii nǝ zha ɗaŋ a baŋǝi. ¹² Zhipti shinngǝn Cogn kǝ wuɓshes a vuɗ nyeri goshii, aɗu dǝni nambonyi a dǝni mayi kaɓkǝ dzaŋ, cig ɗaŋ, dǝni namboŋ a dǝni mayi kaɓkǝ lǝpm, cig dǝni namboŋ a dǝni mayi kaɓkǝ caar. Nǝ durghǝ gii namboŋ a dǝni kaɓkǝ mayi waasǝŋ tǝ naainǝ jii, namboŋ a giɓkǝ mayi kaɓkǝ vyaaghǝni, tǝ namboŋ a giɓkǝ mayi kaɓkǝ kaviɗ, lǝɓ ta yaal ɗa hŋ. ¹³ Mǝ yaal she mǝ wum dǝlǝkci ɗaŋ cigha tlǝǝɗkǝni gha dlǝk yetar gaami, cigha wulghǝni tǝ yer tlyaa tlyaa tu, "A girvki, a gir ki, a gir ki, kyaani gya gyo ɗaŋ kigha tsǝtnngǝni gha ɗǝgn, nǝ durghǝ nyeri ɗaŋ tǝ ɓan tǝ naa ɗaŋ tǝ vuɗ shi waashii.