¹ She mǝ ya yel a giɓkǝ taas zaari kǝ daashi yo ɗaŋ a tsǝtnɗi a dul danghǝ guŋndu, mǝ yel tagarta ɗaŋ taa dlyaaɗ ngǝtngi ken tǝ kaar, cinǝ dlǝpmngǝn tǝ ngǝtnngǝn dlǝpmngǝn wattsǝmai. ² Mǝ yel dǝllǝ zhipti shinngǝn Cogn ca kon tǝ dǝllǝ yer tu, ''Nu wo kǝǝm tǝ ɗǝrǝ tagarte shi tǝ ndǝr tǝ pul ngǝtnngǝ dlǝpmngǝnneshi yo?'' ³ Gon won ɗa hŋ giɓ tsogn gaami, ko a ɗǝgn, ko yatl tǝ ɗǝgn wo ɗya tǝ ɗǝrǝ tagareshi ko tǝ kwaan ngǝtn yo ɗaŋ tǝ dlyaaɗ ghai. ⁴ Mǝta ngwar nyaŋ nyaŋ duryo tu gon won ɗa hŋ ɗaŋ a kǝǝm ɗaŋ tǝ ɗǝrǝ tagareshi ko tǝ kwaan ngǝtn yo ɗaŋ yi ɗa giɓi hŋ. ⁵ Beɗ tǝ gi namboŋ a giɓkǝ mǝn varaŋshes a wulǝm tu, ''Ɓak ngwaar hŋ. Yel! zhii kaɓkǝ usuli ghǝ Yahuza a fi mbarzaŋnyi. Yani ghǝn a kǝǝm ɗaŋ tǝ ɗǝrǝ tagarteshi tǝ gya ngǝtn dlǝpmngǝnnes wattsǝmaiyi.'' ⁶ Mǝ yel ŋaa tǝǝm cigha dlǝǝrghǝn a dleighǝ balgham guŋndes tǝ ngǝtnngǝ ndǝrghǝn wuɓsǝ ɗaŋ citǝ raai, a giɓkǝ mǝn varaŋshes ca yaal ɗaŋ tu nǝ gyo ɗaŋ taa ɗuti. A yir nyeri wattsǝmai ɗaŋ Cogn shinndarshi ɗi a ɓuruk ɗǝgn. ⁷ A tlii tlǝn kaɓ tagarte shi a taaghǝ zaari daashi ɗaŋ cigha tsǝtnngǝn dǝnngǝ guŋndes. ⁸ A kili yo ɗaŋ ŋaa tǝǝmes a mbi tagarteshi, ngǝtnngǝ raaiyi wuɓsǝi tǝ mǝn varaŋshes tashi mbǝtlǝm tliti wuɓsǝi tǝbzuɓni yatl a kenngǝ ŋaa tǝǝmes. ko gyo wasǝŋ citǝ kinndi, tǝ koɗ zinariya nǝ yugnngǝn tǝ ngǝtn zhoŋngǝn dlǝrǝŋ dlǝrǝŋ, gya gin ghǝn nǝ karaghǝnngǝ mǝn caaghǝn raa. ⁹ Tǝ ta wa ngil muuri: ''ka kǝǝmi ɗaŋ a mbi tagarteshi, a ɗǝrǝ gya ngǝtn dlǝpmngǝn woshi. Duryo tu taa ta nĝrghǝi, tǝ voraŋ wa ghǝn kǝ ta ɗiiɓ Cogn zarsǝ mǝn kǝ usuli mari mari, riisǝŋ, zarsǝ, tǝ dǝnsǝ ɗǝgn. ¹⁰ Kǝ surshi nǝ guŋndu tǝ gya pǝris tǝ mbuu Cognwopm, nǝ gi ta fi guŋndu a ɗǝgn.'' ¹¹ Ɗaŋ mǝ yaal she mǝ wum kurtǝ kǝǝmngǝ gutuli zhiptibshinngǝn Cogn ɗi ngirǝŋngǝn tǝ balgham guŋndes, beɗ tǝ gya ngǝtnngǝ raai tǝ mǝn varaŋshes. lǝǝɗkǝn wasǝŋbta tuli zaŋngu dzuɓ zaŋngu tǝ zaŋngu. ¹² Tǝǝ wul tǝ yer vari, ''Gyo ɗaŋ a kǝǝm yan nǝ ŋaa tǝǝm yo ɗaŋ tǝ ngyer tu tǝ tu vartǝ, tuughǝn, yisǝŋngǝn, tlyaaghǝn, zhimngǝn, zǝghǝrghǝn, tǝ luughǝn.'' ¹³ Mǝ wum ɓuruk ngǝtn ɗaŋ Cogn ndǝr ɗaŋ ci gaami tǝ yatl tǝ rupm ɓuruk ngǝtn ɗaŋ cigha giɓi wasǝŋ caa wultu, ''Nǝ daashi gi ɗa cigha guŋndes tǝ ŋaa tǝǝmes, tǝ luughǝn, zhimngǝn, zǝghǝrghǝn, tǝ vartǝ ghǝ guŋndǝ, zhaɗ zhaɗ.'' ¹⁴ Ngǝtnngǝ raai wuɓsǝi tǝ wultu, ''Tǝ naa cik!'' she mǝn varaŋshes tǝ nddaɗ tǝ ken wasǝŋ tǝ mbuutǝ.