¹ She mǝ ta yel zhipti shinngǝnCogn won caa shiighǝnɗi gaami. A ta yi tǝ ngǝtn ɗǝrǝghǝn giir ɗaŋ citǝ ɓanngǝn hŋǝi, a ta yir dǝllǝ maraŋngusa a taas wos. ² A ta ngaɓ dǝllǝ tluk namceshii, ndottǝ nyeri gyo ɗaŋ yan ci Shetan, a ta naɗtii nǝ kǝ voni zaŋngu. ³ A ta gǝmtii a giɓ giiri ɗaŋ citǝ ɓanngǝn hŋǝi, dlǝpm tii ndǝr liiɗtii. A ta fi cik tu tǝ man mor mǝn ɗǝgn ɗa hŋ hal she voni zaŋngu ya ɓani. A kari gin ciɓ tǝ man gǝmtii ɗa nǝ kǝ ŋaa kili njwaatn. ⁴ She mǝ ta yel gya daan guŋndǝ, gya gyo ɗaŋ taa vǝr shi vartǝ tǝ ɗǝǝl vi ci a tsǝtnngǝn ɗa duuli wasǝŋ. Beɗ mǝ ta yel raaighǝ mǝni yo ɗaŋ ta dzakshi gamtsǝ mǝn nǝ tlyaaghǝn zha wasǝŋ adul gaam Yesu tǝ vik Cogn. Taa ta nyaŋngas tǝ mbuu tluk namces ko sifa wos, taa ta nyaŋngas tǝ kaɓ ngǝtnngǝ zhiɗkǝn a gamken wasǝŋ ko a taas wasǝŋ. Tǝ ta sushi ɗi a mǝn gwaam tǝ fi guŋndu tǝ gi nǝ Ɓorghǝnni nǝ kǝ voni zaŋngu. ⁵ Ɓanci mǝn mǝǝskǝnes tǝ sushiɗi a mǝn gwaam ɗa hŋ hal she voni zaŋngu ya ɓanni. Shishighǝn mǝn mǝǝskǝnngǝ kǝni ǝnndi. ⁶ Ɓuruk gyo ɗaŋ ya tu shishighǝn a mǝn shishighǝn a mǝn mǝǝskǝn kǝ keni nǝ murghǝ shiɗ shiɗi tǝ murghǝ ndzǝkni! Mǝskǝni ghǝ mvǝtlǝmi citǝ vartǝ a gaam gya gin hŋ. Taa naa nǝ gya pǝris kǝ Cogn tǝ gii nǝ Ɓorghǝn ta fi guŋndu cimtǝ nǝ kǝ voni zaŋngu. ⁷ Ǝŋ voni zaŋngu yaa ɓani, ta gǝm Shetanniɗi ɗaŋ jarumes. ⁸ Wo nyoli ty tǝ mor mǝn ɗǝgn ɗi a banndi wuɓsǝ kǝ ɗǝghǝi Gog tǝ Magog tǝ jwaamshiɗi nǝ manndǝ. Ta maan monnda ɗaŋ nyatsa ɓilar. ⁹ Tǝ basaŋǝi ɓuruk ɗa ɗǝki, tǝ ngirǝŋ lǝǝɓ tsǝtnngǝnngǝ mǝn caaghǝn raai beḍ, dǝllǝ yatli naa suughǝnni. Beɗ tǝ gi wuɗ shiɗi gaami man cishi wasǝŋǝi. ¹⁰ Kuskǝ zhipti, gyo ɗaŋ a morshi wasǝŋǝi tǝ gǝmtii giɓ wuɗ fyali ɗaŋ caa cighǝn namtsǝi tǝ zaar shinngǝn Cogn kǝ mberni ghai ɗaŋ. Taa tlyaa forǝm ɗa ɗan dzaŋ tǝ kaviɗ hal zhyaɗ zhyaɗ. ¹¹ She mǝ ta yel dǝllǝ daan guŋndǝ won nǝ fyali tǝ gyo ɗaŋ ci gha tsǝtnngǝn ḍa duuli. Ɗǝgn tǝ gaami tsogn, tǝ laatsǝi a ken wos, beɗ tǝ gi lǝǝ ɗa ɗaŋ ta tlǝ ghai hŋ. ¹² She mǝ ta yel mǝb nǝǝskẹnngǝ varaŋshi tǝ kǝ mbasakni cigha dlǝrghǝn a kenngǝ daan guŋndes, she tǝ ta dǝrǝ gya tagartai. She tǝ ta ɗǝrǝ tagarta gonu tagarta raai ǝnndi. She tǝǝ ta ɗǝǝl vi mǝn mǝǝskǝn mǝn tǝ ngǝtn yo ɗaŋ nǝ dlyaaɗkǝn a gya tagartes, ɗaŋ a kǝmmbar laa wos hŋ. ¹³ Zhak var a vǝr mǝn nǝǝskǝn ɗaŋ cigha giɓi wos, mǝǝkǝn tǝ nyemri tǝ vǝr mǝn mǝǝskǝn ɗaŋ ci a cuɓi wasǝŋ tǝ ɗǝǝl shi vii mǝn ɓanci ngǝtn yo ɗaŋ ta fi. ¹⁴ She tǝ gǝm mǝn mǝǝskǝn tǝ nyemri giɓ gǝrǝŋ wuɗ. Gin ghǝn cin mǝskǝnngǝ ɓǝllǝŋngǝn gǝrǝŋ wuɗ. ¹⁵ Ɓuruk gya gyo ɗaŋ tǝ tu sǝm wasǝŋ nǝ dlyaaɗkǝn a giɓ tagarta raai hŋ, tǝ kurtii giɓ gǝrǝŋ wuɗ.