¹ A kaarghǝ ngǝrshi gin Mǝ wum ngǝtn won ɗaŋ yerghǝ zarsǝ monnda gaami caa wul tu, '' Haliluya. Vumngǝn, luughǝn, tǝ vartǝ tǝ naa Cogn wopm mǝn. ² Ɗǝǝlghǝn vi wos nǝ jomi tǝ taŋ taŋnyi, duryo tu a ɗǝǝl vi gǝɗ murghǝ mbǝllǝ mǝn gyo ɗaŋ a malar ɗǝghǝi tǝ mbǝllǝwos. A mbi gaam ɗa nǝ durghǝ voraŋghǝ monsǝwos, gyo ɗaŋ yan gamas a dlaa.'' ³ Tǝǝ vi kǝ mbǝtlǝmi: ''Haliluya! Yaŋ shishi ɓastǝ zhaɗ zhaɗ.'' ⁴ Mǝn varaŋshes taashi mbǝtlǝmi tǝ ngǝtn raai wuɓtsǝi tǝ motsat gama wasǝŋ tǝ mbuu Cogn gyo ɗaŋ cigha tsǝtnngǝn a daan guŋndes. Tǝǝ ta yi a wulghǝn tu, ''Tǝ naa cik. Haliluya!'' ⁵ She yer won mbwaaɗi a daan guŋndes, ca wultu, ''Luun Cogn wopm, ɓruk monsǝ wos, kyaani ɗaŋ kya ci vǝrtǝ wos, ɓuruk kusǝŋsǝ tǝ mǝn vartǝ.'' ⁶ She Mǝ wum ngǝtn won wul ɗaŋ yer ghǝ zarsǝ monnda, ɗaŋ kitar ghǝ zha, ɗaŋ kurvon ɗaŋ ca byatl falaŋ, ca wul tu, ''Halliluya! duryo tu Daadǝn a guŋndǝ, Cogn yo ɗaŋ ca fi guŋndu ɓuruk. ⁷ Tǝ polmi tǝ polmi mbun mbun mǝ luutǝ duryo tu belak kǝ kaɓkǝn gǝɗ muuri kǝ ŋaa tiimi a tuliɗi, gǝɗi woshes a ɓumtsǝ gamashi. ⁸ Taa vǝrtǝ dǝǝl tǝ caa lǝŋsǝ mbaaghǝn tǝ ndarara'' (duryo tu linen ndara yan cin laaghǝ zarsǝ ndzǝkni). ⁹ Zipti shinngǝn Cogn wullǝm tu, ''Dlyaaɗ gini: Mbuuni nǝ gyo ɗaŋ tǝ cimtǝ a lǝǝɓ belak kǝ kaɓkǝn gǝɗ muri kǝ ŋaa tǝǝm.'' A wullǝm ɗa tu, ''Gin nǝ gǝŋ jom jomni kǝ Cogn.'' ¹⁰ Mǝ motsǝ gaaman a ken yasǝŋ wos mǝ mbuutǝ, beɗ tǝ gi a wullǝm tu, ''Ɓak fi gin hŋ! Mǝ nǝ mon ɗaŋ kyan tǝ yestǝ wa gyo ɗaŋ citǝ tlyaaghǝn dulgam Yesu. Mbuu Cgn, durghǝ tlyaaghǝn zha dulgam Yesu nǝ zhipti ghǝ konngǝn jaan.'' ¹¹ She Mǝ yel tsogn gaami a ɗǝrǝi, she Mǝ yaal ɗa ɗan pǝrshi fyali won ɗa. Gyo ɗaŋ ca kikartǝ ca cimtǝ tu murghǝ caaghǝn raa tǝ jom jomi. Tǝ jomi ǝn mǝn ɗǝǝlghǝn vi ca nger manndǝ. ¹² Yir wos cin ɗaŋ riisǝŋ wuɗ, a gaam wos citǝ woŋ gaam monnda. Citǝ sǝm nǝ dlyaaɗkǝn a gaam wos tu gon a yisǝŋ hŋ she yan ngǝtnwos. ¹³ A ca luu yo ɗaŋ ta ca tǝ a voraŋ, Sǝmwos ca cimtǝ tu gǝŋngǝ Cogn. ¹⁴ Mǝn manndǝ gaami tǝǝ ta ya laaɓ tǝ tǝ pǝrshi fyali, taa ca lǝŋsǝ ɗi ndarara, fyalaŋshi coɓ coɓ. ¹⁵ A vi wos gita pele pele gyo ɗaŋ a dzak usuli, ɗaŋ wo fi guŋndǝ ɓashi tǝ ɗakkǝn. wo dǝǝlshi vi mǝn taŋ taŋ tǝ loŋsǝ Cogn ɗaŋ a moɓ ɓurughǝi. ¹⁶ Citǝ sǝm nǝ dlyaaɗkǝn a luuwos: ''Guŋngǝ guŋsǝ tǝ Daadǝnngǝ Daadǝnsǝ.'' ¹⁷ Mǝ yel zhipti shinngǝnngǝn Cogn a dlǝǝrghǝn a dzaŋ. A cim tǝ yer vari nǝ ɓurukbyetli ɗaŋ ca tlǝǝɗ gaami, ''Man, jwaamǝn lǝǝɓ namboŋ duryo tu dǝllǝ belak Cogn. ¹⁸ Man nǝn a cin tluu ghǝ mun var mǝn manndǝ, tluughǝ zaar var, tluughǝ pǝrshi tǝ mǝn kilarghǝn wasǝŋ, tǝ tluughǝ ɓuruk zarsǝ, kaɓ mǝn sǝrghǝde tǝ monsǝ, kusǝŋshi tǝ mǝn vartǝ.'' ¹⁹ Mǝ yel vartǝ tǝ guŋsǝ ghǝ ɗǝgn tǝ mǝn manndǝ wasǝŋ. Tǝǝ ta jwaamshi tu tǝ nda manndǝ tǝ mǝn kilarghǝn pǝrshi tǝ mǝn manndǝ wos. ²⁰ Mǝn vartes tǝ ta nyomshi tǝ mǝn shinngǝn Cogn kǝ mberni gya gyo ɗaŋ caa zhiɗ a ken wos. Tǝ ngǝtn zhiɗkǝnnes a kaɓ gya gyo ɗaŋ taa kaɓ ngǝtn zhiɗkǝn kǝ mǝn vartes tǝ gya gyo ɗaŋ caa mbuu ngǝtn ɗaŋ tǝǝ tlyaɗ. Mbǝtlǝm wasǝŋ tǝǝ dlaa shi washi gwaam a giɓ wuɗ va va. ²¹ Ɓanci wasǝŋ tǝ tlyaashi washi tǝ gita yo ɗaŋ a mbwaaɗi a vi ghǝn kilarghǝn pǝrshi. Ɓuruk yetli tǝ ci tluu wasǝŋǝi.