¹ A kaar ngǝshi gya gin she mǝ ta yel zhipti shinngǝn Cogn gon ɗa caa shi ghǝn ɗi gaami. A ta yi tǝ vartǝ monda, she ɗǝŋ a ta yaali tǝ zǝnzǝni wos. ² A ta wul vii tǝ yer tlyaa -tlyaa tu," Aa nɗaaɗi aa nɗaaɗi,Babila dǝllǝ yatl ! Aa nai nǝ lǝǝb tdǝnnghǝn ghǝ mǝndǝŋsǝ,lǝǝb waadkǝn ngǝ kusuŋsǝ zhipti, lǝǝb waadkǝn ghǝ kusuŋsǝ yetli tǝ yetli yo ɗaŋ nǝ ngǝtn nyaŋ. Duryo tu zaarsǝ ɓuruk taa tlyaa zha dlaar ndu dǝn ghǝ ɓǝllǝ wos. ³ Guŋnsǝ kǝ ɗǝŋ ɗeɓad taa fi mbǝllǝ cimtǝ. Mǝn tu ghǝn ɗǝngǝn taa fi tughǝni tǝ vartǝ ngǝ tsǝnngǝn ɓǝnndǝmi wos. ⁴ She mǝ ta wum yeri gon ata wul ɗi gaami ɗa tu,"Zaarsan nywallǝn ni ɗi ɓastǝ ,durghǝ tu aa fi kusuŋsǝ ngǝtn ɗaŋ goshi hǝŋ durghǝ tu kuskǝ duur yi ɗaŋ wo tu tǝ,tǝ tukiɗaŋ hǝŋ. ⁵ Kusuŋsǝ ngǝtn wos ta jwaam tǝ lǝǝd hal gami. Cogn caa ɓitalghǝn tǝ kusuŋsǝ laa wos. ⁶ Fin tǝ mǝn ɗaŋ gyo ɗaŋ a fi gya gon mǝǝn,sularǝn tǝ mǝn kaŋɗi mbǝtlǝŋ nǝ ngǝtn yo ɗaŋ a ɓur,mburǝntǝ mǝǝn kaŋɗi mbǝtlǝŋ. ⁷ Ɗaŋ gii ɗaŋ a zǝkkǝ gamashi ,tǝ tsǝnngǝn bukshug-bukshugi, firǝn tǝ forǝm tǝ raa ghǝ ji cik. Duryo tu a wull a raa wos tu,"Maa tsǝdni ɗaŋ gǝɗi guŋ, minǝ gǝd yo ɗaŋ turwos aa mǝǝshi hǝŋ ,ma waa mitsǝ hǝŋ ko njwaan. ⁸ Nǝ gii dzaŋ namboŋ buŋgǝn wos wo man tǝ mǝǝn mǝskǝni, mitsǝ tǝ kusuŋ bed.Wuud kǝn wo gǝǝm tǝ, durghǝ Daadǝn cognǝŋ cinǝ murghǝ ɗǝǝlgǝn vii wos." ⁹ Guŋsǝ ɗǝgǝn gya gyo ɗaŋ tǝ fi mbǝllǝ tǝ yaan, hal tǝ gaa tǝpmi cimtǝ ,ta ngwaar nǝ yaan tǝ ɗughǝn riŋ ǝŋ ya yel yaŋ gǝǝm ghǝn wos. ¹⁰ Ta dlǝǝrɗi ɗoŋngai ciyi ci vǝrtǝ buŋngǝn wos ,ci yi wultu, " Katco, katco Babila dǝllǝ yatli, Babila dǝllǝ yatl murghǝ vartǝ ! Durghǝ yo tu akili namboŋ ngerghǝn viiwaa a man." ¹¹ Dǝllǝŋsǝ mǝn vǝǝn ghǝ ɗǝŋ ta ngwaar tǝ raa ghǝ ji nǝ duru wos ɗaŋ gon ca man ɗiɓ ngǝtn ɗiɓarghǝn wos ɗa hǝŋ. ¹² Ngǝtn ghǝ ɗibarghǝn ghǝ jinari tǝ azurfa tǝ puus ndarani tǝ linin lub-lub ,tǝ kǝ skalet,tǝ siliki,tǝ kǝ zheli tǝ gyaa ŋamtsǝyo ɗaŋ caa zhoŋ dlǝǝrǝŋ-dlǝǝrǝŋ ,tǝ ngǝtn yo ɗaŋ tǝ com tǝ ŋamtsǝ ndarani ,tǝ dwaam zheli tǝ zhak dwaam tǝ puus yo ɗaŋ ca tlaa kal-kal, ¹³ tǝ kirfa, tǝ gya ngǝtn ngǝ barkunda tǝ ngǝtn ghǝ zhoŋngǝn dlǝǝrǝŋ-dlǝǝrǝŋ ɗaŋ caa gǝǝm ni, tǝ murr tǝ lubban,tǝ zhak darndu dǝn, tǝ mirr, tǝ nyobtǝ alkama, tǝ alkama, tǝ galtsǝ, tǝ tǝpmsa,tǝ gya pǝrshi ,tǝ gya keke pǝrshi, tǝ monsǝ tǝ gya taa ghǝ zaarsǝ. ¹⁴ Gya ngǝtn yo ɗaŋ kǝ gha raa ghai tǝ tlyaaghǝn wa ɓuruk taa nywali ɓuruk tǝ gaa ghǝ. Zǝkken wa tǝ tsǝnghǝn bukshuk -bukshuki wa taa ɓani, ka man tushi ɗa hǝŋ nzard. ¹⁵ Dǝllǝŋsǝ mǝǝn vǝǝn ngǝ ngǝtn ghǝ ɗiɓarghǝn gya gin ɗaŋ tǝ fi tungǝn a te ɓastǝ ,ta dlaar vii ɗi ɗoŋngai tǝ yaan,nǝ durghǝ vǝrtǝ ngǝn buŋgǝn tǝ ngwarghǝn tǝ gǝǝm ghǝn riŋngǝ raa ji. ¹⁶ Ta wul tu,"Katco, katco dǝllǝ yatl yo ɗaŋ aa caa luu linin lub luɓi tǝ luu zheli zǝrǝŋ-zǝrǝŋ ɗaŋ a fi tlǝɓǝr wos ɗi tǝ jinari tǝ puus kalkal. ¹⁷ Akili namboŋ tughǝn gii ɓuruk ta malari" Ɗeɓad mǝni kilarghǝn zhirgi zha tǝ mǝǝn shiighǝn ɗa zhirges tǝ ɗeɓad tǝ mǝni yo yo ɗaŋ caa tu ngǝtn dǝŋ wasǝŋ a zha ,tǝ dlǝǝr ɗi ɗoŋngai . ¹⁸ Tǝ ta ngwaar akili yo ɗaŋ tǝ ta yel yaŋ gǝǝm ghǝn wos ɗi.Tǝ ta wul tu,"Yatl wonda ɗaŋ dǝllǝ yatliya?" ¹⁹ Tǝ dlaa gud gud a gam wasǝŋ,tǝ ngwaar tlyaa tlyaa,tǝ riiŋ ghǝ raa jii ci yi wultu, "Katco,katco dǝllǝ yatlǝn ɗaŋ ɓuruk mǝǝn kilarghǝn zhirgi zha tǝ fi tughǝn tǝ tughǝn wos, durghǝ tu a kili namboŋ tǝ malartii." ²⁰ Tǝ polki ɗa a te kyani tsoŋvon, laa ghǝ Cogn tǝ mǝn shinghǝn Cogn,durghǝ tu Cogn aa lǝǝr ngyerghǝn vii waan ɗi a dul gamashi." ²¹ Dǝllǝ zhipti shinghǝn Cogn won ambi puus won ɗaŋ vuun , a kur gib zha var, ca wul tu,"cik ken Babila, dǝllǝ yatli ,ta kurtǝ yatl tǝ tlyaaghǝn ta man yetlǝ ɗa hǝŋ bed. ²² Tǝ wum yer ghǝ mǝn vuudkǝn busaŋɗi tǝ mǝn vuudkǝn mwari a gibi wa ɗa hǝŋ. Ta man tu murghǝ laa taas won a gibi waa ɗa hǝŋ. Ta wum nyighǝn vuun a gibi wos ɗa hǝŋ. ²³ Lǝǝb yali ngǝ fitila wo man yaal a gibi wa ɗa hǝŋ. Ta man wum yer ghǝ gya gǝd muri tǝ turwos a gibi wa ɗa hǝŋ, durghǝ tu mǝn tughǝn wa yaŋshi ngǝn ci mǝǝri mǝǝn guŋndǝ ɗǝŋ, tǝ zuŋ waa ngǝn kǝ mor mǝn ɗǝŋ. ²⁴ A gibi wos ǝŋ tǝ tu voraŋ ghǝ mǝn shinnghǝn Cogn tǝ kǝ mǝn caaghǝn raa,tǝ voraŋ ɓuruk mǝn yo ɗaŋ tǝ tlaa a dǝŋ.