¹ Namboŋ a giɓkǝ zhipti shinngǝn Cogn wattsǝmai cigha ngaɓkǝn gya koɗ wattsǝmayi a man wullǝm tu, ''Man, ma zhiɗkǝ ngyerghǝn vi ghǝ dǝllǝ gǝɗ murghǝ mbǝllǝi mǝn gyo ɗaŋ ca tsǝtn a dulghǝ gya zha monndai. ² Tǝ yan ǝŋ guŋsǝ ɗǝgn tǝ fi mbǝllǝ. Tǝ zhak darndu dǝnwos kaɓkǝ mbǝllǝ ǝŋ ca man tsǝtnngǝn ɗǝgn tǝ ɗǝǝmigha. ³ She zhipti shinngǝn Cokes mbimi a giɓkǝ zhipti tlǝrmi ndǝǝr, she mǝ yel gǝɗ cigha tsǝtnngǝn a dul tluuŋsǝ zheli gyo ɗaŋ cinǝ yugnngǝn tǝ sǝmndǝ kǝ kyamaskǝn. Tluuŋshes citǝ gaam wattsǝmai tǝ nyeri dzuɓ. ⁴ Gǝɗes aa ta ca lǝŋsǝ purnyi tǝ kǝ zheli, ndǝr ca lǝŋsǝ ndarani kǝ ngǝtnngǝn zinariya, tǝ gya puus kǝ mbuuni, tǝ logha logha. Aa ta ngaɓ koɗkǝ zinariya a taas wos, nǝ yugnngǝn tǝ gya ngǝtn nyaŋ, tǝ gya mǝǝki ghǝ mbǝllǝ wos. ⁵ Taa ta dlyaaɗ sǝǝmw won a gamken wos tǝ de wos nǝ waaɗi: ''Dǝllǝk kǝ Babila, nagtǝ ghǝ mǝn mbǝllǝ tǝ gya ngǝtn nyaŋ kaɓkǝ ɗǝgn.'' ⁶ Mǝ yel gǝɗes a nyii tǝ voraŋngǝ mǝn caaghǝn raa tǝ voraŋ mǝn laa durghǝ Yesu. Ɗaŋ Mǝ yeltǝ, A ta kosarmǝ mbuun mbuun. ⁷ Beɗ tǝ gi zhiptu shinngǝn wullǝm tu, ''Ni kosarghe? Ma fuughǝ de ghǝ gǝɗes tǝ kǝ mǝn vartes ɗaŋ ca mbites, mǝn vartes ɗaŋ citǝ gamtsǝ wattsǝmai tǝ nyeri dzuɓ. ⁸ Mǝn vartǝ gi kǝ yel a mǝshi, aa mǝs ɗaŋnin hŋ, beɗ tǝ durghǝ gi ɗaŋ wo man a giir won shoŋ shoŋ. She wo tlii bǝ wuughǝn. Gya gyo ɗaŋ cigha tsǝtnngǝ a ɗǝgn, gya gyo ɗaŋ sǝm wasǝŋ nǝ dlyaaɗkǝn a giɓkǝ tagarta ghǝ raai hŋ ɓanndǝŋ daaɗi ghǝ ɗǝgn taa yel ngǝtnngǝ kosarghǝn ǝŋ caa yel nǝn vartes ɗaŋ tǝǝ nǝǝshi, taa mǝǝs ɗaŋnin hŋ, beɗ tǝ gi wo ɗyaghas mannǝ ni. ⁹ Gin cim nǝ raa yo ɗaŋ citǝ saghaɗkǝn. gaamsǝ wattsǝmai cinǝ danndi wattsǝmai gyo ɗaŋ gǝɗes caa tsǝtnngai. ¹⁰ Cikkǝn guŋsǝ wattsǝmai. Nanndam taa ndaaɗi, namboŋ mǝshi, she ɓances tǝ man; wo naa ni kǝ mbuɗkǝn njwaatn. ¹¹ Gya ɗaŋ a mǝshi, beɗ tǝ gi a mǝs ɗaŋnin hŋ, yan gamas nǝ guŋ kǝ tantanniya; beɗ tǝ gi ci namboŋ a giɓkǝ guŋsǝ wattsǝmaiyi, wo wuushi washi. ¹² Nyeri dzuɓes ɗaŋ kǝ yelli nǝ guŋsǝ gya gyo ɗaŋ taa daɓ tǝ kaɓ guŋndǝ hŋ, beɗ tǝ gi ta kaɓ vartǝ ɗaŋ guŋsǝ kǝ kili namboŋ tǝ mǝn vartes. ¹³ Gin nǝ kǝ ɓitalghǝn namboŋ, she tǝ vǝr tlyaaghǝn tǝ vartǝ wasǝŋ mǝn Vartes. ¹⁴ Taa shisher manndǝ a dulgam ŋaa tiim. Beɗ tǝ ŋaa tiimes wo tlyagam wasǝŋǝi duryo tu cinǝ Daadǝnngǝ daadǝnsǝ tǝ guŋngǝ guŋsǝ tǝ yan nǝ gya gyo ɗaŋ tǝ cimshi, gyo ɗaŋ tǝ bwaashi, mǝn caaghǝn raa.'' ¹⁵ Zhipti shinngǝnnes wullǝm tu, ''Zhes ɗaŋ mǝ yelli, gyo ɗaŋ gǝɗ murghǝ mbǝllǝi ca tsǝtnngai, nǝ zarsǝ, gutuli, usuli, tǝ vii. ¹⁶ She nyeri dzuɓes ɗaŋ mǝ yelli, tǝ mǝn vartes ta nyaŋngas gǝɗ murghǝ mbǝlles. Ta surtǝ ɓyem nǝ muli, taa ɗuu dlii woshi, taa gǝɓti ɓuruk tǝ wuɗ. ¹⁷ Duryo tu Cogn a gǝm a raa wasǝŋ tu tǝ fi ngǝtn ɗaŋ ca suu tǝ kaɓkǝn tu tǝǝ vǝr vartǝ ghǝ guŋndǝ mǝn vartǝ she vik Cogn ya yughǝi. ¹⁸ Gǝɗes ɗaŋ kǝ yelli nǝ dǝllǝ yatl ɗaŋ cagha guŋndǝ a dul guŋsǝ ghǝ ɗǝgn.''