¹ Mǝ wum dǝllǝk yer won a wulɗi a dǝnngǝ Cognvon a wul zhipti shinngǝn Cognvon wattsǝmai tu, ''Nywalǝn a shin a dulghǝ ɗǝgn koɗ wattsǝmai kǝ raa malarghǝni kǝ Cognvon mǝn.'' ² Zhopti shinngǝn Cognvon kǝ keni a nyolɗi, a shin koɗ raa malarghǝn goshi a ɗǝgn, kusǝŋsǝ gyokɗi ɗaŋ caa cii wum wum, tǝ mbwaaɗi a zarsǝbgya gyo ɗaŋ tǝǝ yir ɓalaŋ kǝ naa ngaraŋki, yashi ɗaŋ caa mbuu zhipti woshi. ³ Zhipti shinngǝn Cognvon kǝ mbǝtlǝmi a shin koɗ kǝ koɗi goshi a dulghǝ dǝllǝk zha. Zhai naai nǝ voraŋ, gyo ɗaŋ a taa ɗaŋ voraŋ gya gyo ɗaŋ taa mǝǝshi, she koni ɗaŋ ca tsǝtn ɗa zhai a mǝshi. ⁴ Zhipti shinngǝn Cognvon kǝ mayes a shin koɗi goshi a gya laar tǝ gya lǝǝɓi gya gi ɗaŋ zha caa ɓuɗɗi ghai, she zhai ta naai nǝ voraŋ. ⁵ Mǝ wum zhipti shinngǝn Cognvon kaɓkǝ gya zha a wul tu, ''Kinǝ zaarghǝ zaari, kyanighǝn ki kǝ ndzǝkkǝnnes, nǝ duryo tu ka taa ɗǝǝl v ngǝrshi gya gin ni. ⁶ Nǝ duryo tu taa ta dlaa voraŋ mǝn yo ɗaŋ tǝǝ caa raai, tǝ gya mǝn shinngǝn Cognvon, ka vǝrshi voraŋ tǝ tlyaa gyo ɗaŋ a ndarashi ni mǝn. ⁷ Mǝ wum lǝǝɓ dlǝǝrghǝn ɗaŋ tǝ nal dǝnngǝ Cognvon, a suɗa tu, ''Eh, Daadǝn, Cognvon murghǝ moɓkǝn ɓuruk, ngyerghǝn vi waa ci taŋ taŋ jom jomi.'' ⁸ Zhipti shinngǝn Cognvon kǝ wuɓshes a shin koɗi goshi a dulghǝ dzaŋ, tǝ taa vǝr dzaŋi dǝǝl tǝ vaa, tǝ bulla zarsǝi tǝ wuɗ. ⁹ A taa bullashi washi tǝ kuskǝ vaghǝnnes she tǝǝ kemas sǝǝmngǝ Cognvon a buŋngǝn gya gin. Tǝǝ taa kaɓ ndaaɗkǝn wasǝŋ hŋ tǝ ndǝr tǝǝ zhimtǝ hŋ. ¹⁰ She zhipti shinngǝn Cognvon kǝ nanndames ta shin koɗi goshi a daan guŋndǝ kǝ naa ngaraŋkes, she yatl kǝ guŋndǝ wos taa diiɓi. She ci ŋas riisǝŋ wasǝŋ nǝ durghǝ wumngǝn ɗaŋ caa wumni. ¹¹ Tǝǝ kemas Cognvon ɗaŋ ci tsogn gaami, nǝ durghǝ gyokɗi wasǝŋ tǝ wumngǝn ɗaŋ caa wumshi, tǝ ndǝr saɗ ɗa tǝ nyom yatl nǝ ndaɗkǝn wasǝŋ nǝ ngǝtn yo ɗaŋ taa fi hŋ. ¹² Zhipti shinngǝn Cogn kǝ limes a shin kǝ koɗi goshi a dǝllǝ kǝ rupm Eparetishi. Zhak rupes taa dlui, kuŋǝi, nǝ duryo tu, tǝ ndǝr datǝpm gya guŋsǝ kǝ banndi gǝrshi mǝn ɗaŋ ta mbwaɗi ghai. ¹³ Mǝ yel kusǝŋsǝ zhipti mayi ɗaŋ caa yal ɗaŋ naɓoɓtak ɗaŋ caa nywalɗi a kǝ ɗǝragon kǝ naa ngǝraŋki tǝ kǝ mǝn shinngǝni Cognvon kǝ na mbyerni. ¹⁴ Yan tu cinǝ zhipti kǝ mǝnndǝŋsǝ gya gyo ɗaŋ tǝǝ fii balaŋ kǝ kosarghǝn. Cigha tlǝghǝn a gya guŋsǝ kǝ ɗǝgn ɓuruk tu tǝ jwaamshi woshi a lǝǝɓ namboŋi nǝ durghǝ manndǝ kǝ dǝllǝk dzaŋngǝ Cognvon murghǝ moɓkǝn ɓurughǝi. ¹⁵ (Yeli! Migha manngǝnɗi ɗaŋ mǝǝr! A mbaa yan gi ɗaŋ cigha gaaghǝn yir tǝ lǝŋsǝ wos ɗa dlii, nǝ duryi tu gon yel tǝ nǝ muli hŋ, kǝnnda tǝ yel tsǝtnngǝn wos nǝ ngǝtn ndzuutn hŋ.'') ¹⁶ Tǝǝ lǝǝrshi ɗi vi nanboŋ a lǝǝɓi gi ɗaŋ caa cimtǝ tu Amagyedon a vik Helinawa. ¹⁷ She zhipti Cognvon kǝ wattsǝmaiyes a shin kǝ koɗi goshi a yetsr. She dǝllǝk yer wulɗi a dǝnngǝ Cognvon tǝ daan guŋndu wos cigha wulghǝn tu, A ɓani.'' ¹⁸ She gya falaŋ tǝ tlaa kurvon tǝ ngur, tǝ byatlk ǝn falaŋ, yatl tǝ zhighǝɗi nǝ kushi monnda, zhighǝɗkǝn taacnoɓ ko gyo ɗaŋ taa yi fi tun ɗaŋ tǝ ndǝr zaar a dulghǝ ɗǝghǝn, zhighǝɗkǝnni gin taa yi nǝ vari monnda baɗ baɗ. ¹⁹ Dǝllǝk yatli taa ɓǝǝli ɗǝni mayi she yatl kǝ mǝn yo ɗaŋ nǝ mǝn Yaduda hŋ tǝǝ taa kwaaɓi. She Cognvon taa ɓital tǝ dǝllǝk yatl Babila, she a vǝr tǝ koɗes ɗaŋ nǝ yugnngǝn tǝ zhak darndu dǝn kǝ tlitiyer wos ²⁰ Ko ŋaa yatli gyo ɗaŋ nǝ ngyirǝŋngǝn tǝ zha a taa malu, gon ta man yel gya wuur ɗa hŋ. Dǝllǝŋsǝ guruŋsǝ shomndi tǝ shiiɗi gaami ɗaŋ laaɓjǝni wasǝŋ a fi ɗaŋ talenti tǝ ndaaɗi a dulghǝ zarsǝ. ²¹ Tǝǝ kemas Cogncon nǝ durghǝ kuakǝ buŋngǝn kǝ guruŋsǝ shomndes nǝ dur yo tu buŋngǝnnes taa yi nǝ kushi monnda.