¹ A ɓanngǝnes, yestan tǝ polkia Daadǝn. Mǝ dlyaaɗki ngǝrshi gya gin mǝnɗa wo na nǝ ngǝtnngǝ vuughǝni won ɓasǝm monnda hŋ. ² Ngǝrshi gya gin ǝŋ ta lyaaki wani. Ɗaghǝnɗa tǝ kadaŋshi. Ɗaghǝnɗa tǝ mǝn kuskǝ laa. Ɗaghǝnɗa tǝ kusǝŋsǝ mǝn mbyerni. Nǝ duryo tu myaani gom ta sǝrǝmi wopi. ³ Myani ghuŋ mya mbuu tǝ zhipti var Cogn. Ɗughǝn gǝǝɓ wopm yinǝ gha Yesu ɓorghǝn kǝ Cogn mǝ yir caaghǝn raa a dlii hŋ. ⁴ Ko ɗaŋ tu myani gaman mi tǝ ɗuughǝn gǝǝɓ a dlii. Ǝŋ yan gon won wo ɗuu gǝǝɓ a dlii, myani mǝ moɓtǝ. ⁵ Tǝ sǝrǝm a mbuɗkǝnetn kǝ tantan, a mǝn Isar'ila, usuli ghǝ Bilyaminu, zaar ghǝ Yahudawai; a te mǝn mborki nǝ mǝn Farisawa. ⁶ A re suughǝn taas ɗa ma motsar mǝn laaɓkǝn mǝn. A te durghǝ zaar ghǝ zaari a te mborki, mi tǝ lǝǝɓ verghǝni hŋ. ⁷ Beɗ tǝ gi ngǝshi gya gini ɗaŋ nǝ tughǝni ɓasǝm, mǝ sularshi tu mǝ ndaakǝni ɓasǝm a bamvi ngǝtn won hŋ nǝ durghǝ ɓorghǝn kǝ Cogn. ⁸ Yi cik, jomi mya kwaan ngǝrshi gya gini ɓuruk a bamvi ngǝtn won hŋ, nǝ durghǝ yisǝŋngǝn Ɓorghǝn kǝ Cogn Yesu Daadǝnatn. Nǝ durwos ǝŋ mǝ naa ngǝtii ɓuruk. Mǝ sular shi nǝ ngǝtn won hŋ nǝ duryo tu mǝ lǝǝrshiɗi a ɓorghǝn kǝ Cogn, ⁹ tǝǝ tum ɓastǝ. Mitǝ gyal ghǝ gaman won hŋ a te kǝǝɓ ɗǝǝlghǝn vi. Nǝ durghǝ gi, mi tǝ gyal a te caaghǝnni raaghǝ ɓorghǝn kǝ Cogn, gyal yo ɗaŋ yinɗi a Cognvon a te caaghǝn raa. ¹⁰ Ɗaŋngǝnni mya suu mǝ yisǝŋtii tǝ vartǝ ghǝ shishighǝn wos tǝ rapari a giɓkǝ buŋngǝn wos. Mǝ naa ɗaŋ yani a te lǝǝɓ mǝskǝni wos, ¹¹ Nǝ duryo tu ko yinǝ wuri mǝ tuli a giɓkǝ mǝn shingǝn ɗi a mǝn mǝskǝni. ¹² Yin tu man tu ngǝrshi gya gini hŋ, ko ma naai nǝ yugnngǝni hŋ. Beɗ tǝ gi ma caa gaman ngai nǝ yo tu mǝ goɓ ngǝtn yo ɗaŋ ɓorghǝn kǝ Cogn Yesu a goɓɓǝmɗi nǝ durwos. ¹³ Yestatn, ma mbii tu ma goɓɓi ɗi gham hŋ. Beɗ tǝ gi ngǝtn won ɗa namboŋ ɗaŋ mya fi laa ca malǝm tǝ ngǝtn yo ɗaŋ yi kaar, mya caa gamatn tu nǝ tlǝghǝn nǝ ngǝtn yo ɗaŋ yi ken. ¹⁴ Mya vaa gamatn tu mǝ tu dei ghǝ tughǝn ɓakmi fyaali kǝ cimngǝn Cognvon a giɓkǝ Yesu ɓorghǝn kǝ Cogn. ¹⁵ Myani ɗaŋ maa luuɗi, she mǝ ɓitalmi a te tǝpi gini, ǝŋ kya ɓitalki a ngǝtn won mari, to Cognvon wo zhiɗki ghai a gini. ¹⁶ She tu, lǝǝɓ yo ɗaŋ ma tuli ghai, mǝǝ dlǝrǝnngai cik. ¹⁷ Naan nǝ mǝn kuɓkǝn ngǝtn ɓasǝm.. mǝn wopm. Paŋghǝni a yeli ndara gya gini ɗaŋ caa rii ɗaŋ mǝ nani ngǝtn kuɓkǝni ɓaski. ¹⁸ Zarsǝ monnda cigha righǝni, yanshi ghuŋ mǝ fuuki vi wusni wasǝŋ ɗaŋngǝni mya fuuki hal tǝ zhelǝm ɗaŋ murghǝ nyaŋngaskǝn ghǝmmbǝli ɓorghǝn kǝ Cogn. ¹⁹ Ɓanci wasǝŋ nǝ datsǝghǝni. Nǝ duryi tu waar wasǝŋ nǝ vwa wasǝŋ, mbitǝgaam wasǝŋ nǝ yan nǝ ndzuun ɓashi. Ɓitalghǝni wasǝŋ yi ni gha dulgamngǝ ngǝtn ɗǝgn. ²⁰ Beɗ tǝ gi laa wopm ɗaŋ mya fi gami, ɗani ǝŋnnda mya sǝǝkǝǝm murghǝ kaɓkǝn wopm, Daadǝn Yesu ɓorghǝn kǝ Cogn. ²¹ Wo sughǝɗ dlii wopi kǝ mbutarghǝn raai ndǝrtii ɗaŋ dlii ghǝ mbuuni wos, ndǝrghǝn yo ɗaŋ yi tǝ tlyaaghǝn vartǝ wos, ɗaŋ a sular koni ɓastǝ.