¹ Ǝŋ yan ngǝtn tlyaaghǝn moɗwon ɗa a gi ɗaŋ nǝ Ɓorghǝnni, ǝŋ yan ngǝtn mbutarghǝn raa wonɗa ɗaŋ yiɗi a suughǝn wos, ǝŋ yan raapari ɗa a zhipti, ǝŋ yan yelghǝn gwanndǝ mbuun mbuun tǝ yisǝŋngǝn yelghǝn gwanndǝ ɗa, ² she a ca polghǝnnetn tǝ yughǝi tǝ ɓitalghǝn ɗaŋ, tǝ suughǝn nǝ ngǝtn namboŋǝi, mǝ naai namboŋ a zhipti, tǝ de namboŋ. ³ Fi ngǝtn tǝ suughǝn gaam hŋ ko a luu gama hŋ. A bamves shilarghǝn gaam yel konu ɗaŋ tu a moɓkǝ. ⁴ Gon wan tǝ vuu nǝ gamas kurum hŋ, beɗ tǝ gi hal tǝ vuughǝn gya gon beɗ. ⁵ Ɓitalǝn ki a tǝpm gyo ɗaŋ ata yigha Ɓorghǝn kǝ Cogn Yesu. ⁶ A tsǝtnngǝn wos a taa nǝ ni Cogn, beɗ tǝ gi a mbi gamas ɗaŋ Cognvon ko nǝ ngǝtn won ɗaŋ wo dlǝǝr ghai hŋ. ⁷ A bamvi gi, a mbi gamas nǝ ngǝrshi gon hŋ. A mbi gamas ɗaŋ mon. A mbwaaɗi a saighǝ zarsǝ. Tǝǝ yeltǝ ɗaŋ zaar. ⁸ A ta mbutar gamas ndǝr naai nǝ murghǝ wumngǝn kǝǝm hal a kili ghǝ mǝskǝn, hal tǝ cik mǝskǝnngǝ ghǝmmbali! ⁹ Tǝ cik beɗ Cogn a ta zhim tǝ mbuun mbuun. A vǝr tǝ sǝǝm yo ɗaŋ a moɓ ko sǝǝmi gyo. ¹⁰ A fi gin nǝ durghǝ tu sǝǝmngǝ Yesu ko gamvoraŋnyi gyo tǝ zuuɓ tǝ mǝn, beɗ tǝ gamvoraŋngǝ gya gyo ɗaŋ ci tsogn gaami tǝ kǝ daɗ yatl tǝ ɗǝgn. ¹¹ A fi gin tu ko risǝŋǝi gyo wo kon tǝ viwos tu Yesu yan cin Ɓorghǝnni kǝ Daadǝn, nǝ zhimngǝnngǝ Cognvon Daawopm. ¹² Tǝ cik, gya naa suughǝnetn ɗaŋ gyo ɗaŋ kyaayi laaɓi, finǝn ɗaŋ gi ɗaŋ kyaayi fi nǝ kǝ yo tu she a kenan hŋ, tǝ gi ɗaŋ tǝ moɓ a kili yo ɗaŋ miɗa ɗan, finǝn laaghǝ vuumngǝn waan tǝ vǝrtǝ tǝ zhazhak. ¹³ Nǝ duryo tu nǝ Cognvon ǝŋ nǝ gyo ɗaŋ cigha laa a dlei waan finǝn ɓitalghǝn waan tǝ fighǝn laa yo ɗaŋ wo tatǝ. ¹⁴ Finǝn ko ngǝrshi gyo tǝ mbolghǝn tǝ sǝǝɗkǝnyer hŋ. ¹⁵ Finǝn laa a tǝpm yo ɗaŋ kaa naai tǝ mǝŋ hŋ tǝ gyo ɗaŋ taa tlyavwa woshi, mǝri ghǝ Cogn ɗaŋ citǝ mǝŋ hŋ. Righǝn waan tǝ naai ɗaŋ zhiɗkǝn ɗaŋ lǝǝɓ yaali ɗa ɗǝki, a dleighǝ kusǝŋsǝ zarsǝ tǝ wusuli gin. ¹⁶ Ngaɓǝn vik kǝ raai mbuun mbuun nǝ duryi tu mǝ tu de ghǝ zhimngǝn a dzaŋngǝ Ɓorghǝn kǝ kǝ Cogn. Nǝ duryo tu ɗaŋnin ma yisǝŋǝi tu mǝ kiir a ɓenndǝmi ko mǝ fi laa a ɓemi hŋ. ¹⁷ Beɗ ɗaŋ tu ǝŋ mya nyol guo ɗaŋ avǝr gamas nǝ gya gon nǝ laaghǝ caaghǝn raa, a polǝm, a ndǝr polǝm ɓaski ɓuruk. ¹⁸ Daɓak tǝ polki cik ɗaŋ, tǝ polki ɓasǝm. ¹⁹ Beɗ tǝ gi mya caaraa a Daadǝn Yesu tǝ shin Timoti ɓaski kyaaɗ, nǝ duryo tu ma naai beɗ tǝ tlyaghǝn moɗ a kili yo ɗaŋ mya wum ngǝtn a dulgamawan. ²⁰ Duryo tu mitǝ gon ɗaŋ raavwos maan daɓak ɗaŋ gos hŋ, gyo ɗaŋ jom jomi caa wum kusǝŋ waan. ²¹ Nǝ duryo tu caa ŋalni ngǝtnngǝ gya suughǝn raa wasǝŋ, ɓak nǝ ngǝtnngǝ Yesu gi ɗaŋ nǝ Ɓorghǝnni hŋ. ²² Beɗbtǝ gi ka yisǝŋ zhimngǝn woshi nǝ duryo tu ɗaŋ gyo ɗaŋ ŋaa ca fi laa dagos mǝn, cikkǝn a fim laa mǝn a vik wusni. ²³ Tǝ cik mya caa raa tu ma shin tǝ kyaaɗ ǝŋ mya yel ngǝtn caa riinǝm mǝnni. ²⁴ Beɗ tǝ gi mitǝ raa feɗi a Daadǝn tu myan tǝ gaman ɗaŋ wo nga laa hŋ ma man kyaaɗ ɗaŋ. ²⁵ Beɗ tǝ gi mya ɓital tu yin ciɓ mǝ sular Abafaroditus ɗi ɓaski. Cinǝ yesatn tǝ kaman a laa tǝ kaman a laaghǝ mǝn manndǝ, tǝ mon wa kǝ murghǝ shinngǝn nǝ gaman. ²⁶ Duryo tu atavnaai tǝ buŋngǝn mbuun mbuun, tǝ a wum kusuŋ tǝ tsǝtnngǝn tǝ myaani ɓuruk, duryo tu kǝ ta wum tu ca gon. ²⁷ Duryo tu jom jom a ta ya gon mbuun mbuun ɗaŋ tu wo mǝsni. Beɗ tǝ gi Cogn ta yel gwanndǝ wos, nǝ gamas kurum hŋ, beɗ tǝ gi hal tǝ myan, nǝ durghǝ raa jii tǝ ɗuum a raaghǝ jii hŋ. ²⁸ Tǝ cik mǝ moɓ suughǝn shinngǝ wos, nǝ duryo tu ǝŋ kyaa yel tǝ saɗɗa wo polki ghai tu mǝ nyolu a giɓkǝ raaghǝ jii. ²⁹ Kaɓǝn Abafaroditus a giɓkǝ Daadǝn tǝ polghǝn ɓuruk. zhimǝn zarsǝ ɗaŋ yan. ³⁰ Duryo tu ata yin a durghǝ laaghǝ gi ɗaŋ nǝ Ɓorghǝnni tu a ta maan mel mǝskǝn. A ta vǝr gamas nǝ duryo tu yugnngar ghǝn laa yo ɗaŋ a ndara kyaani ǝŋ kii fim mǝn.