¹ Bulus tǝ Timoti, monsǝ ghǝ Yesu ɗaŋ nǝ Ɓorghǝnni, tǝ ɓuruk gya gyo ɗaŋ cinǝ warghǝn a Yesu yan ɗaŋ nǝ Ɓorghǝnni gyo ɗaŋ ci Filibi, tǝ gya mǝn yalghǝn ɗa mǝn laaɓkǝn tǝ gya Dikon. ² Ganǝn gyal tǝ naa tǝ mbutarghǝn raa a Cogn Daadǝn Yesu ɗaŋ nǝ ɓorghǝnni. ³ Mǝ nyar Cogn mǝn nǝ ɓitalghǝn nǝ kyaani. ⁴ Ngeɗ ngeɗ a karaghǝn nǝ dur wanɓuruk, tǝ polghǝn ǝŋ mǝ fi karanatn. ⁵ Mǝ nyar nǝ rapari wan a vik wusni ɗi a daɗi dzaŋ hal ɗaŋngǝnnin. ⁶ Mǝ tǝ raa feɗi a ngǝrshi gya gin, tu guo ɗaŋ ya nguɓ laa mbuni wo ciken ngai hal dzaŋ kǝ Yesu ɗaŋ nǝ Ɓorghǝnni. ⁷ Yiɗa giri mǝ wum cik a te tǝpi gin nǝ dulgamngǝ kyaani ɓuruk nǝ duryi tu mǝ yir ki a raatn. Ɓuruk kyaani kinǝ mǝn laatn a lǝǝɓ namboŋyi a giɓkǝ gyalghǝ Cogn a naɗkǝnnǝn tǝ Coɓkǝn gaman tǝ dlǝrghǝn ɗa nǝ vi wusni. ⁸ Duryo tu Cognvon ǝŋ nǝ murghǝ tlyaaghǝn zhatn ɗaŋ gyo ɗaŋ mya wum kusǝŋ waan ɓuruk a giɓkǝ suughǝn raa ghǝ yan ɗaŋ nǝ Ɓorghǝnni. ⁹ Migha karaghǝn gin: tu suughǝn waan wo ciken monnda a giɓkǝ yisǝŋngǝn ɓuruk. ¹⁰ Mya kara Cogn nǝ cik tu duryo tu a ɓaraŋ a yel a paŋ gya ngǝtn yo ɗaŋ a moɓ ndaraghǝn, nǝ durghǝ cik kaa naai tǝ jom jomni tǝ maalghǝn hŋ a dzaŋngǝ Yesu ɗaŋ nǝ Ɓorghǝnni. ¹¹ Mya kara Cogn tu kyaani ma ɗaŋ a yughǝi tǝ lǝǝɗkǝnngǝ mbuuni yo ɗaŋ a mbwaaɗi a te ghǝ Yesu ɗaŋ nǝ Ɓorghǝnni, nǝ zhimngǝn tǝ luughǝnngǝ Cogn. ¹² Ɗaŋngǝni mya suu tu a yisǝŋǝi.. gya yesatn tu ngǝtn yo ɗaŋ a tum tǝ naai nǝ dei ghǝ cighǝn ken ngǝ vik wusni. ¹³ Nǝ durghǝ gi, maraŋngusatn kǝ yan ɗaŋ nǝ Ɓorghǝnni ta taa yisǝŋǝi a ko te ɗo a mǝn manndǝ tǝ ko zaari guo beɗ. ¹⁴ A monnda gya yesatn citǝ raa feɗi shoŋ shoŋ a giɓkǝ Daadǝn nǝ durghǝ naghǝnnetn tǝ cik citǝ raa feɗi tǝ nyolɗi tǝ kon vik Cogn tǝ vǝrtǝ hŋ. ¹⁵ Jomi gya gon cigha wulghǝn vi a dulgam yan ɗaŋ nǝ Ɓorghǝnni a giɓkǝ kashi tǝ wultlǝŋngǝnni, kǝ gya gon wasǝŋ yin a ɓitalghǝn ndarara. ¹⁶ Ɗa saɗɗa tǝ fi a giɓkǝ suughǝn, tǝ yisǝŋngǝn tu tǝ gǝm ɗuun nǝ dlǝrghǝnɗa nǝ dulgam vik wusni. ¹⁷ Beɗ tǝ gi zarsǝ kǝ kaari tǝ kon vik wusni kǝ yan ɗaŋ nǝ Ɓorghǝnni a giɓkǝ suughǝn dlii, tǝ jom jomni hŋ. Taa gaatǝ tu taa gǝm a giɓkǝ buŋngǝn, a kili yo ɗaŋ mǝ ta yinǝ naɗkǝni tǝ maraŋngusa. ¹⁸ She ǝŋnda nǝ nii? ko a datǝpi gyo.. ko a fin ɗa ko nǝ jom jomni, caa wulni vi dulgam yan ɗaŋ nǝ Ɓorghǝnni, ca polǝmngai a gin !Eh, wo polǝmngai, ¹⁹ duryo tu ma yisǝŋǝi tu gin wo naai nǝ fuuɗkǝn a tǝpmngǝ gya karaghǝn Cogn tǝ somngǝn ɗa lǝ zhiipti ghǝ Yesu ɗaŋ nǝ Ɓorghǝnni. ²⁰ Yinnga tǝpmngǝ gaghǝn yiratn woti woti tǝ caaghǝn raatn wo naam mǝn nǝ ngǝtnngǝ ndzutn hŋ ko njwatn tǝ cik tǝ ɓuruk raa feɗi.. ɗaŋ ko a kili gyo yan ɗaŋ nǝ Ɓorghǝnni wo naai tǝ luughǝn a dletn, ko naa ɗa gwaam ko mǝshi. ²¹ Duryo tu myan ɓasǝm raai nǝ yan ɗaŋ nǝ Ɓorghǝnni tǝ mǝskǝn beɗ nǝ ɓakmi ɓasǝm. ²² Beɗ tǝ gi ǝŋ yaa naai tu tsǝtnngǝnngǝ dlii, wo lǝǝrǝm laaghǝ ndarani mǝnɗi. Hal ɗaŋngǝnni gyo ǝŋ ka bwoo? Ma yisǝŋ hŋ. ²³ Duryo tu ma dluui a dlek mbǝtlǝmes. suughǝn yin tu mǝ mǝshi mǝ tlǝn tsǝn tǝ yan ɗaŋ nǝ Ɓorghǝnni yan ɗaŋ a moɓ ndaraghǝn. ²⁴ Hal ɗaŋngǝnni mǝ naa a dlii a naam mǝn ciɓ nǝ durghǝ kyaani. ²⁵ Hal ɗaŋ mitǝ jom jomni gin taas, ma yisǝŋǝi beɗ tu ma fuuɗi, mǝ ciken tǝ tsǝtnngǝn tǝ kyaani ɓuruk nǝ durghǝ cighǝn ken waan, tǝ polghǝni waan a caaghǝn raa. ²⁶ A bamvi gi, ɗuughǝn gǝǝɓ waan a yan Yesu ɗaŋ nǝ durghǝ sughǝnɗi ɓaski. ²⁷ Finǝn tsǝtnngǝn yo ɗaŋ a ndara laaghǝ yan ɗaŋ nǝ Ɓorghǝni, ko mya man mǝ man yelki ko mǝ man hŋ, ma wum mǝn byatlkǝn waan, tu kigha dlǝǝrghǝn tlya tlya a giɓkǝ zhipti tǝ raa namboŋ, tǝ raa namboŋ nǝ buŋngǝn a lǝǝɓ namboŋ nǝ caaghǝn raa a vik wusni. ²⁸ Vǝrtǝ tǝ cik ko a datǝpi gyo hŋ, tu nǝ gya gyo ɗaŋ caa suu tǝ yel kaar waani. Gin nǝ ɓalaŋ kǝ dluuɗkǝn wasǝŋ te ɓashi, beɗ tǝ gi nǝ vumngǝn waan a gin a te Cogn. ²⁹ Duryo tu taa gǝǝmki dǝǝl mǝn nǝ durghǝ yan ɗaŋ nǝ ɓorghǝnni, nǝ caaghǝn raa ɓastǝ hŋ, beɗ tǝ gi a buŋ nǝ dur waan, ³⁰ Kitǝ vuughǝn ɗaŋ gyo ɗaŋ kǝǝ yel ɓasǝm, gyo ɗaŋ kǝ wun migha tlyaghǝn hal ɗaŋngǝnin.