¹ Nǝ durghǝ gi gya na suughǝnetn, gya gyo ɗaŋ mya ɓiin nǝ kyaani, polghǝnetn tǝ kurgamngǝ guŋndatn, a tǝpi gin dlǝrǝn tlya tlyaa a Daadǝn, kamndǝ na suughǝnetn. ² Mya kara Afodiya, mya kara Sintiki naan tǝ raa namboŋ a Daadǝn. ³ Yi cik myavkaraku ɗa tu, kyani mǝn yo ɗaŋ minǝ naaɗkǝni tǝ ghǝmmbǝli ghǝ yer na jomi cimki: somǝn guɗin ɗa. Nǝ duryo tu yaŋshi ghǝn mǝ buŋ cimshi nǝ durghǝ basaŋngǝ vi wusni tǝ Kilimas tǝ gya mǝn yo ɗaŋ mya fi laas cimshi, gya gyo ɗaŋ sǝmɗǝ wasǝŋ nǝ dlyaaɗkǝni a tagarta raai. ⁴ Tǝ polki a Daadǝn ko dzaŋ gyo. Saɗɗa mya wul tu tǝ polki. ⁵ Gan zarsǝ ɓuruk tǝ yel mbutarghǝn gaam wan. Daadǝn a na mel. ⁶ Ɓak vuun nǝ ngǝtn won ɗa hŋ, nǝ durghǝ cik, a giɓkǝ ngǝtn ɓuruk tǝ gya karaghǝn Cogn tǝ karaghǝnngǝ tǝ nyarghǝn, gan karaghǝn wan Cogn tǝ wumi, ⁷ gaan raa wusni ghǝ Cogn gyo ɗaŋ a laatsǝ yisǝŋngǝni, wo lyaa raa wani tǝ ɓitalghǝni wan a giɓkǝ ɓorghǝn kǝ Cogn Yesu. ⁸ Ɗa kaari, mǝnwopm, ɗeɓaɗ ngǝtn yo ɗaŋ yi jomi, ɗeɓaɗ ngǝtn yo ɗaŋ a kǝǝm luughǝni, ɗeɓaɗ ngǝtn yo ɗaŋ nǝ mbuni, ɗeɓaɗ ngǝtn yo ɗaŋ yi ndarara, ɗeɓaɗ ngǝtn yo ɗaŋ nǝ kaɓkǝni, ɗeɓaɗ ngǝtn yo ɗaŋ caa lǝǝr suughǝniɗi, ɗeɓaɗ ngǝtn yo ɗaŋ a wusǝŋ konngǝni, ǝŋ yaan luughǝni ghai, ɓitalǝnki nǝ gyaa gini. ⁹ Ngǝshi gyaa gini ɗaŋ kǝ kuuɓ, kǝ kaɓ, kǝ wumi, kǝ yeli ɓasǝm a tsǝnngǝnin, fin shi waashi ɓuruk. Cognvon murghǝ raa wusni wo tsǝtn tǝ kyaani. ¹⁰ A polǝm nǝ ŋaanyi hŋ a Daadǝn dur yo tu ɗaŋngǝni a ɓanngǝni ka ndǝr tsǝnngǝni waani tǝ myaan. Kǝ ta paghǝm nǝ ŋaanyi hŋ a mbuɗkǝni gi, beɗ tǝ gi kǝ ta tu dǝǝl ghǝ somngǝnetn ɗa hŋ. ¹¹ Nǝ dur ghǝ suughǝnetn ǝŋ myaa kon gin hŋ. Nǝ dur yo tu maa kuuɓ tsǝtnngǝni a ko dǝǝli gyo. ¹² Maa yisǝŋ tǝpm yo ɗaŋ ma tsǝtn tǝ dwaandǝ, ma ndǝr mǝ yisǝŋ tǝpm yo ɗaŋ ma tsǝtn tǝ tughǝni. A te ko tǝpi gyo a giɓkǝ ko ngǝshi gyo maa kuuɓ sǝǝr, tǝ tǝpm yo ɗaŋ ma ci monnda tǝ tǝpm yo ɗaŋ ma tsǝtn tǝ kusǝŋ, tǝ tǝpm yo ɗaŋ ma tsǝtn tǝ tughǝni mǝ ndǝr mǝ tsǝtn tǝ dwaanndǝ. ¹³ Ma ɗyaa mǝ fi koni te ɓastǝ yaan ɗaŋ caa tlyaam moɗi. ¹⁴ Beɗ tǝ gi kaa fi raapari tǝ myaan a giɓkǝ buŋngǝnetn. ¹⁵ Kaa yisǝŋǝi, kyaani mǝn Filibi tu a vii wusni kǝ keni, a kili yo ɗaŋ mǝ ta gaa Makidoniyai, zarsǝ Cogn ta yi somɗa a te vǝrghǝni tǝ kaɓkǝni she kyaani ngǝtn waan. ¹⁶ Ko a kili gi ɗaŋ mǝ ta yi Tasalonikai, ka ta yi shinndarǝm ngǝtn mǝn tǝpm namboŋ hŋ. ¹⁷ Yin tu myaa ŋal a vǝrǝm ngǝtn won hŋ Nǝ dur ghǝ gi, mya ŋal nǝ ngǝtn yo ɗaŋ wo lǝǝr ki mbuni yo ɗaŋ wo lǝǝrki cighǝn ken waan mǝn ɗi. ¹⁸ Maa kaɓ ngǝtn ɗeɓaɗ, mǝ yir ngǝtn monnda. Maa ci ngǝtn vwa a yughǝi. Maa kaɓ ngǝtn ɗaŋ kǝ shinndarǝm mǝnɗi a taas ghǝ Abafaraditus. Nǝ gyaa ngǝtn ngǝ zhoŋngǝni wusni wusǝŋ-wusǝŋ. Ngǝtnngǝ vaaghǝni yo ɗaŋ Cogn a kaɓii. ¹⁹ Coŋatn wo vǝrki ɓuruk ngǝtn yo ɗaŋ kyaa suu a dulghǝ ngǝtn yo ɗaŋ yirshi a giɓkǝ luughǝni Ɓorghǝn kǝ Cogn Yesu. ²⁰ Ɗaŋngǝni gaan luughǝni tǝ naa a Cogn tǝ Daawopm zhaɗ-zhaɗ. Tǝ naa cik. ²¹ Wurǝn ko murghǝ laaɓkǝni gyo a giɓkǝ Yesu Ɓorghǝn kǝ Cogn. Ɗeɓaɗ gyaa ŋaa naa wopm ɗaŋ mi cimshi caa wurǝ ki. ²² Ɗeɓaɗ mǝn laaɓkǝn ɗuuni caa wurǝki, ɓanndaŋ gyaa gyo ɗaŋ ci dǝn Kaisar hŋ. ²³ Gaan gyaal ghǝ Daadǝn Yesu Ɓorghǝn kǝ Cogn tǝ naa tǝ zhiɓti waan. Tǝ naa cik.