¹ Ni caa lǝǝr wutlǝŋngǝn tǝ kuskǝ raa ɗi a dlei waane? ca shishinndi a te kusǝŋsǝ ngǝtn mbighǝn raa caa fi manndǝ a giɓi waan hŋaa? ² Kyaa mbi ɗa raai, beḍ tǝ gi kǝ tir hŋ. Kyaa ɗuu zaar kyaa ngaɓ daama tǝ manndǝ. Hal yawon kaa tu hŋ duryo tu kaa ceɗ hŋ. ³ Kǝǝ kaara beḍ tǝ vǝrki hŋ duryo tu kyaa kara a tǝpm yo ɗaŋ a ndara hŋ, duryo ty kyaa suu a fi laa ghai nǝ durghǝ kusǝŋsẹ ngǝtn mbighẹn raabwaan. ⁴ Kyaani mǝn mbǝllǝ! kaa yisǝŋ hŋ tu kamndǝ tǝ ɗǝgn nǝ jendalghǝn a Cogn hŋaa? Durghǝ cik ɓuruk gyo ɗaŋ ngaɓ kamndǝ tǝ ɗǝgn a naai nǝ gyomtlughǝ Cogn. ⁵ Ko kyaa gaa raa tu vi Cogn kon cik a ɓyemyan, ''Zhiptin ɗaŋ yi ɓasmi wopi citǝ kashi mbun mbunna''? ⁶ Beɗ tǝ gi Cogn daɗak mi vǝrghǝn gyal, yan a ca vi Cogn wultu, ''Cogn ca nyaŋngas murghǝ mbitǝ gaam, beɗ tǝ gi ca vǝr gyal murghǝ mbutarghǝn gaam.'' ⁷ Nǝ durghǝ cik vǝrǝn gama waan Cogn. Nyaŋngasǝn Shetan, wo ndǝr kiir ki. ⁸ Ɓǝɗǝn ki ɗi mel tǝ Cogn, yan beɗ wo ɓǝɗtǝɗi mel tǝ kyaani. Coɓǝ taas waani, kyaani mǝn kusǝŋsǝ ngǝtn, gaan raa waan pes, kyaani mǝn raa mbǝtlǝm. ⁹ Fin raaghǝ jii, miitsǝ, tǝ ngwarghǝn! Sularǝn gyomtlǝghǝn waan tǝ naai nǝ raaghǝ jii, polghǝn waan beɗ nǝ kǝ raaghǝ jii. ¹⁰ Mbutarǝn gaam waani a kenngǝ Daadǝn, yan beɗ wo luu ki waani. ¹¹ Ɓak caan vi dlǝŋsǝ waanbhŋ, gya yesatn. Gyo ɗaŋ caa caavi yesashi ko ɗǝǝlghǝn vi yesashi mǝn, caa caa nǝ vi mborki, ca ngyerni vi mborki mǝn beɗ. Ǝŋ kya ngyer mborki vi mǝn, a giɗ tu kya laaɓ mvorkes hŋ beɗ tǝ gi murghǝ ngyerghǝn ves. Murghǝ vǝrghǝn mborkes tǝ ngyer ves ci namboŋi. ¹² Yan ghǝn ci muryo ɗaŋ wo ɗya kaɓmi opi ndǝr tlaami wopi. Kyan ki nu, ɗaŋ kya ngyer vi murghǝ mel tǝ kyan mǝn no? ¹³ Sǝǝnkǝǝm, kyaani ɗaŋbkyaa wultu, ''Yawon ko jaan ma tlii a yatlu ɗi mǝ ɗu voni namboŋ ɗa ɗan, mǝ fi vǝǝn, mǝ ndǝr mǝ tu duulighai.'' ¹⁴ Nughǝn a yisǝŋ ngǝtn yo ɗaŋ wo tumi jaano, beɗ tǝ gi tsǝtnngǝn wopm wo naa wuri? Kini ɗaŋ ɓwaan yo ɗaŋ ya bǝl nǝ kǝ ŋaa kili njwatb ndǝr malu. ¹⁵ A bamvi cik, she a wultu, ''ǝŋ Daadǝn ya kaɓi, ma fuuɗi beɗ mǝ fi gin ko giiɗi.'' ¹⁶ Beɗ tǝ gi ɗaŋngǝnni kya fi mbitǝ gaam tǝ ɓumtsǝghǝn ngǝtnbwaa nǝ kǝ gendalghǝn. Ngǝtnngǝn mbitǝ gaami gin, nǝ kuskǝ raa. ¹⁷ Nǝ durghẹ cik a muryo ɗaŋ a yisǝŋ ngǝtn yo ɗaŋ a ndara tǝ fishi beɗ tǝ gi a fi hŋ, a naai nǝ kuskǝ ngǝtn ɓastǝ.