¹ Nǝ zarsǝ ɗeɓaɗ ǝŋ ta naa nǝ mǝn giɗkǝni hŋ, mǝnwon maa yisǝŋ tu matu forǝm nǝ ŋanyi hŋ. ² Duryo tu ma ndaaɗi gha datǝpm monnda. Kaɓ muryo ɗaŋ a ndaɗgha datǝpm ghǝ vik Cogn hŋ, cinǝ zaar yo ɗaŋ tǝ nal tǝ tlya tlyaa, guo ɗaŋ wo ɗya ngaɓ dlii woshi. ³ Ǝŋ mya ca zuŋtuŋ zhwaaki mǝn a vi, duryo tu tǝ fi ngǝtn yo ɗaŋ mya suu, ma ɗya mǝ rii tǝ dlii wasǝŋ ɓuruk. ⁴ Gaan yir gha zhuŋ zha ɓa, beɗ ɗaŋ tu cinǝ varaŋshi monnda hal tu yetar tkya tlya ca jaashi, tǝ dwaam njwatn ǝŋ murghǝ jaghǝn wos ca sughǝɗ tǝ a datǝpm yo ɗaŋ ca suu. ⁵ Cig kǝn riisǝŋ, nǝ ŋanyi a te dliughǝ zaar, she mbighǝn gaam gha fighǝn dǝllǝŋsǝ ngǝtn. Yaalǝn a yelbɗaŋ ŋaa wuɗ ca ci dǝllǝkǝ ndǝǝr ɓa. ⁶ Riisǝŋ, beɗ cinǝ wuɗ, a giɓkǝ dliighǝ zarsǝ kaɓ, ɗǝgnngǝ kusǝŋsǝ ngǝtn fighǝnni ɗaŋ tǝ shin a giɓkǝ dlyaŋri dlii wopm. Caa ndǝr ca riighǝn wopm kǝ yawon tǝ ngaɓ wuɗ. Yanes beɗ, dǝnngǝ wuɗ ǝŋ ca caatǝ ghai. ⁷ Beɗ tu riisǝŋ gos, gon a giɓkǝ zaar ɗaŋ a ɗyabtǝ sughǝɗ tǝ hŋ. ⁸ Nǝ kuskǝ ngǝtn ɗaŋ citǝ taas hŋ, nǝ yugnngǝn tǝ kuskǝ nyogn vi gyi ɗaŋ wo ɗu zaari. ⁹ Riisǝŋ yo ɗaŋ mya luu Daadǝn tǝ Daa ghai, tǝ yan ǝŋ mya laŋ, gyo ɗaŋ Cogn ndǝrshi a zhipti wos. ¹⁰ Vi yo ɗaŋ mya gǝm mbuuni zarsǝ mǝn ghai, tǝ yan ǝŋ mya laŋ zarsǝ ghai. mǝn wopm, gi a ndara hŋ. ¹¹ Zha ɗaŋ a gǝǝɗɗi, wo ɗya nyolar zha wusni ɗi tǝ kǝ baŋni a kili namboŋ hŋ. Wo ɗya ya? ¹² Mǝn wopm, gwas kǝ gwaam wo ɗya nyolar guur ghǝ ɓatsǝ hŋ. Wo ɗya ya? Beɗ tu kitnngǝ darndu dǝn wo guur mǝri gwaam na? Cig ɗaŋ zha ghǝ baŋni wo nyolar zha mwaghǝnni ɗi hŋ. ¹³ Murghǝ saghaɗkǝn tǝ yisǝŋngǝnngǝ ci te ɗo a giɓi wa no? Gaan dashes, a tsǝtnngǝn mbuuni wos tǝ zhiɗ laa wos tǝ raaghǝ mbutarghǝn gaam tǝ saghaɗkǝn wos ɗaŋ ca tlǝǝɗi. ¹⁴ Beɗ tu kuskǝ suughǝn ngǝtn ɓak ɗuu gǝǝɓ tǝ mbyerni a dulgaan ngǝtnngǝ jom jomi hŋ. ¹⁵ Saghaɗkǝn gin nǝ gyo ɗaŋ ca shiɗi gaami hŋ, a dulghǝ gi, nǝ kǝ ɗǝgn, gyo ɗaŋ vik Cogn ghai hŋ, nǝ kǝ mǝnndǝŋsǝ. ¹⁶ Duryo tu kaɓ lǝǝɓ yo ɗaŋ kashi tǝ kuskǝ suughǝn cighai, ɗani ǝŋ caa tu wutlǝŋngǝn tǝ kusǝŋsǝ ngǝtn nari mari. ¹⁷ Beɗ tu saghaɗkǝn kǝ gami, keni, tǝ na tu nǝ ndzǝkkǝn, murghǝ shilarghǝn gaam, vi muri, wumngǝn kǝǝm murghǝ gwanndǝ yelghǝn, tǝ murghǝ fighǝn gyal monnda. Murghǝ shilarghǝn gaam, murghẹ suughǝn gyal murghǝ nyarghǝn, laa ca ɗushi hŋ tǝ murghǝ vǝrtǝ Cogn. ¹⁸ Beɗ tu, guuri ghǝ zaar ghǝ zaari gyo ɗaŋ ca gǝm a giɓkǝ raa wusni a dlei gya gyo ɗaŋ caa ŋal tsǝtnngǝn namboŋnyi.