¹ Kyaani gya yestan, ǝŋ yan ka ngaɓ caaghǝn raa waan a Daadǝn Yesu ɗaŋ nǝ ɓorghǝnni, Daadǝnngǝ zhimngǝn, ɓak giɗǝn waarghǝn a zarsǝ gya gon hŋ. ² Ǝŋ zaari gon ya tlǝ a jwaamngǝn waanes tǝ sari mondeghǝ jinari tǝ gya lǝŋsǝ ndarara, murghǝ dwanndǝ won beɗ a ndaɗi tǝ lǝŋsǝ nǝ mǝǝki. ³ Kili yo ɗaŋ kyaa paŋ murghǝ lǝŋsǝ ndararas, kǝ wultu, ''Ǝŋ kya kaɓi tsǝtni ɗuun a lǝǝɓ ndarani'' Murghǝ dwanndes beɗ kǝ wul tu, ''Tsǝtni yatl ɗuun a kenatn,'' ⁴ A she kyaa ngyerni vi a dlei waan ǝnndi hŋaa? ⁵ Sǝǝnkǝǝm, gya yetǝ na suughǝnetn, a she Cogn ngǝn a bwaa mǝn dwanndǝ kǝ ɗǝghǝn tǝ naa nẹ mǝn tuughǝn a giɓkǝ caaghǝn raa hŋaa, tǝ ndǝr tǝǝ naa nǝ mǝn cighǝn duul a giɓkǝ guŋndu ɗaŋ a fi mǝn suughǝn wos mbighǝn ɗa raai mǝn hŋaa? ⁶ Beɗ tǝ gi, kǝ fiir forǝm mǝn dwanndǝ! A she, nǝ mǝn tuughǝnnes ǝnnda caa gomtsaki hŋaa? Nǝ yanshi ǝŋ caa tlǝǝr ki a kenngǝ mǝn ɗǝǝlghǝn vi hŋaa? ⁷ Nǝ yanshi beɗ kǝnnda caa vǝr sǝmi kǝ luughǝni ɗaŋ caa cimki ghaiyi hŋaa? ⁸ Beɗ tǝ cik, ǝŋ kya yugn mborki ghǝ ndzǝkkǝn ɗaŋ vik Cogn kon tu, ''Suu murghǝ mel tǝ kyan ɗaŋ gama,'' Kǝ fi ndaara. ⁹ Beɗ tǝ gi ǝŋ kya giɗ worghǝn, kǝ fi kuskǝ ngǝtn ǝnndi, ɗǝǝlghǝn vi ngaɓki tǝ maalghǝnngǝ tsalghǝn mborki. ¹⁰ Gyo ɗaŋ ca ɗyaar ɓuruk mborki, beɗ tǝ gi a ndǝr nga yasǝŋ tǝpm namboŋ kurum, a naai tǝ maalghǝn ngǝ tsalghǝn mborki ɓuruk kǝnndi. ¹¹ Duryo tu gyo ɗaŋ a wultu, ''A ɗuu zaar hŋ.'' Ǝŋ kya fi mbǝllǝ hŋ, beɗ tǝ gi kǝ ɗuu zaar, ai, kǝ naai nǝ murghǝ tsalghǝn mborki ǝnndi. ¹² Nǝ durghǝ cik, wulǝn vi a ndǝr a fi ɗaŋ gya gyo ɗaŋ ta ɗǝǝlshi vi mǝn a te mborki ghǝ sǝrghǝde. ¹³ Duryo tu ngyerghǝn vi gha manngǝnɗi tǝ yelghǝn gwanndǝ hŋ a mǝni gya gi ɗaŋ ca yel gwanndǝ hŋǝi. Gwanndǝ fi fyali a dulgaam ɗǝǝlghǝn vi. ¹⁴ Ndaraghǝn wos nǝ ni, gya yesatn, ǝŋ gon ya wultu citǝ caaghǝn raa, beɗ tǝ gi ci tǝ laas hŋye? Caaghǝn raas wo vumtǝ hŋ, ko wo vumti ya? ¹⁵ Tǝǝ zhiɗ tu, ǝŋ yan yesa ko watsa ci tǝ lǝŋsǝ ndarara hŋ, ko citǝ ngǝtnngǝ cighǝnngǝ vyaghǝ hŋ. ¹⁶ Tǝǝ zhiɗ tu, ǝŋ yan gon waan ya wulshi tu, ''Tlǝn tǝ raa wusni, wumǝn lǝǝɓ vaaghǝn vwaa tǝ yughǝi'' Ǝŋ kyaa vǝrshi ngǝrshi gya gi ɗaŋ dlii caa ŋal hŋ, ndaraghǝn wos nǝ ni? ¹⁷ Cik kǝnnda, caaghǝn raa yan ngǝtnwos, ɗaŋ laas ghai hŋ, mǝ mǝskǝn. ¹⁸ To, gon wo wultu, 'Ai, kyan ki tǝ caaghǝn raa, myan beɗ mitǝ laas.'' Giɗǝm caaghǝn raa waɗi hŋ laas ghai, myan beɗ tǝ zhiɗkǝn caaghǝn raatn a te lǝǝɓ laatn. ¹⁹ Kǝ caavwa shi tu Cogn ci namboŋ, kǝ fi ɗa giiri. Beɗ gi ko mǝnndǝŋsǝ beɗ taa caavwa shi ɗaŋ, beɗ tǝ cik cigha dli dla dlaar. ²⁰ Kya suu a yisǝŋǝi ya, kyan ɗǝghǝr, tu caaghǝn raa ɗaŋ laas ghai hŋ yi ɓyema? ²¹ Tǝ gǝm Iɓrahim murghǝ ɓwaaghǝn wopm a te laa hŋaa, a kili yo ɗaŋ a vǝr Ishaku kuni wos a dulghǝ lǝǝɓ ndzǝk ndzǝkia? ²² Yeli, a she, caaghǝn raa wos a fi laai tǝ laawos, beɗ ɗaŋ yi tu dlǝǝrghǝni ndaara. ²³ Vik Cogn yughǝi ɗaŋ a wultu, '' Iɓrahim caavwa Coghǝi, tǝ ndǝr tǝ kontǝ a mǝn zaari zaari'' Tǝ ndǝr tǝ cimtǝ tu kamngǝ Cogn. ²⁴ Yelǝn, a te laa ǝnnda zaar caa tu vumngǝni, ɓak a te caaghǝn raa ngǝtn wos hŋ. ²⁵ A te tǝpi gines beɗ, ǝnnda Rahaɓ geɗ murghǝ mbǝllǝi a ta tu vumngǝn a te laa, ɗaŋ a ta kaɓ mǝn paŋngǝn waaɗi a ta nyolarshi washi a te tǝpi gon mari hŋaa? ²⁶ Ɗaŋ gi ɗaŋ dlii ǝŋ yan citǝ zhipti hŋ nǝ mǝskǝnni, cik beɗ, caaghǝn raa ɗaŋ laaskai hŋ nǝ mǝskǝ.