¹ Mannǝn ɗaŋngǝnni, kyaani ɗaŋ ki nǝ mǝn tuughǝn, ngwarǝn tǝ ɗughǝn riiŋ nǝ durghǝ raaghǝ jii mar mari ɗaŋ cigha manngǝnɗi ɓaski. ² Tughǝn waan a rashi, lǝŋsǝ waan ɓuruk diipm taa tlyei. ³ Jinari waan tǝ zurfa waan taa ngaɓ njyimri. Njyimri wasǝŋ wo naa nǝ ngǝtbbgǝ tlyaaghǝn zha kǝ nyaŋngaskǝn waan. Wo ci tluu waani ɗaŋ wuɗ. Ka fu gaaghǝnngǝ tuughǝn waab nǝ durghǝ dzaŋngǝ ɓanbgǝn. ⁴ Yelǝn, bamvighǝ mǝn laa cigha ngwarghǝn bamvi yo ɗaŋ kǝ ɗaghar gya gi mǝn ɗaŋ tǝ dzakki ngǝtnngǝ kitn waan mǝn. Beɗ tǝ gi ngwaarghǝnngǝ mǝn laas a tuli a kǝǝmngǝ Daadǝnngǝ gutulu zhipti mǝn shinngǝn wos. ⁵ Kǝǝ fi tsǝtnngǝn a giɓkǝ tughǝn a ɗǝghǝn kǝǝ ndǝr kǝ caa gamawaan ghai. kaa caa raa waan a laaɓi nǝ kǝ dzaŋngǝ ngyaarghǝn. ⁶ Kaa ngyer vi kǝ ndǝr kǝ ɗu zaarghǝ mbuuni. A ndǝr gaa gǝǝɓ tǝ kyaani hŋ. ⁷ Nǝ durghǝ cik mbutarǝn raa waani, gya yesatn, hal dzaŋngǝ manngǝnɗi Daadǝn. Yelǝn, ɗaŋ murghǝ kitn caa ɓuɓ nǝ dǝǝl nyomngǝn ngǝtnngǝ kitn wos. ⁸ Kyaani beɗ, naan tǝ dluughǝn vwa. Sularǝn raa wan tlya tlya, duryo tu manngǝnɗi Daadǝn a naai mel. ⁹ Ɓak mbolǝn a dlǝŋsǝ waan hŋ gya yesatn, duryo tu tǝ ngyerki vi mǝn hŋ. Yelǝn, murghǝ ɗǝǝlghǝn vi cighs dlǝǝrghǝn a ken ɓiil. ¹⁰ Mbiin ngǝtn zhiɗkǝn, gya yasatn, a te buŋngǝn tǝ mbutarghǝn raa kǝ mǝn shinngǝn gya gyo ɗaŋ tǝ wul vi a giɓkǝ sǝmngǝ Daadǝn. ¹¹ Yelǝn, myaa cim gya gi ɗaŋ tǝ dluuvwaai tu, ci nǝ mǝn mbuni. Kaa ndǝr kǝ wum dluughǝn vwa yo ɗaŋ Ayuba fi, kaa ndǝr kǝ yisǝŋ ɓitalghǝnngǝ Daadǝni, ɗaŋ ci nǝ murghǝ yelghǝn gwanndǝ. ¹² A moɓkǝ koni ɓuruk, gya yesatn, ɓak ŋasǝn puus hŋ, ko tǝ tsogn gaami, ko tǝ yatl.. ko tǝ ŋaskǝn puushi gyo beɗ. A bamvi cik gaan ''Eh'' tǝ naai nǝ ''Eh'' ǝŋ kya wul tu, ''o, oi'' tǝ naai nǝ ''o,oi,'' duryo tu ɓak a ndaaɗǝn a ngyerghǝn vi hŋ. ¹³ Gonɗa ɗaŋ cigha buŋngǝnni a dlei waana? She tǝ kara Cogn, gon ci ɗa ɗaŋ ci ɓastǝ polghǝnna? She tǝ wa ngiilghǝ zǝghǝrghǝn. ¹⁴ Murghǝ gonngǝn a dlei waana? She tǝ cim mǝn varaŋsǝ vin ladi tǝ kara Cogn nǝ durwos ciyi kaɗtǝ miir mǝn a giɓkǝ sǝǝmngǝ Daadǝn. ¹⁵ Karaghǝn Cogn tǝ caaghǝn raa wo byatl murghǝ gonngǝnneshi, Daadǝn wo ndǝr shisher ti. Ǝŋ yan yi tu a fi kuskǝ ngǝtn, Cogn wo dlaa tǝ loŋsǝ kusǝŋsǝ ngǝtn wos mǝni. ¹⁶ Nǝ durghǝ cik, kwaanǝn kusǝŋsǝ ngǝti ɗaŋ yi a dlǝŋsǝ waan, a yi karan nǝ dlǝŋsǝ waan, furyo tu tǝ byatl ki waani. Karaghǝnngǝ zaar mbuuni citǝ tlyaaghǝ nǝ jom jomni a laawos. ¹⁷ Iliya ci nǝ zaar ɗaŋ myaani. Beɗ tǝ gi ɗaŋ a mbǝrtǝ a karaghǝn tu von tǝ shi hŋ, von shiiɗa hŋ ɗayatli hal voni maayi tǝ lǝpm lim. ¹⁸ She Iliya a man kara ɗa. Tsogn gaami a shii vonɗi, yatl beɗ a ɓwaa ngǝtnngǝ mbuuni. ¹⁹ Kyaani gya yesatn, ǝŋ gon waan ya koghǝi a ngǝtnngǝ jom jomni, gon she tǝ sulsr tǝ ɗi, ²⁰ muri gin tǝ yisǝŋǝi tu, ɗeɓaɗ gyo ɗaŋ ya sular murghǝ fighǝn kuskǝ ngǝtn ɗi a tǝpm kǝ ndarani. wo kaɓti ɗi a mǝskǝn, wo ndǝr dlǝpm kusǝŋsǝ ngǝti monnda.