¹ Inaani, di angẹni ọfụshi fu ọpani aani. Dim re ụzọmi ọna ji fụri ẹbẹeẹba do zina vaa nyiẹtẹ. Da si ikọkọrọ one si chire irenu ụsi ana razi nyi ẹgẹ yi ụzọmi ọnọ. ² Ọ fụrẹ okurenu ụsi ana razi nyi ẹgẹ ọnọ, di areyi tụụ fini ụsi ọnọ vene areyi ọna fini akuru ọbani nyangada. Di ọyi ọnri ashi si vara ojioji fụvọ areyi anaa jinẹ fini ụsi ọnọọ vẹ. ³ Di akụvariva nin jinẹ fini areyi ọnọ, dẹ fụ shiẹshẹ ọnọni, da sụ ụkata vene ụkata iku yụ wa tụrẹ ẹshẹ rẹsụ. ⁴ Da kaa yụ wa ki asẹ du avi oziẹshẹ, navẹki avi ofuofu navẹki ọchi ofuofu, ama azẹna razi nyi ọtẹrẹwa Oshomoshi tuni ibe aanini renya ọnẹ ra kani. ⁵ Azẹzi si ụmọ yụ wa ki ẹ wụ azẹnẹ, ama a si ụmọ yụ wa ki ẹ si ụfẹ ẹẹshi mụya ebebaani rụ wa. Ụyọọri aanini vene vee vene iku mẹ re che ọza aavọ. ⁶ Ụmẹ ẹkụshi ẹnẹ re tu, aza vee si isu, ama e zee re. E vee si oze ki ene su, ama di isu zue kavana yụ wa. ⁷ Akụvariva ẹnẹ vana simai ovurata ene teni tẹtẹ yi irẹkụ. Dẹ nyi isẹne vene ade igoonu tụnẹẹsụ, di eyirẹsụ aanini vene eyirẹsụ ọza. ⁸ Di ẹyi aanini vene ẹyi anyẹnẹ, di anyi aanini vene anyi iduu. ⁹ Dẹ nyi okurachi ene vene okurachi enyisuẹ, di avaka aanini aa sụrẹyi vene ovurata ẹrụrụ anaa kụ gi ikẹkẹ irẹkụ enee zuechi ni ni irẹkụ. ¹⁰ Dẹ nyi omu vene omu ọni iku sii che ọza; dẹ nyi ụkata tụni omu ene ve sii che aza mẹ ụfẹ ẹshi. ¹¹ Angẹni ana yini ụsi ineeku ọrọkọtọ ọnọ vi Oshinọyi aanini. Iresha aani ini Iburu ọnọ vi Abadọnụ, dọ vi Apariọni ini Igiriki. ¹² Ụyọọri ọshimi ipaapa ọ parafu da. Re! inaama ọnọni ọkatẹngwụ ọshimi ẹẹva va vii vẹ. ¹³ Angẹni ọfụshinọnyi o fu ọpani aani, dim wụ ki ọngwẹ ọnya ọ jinẹ fini ọpẹtẹ igoonu ọna yini ọvidi Oshomoshi. ¹⁴ Di ọngwẹ ọnọ kaa yi angẹni ọfụshinọnyi ana za ọpani ọnọ ka, " Na angẹni ẹẹna ọna sụ tụni okufa ọbani ọnaa shi Iyufureti tụ." ¹⁵ Da na agẹni ẹẹna ẹnẹ ene teni tẹtẹ ee zi ẹfi ọnọ, ọkụshi ọnọ, ụfẹ ọnọ, ọnri irayi ọnọ, da fụrẹ wa ụvọ ki ẹ wụ oche-ẹta anẹshẹ. ¹⁶ Ọkụrẹkụ ana shirẹ ovurata vi, akawụ oze akashi oze ẹchẹshi (200,000,000). Maa wụ ẹ mẹ za wa ika. ¹⁷ Aa nim mẹ re ovurata ẹnẹ ọnri ẹzẹna shirẹ wa ini ẹtoore: Okurachi aanini vi ovivi nyaa, ivunu-ojooji, doo vi vene ira ọnaa za. Di irẹsụ ovurata ẹnẹ vene irẹsu iduu, di ira aa ka fụrẹ wa irenu, shi areyi, shi emi-ọyi. ¹⁸ Oche-ẹta anẹshẹ ọni ọkatẹngwụ ẹẹta ọnọni wụ va sha: ira, areyi ọnri emi-ọyi ọnaa tụ fineenu aanini. ¹⁹ Fụvọki ụkata ovurata ẹnẹ vana yini irenu aanini ọnri omu aanini --- fụvọki omu aanini vana vene isẹchichi, dẹ nyi irẹsụ ẹnẹ sii tọ aza anava. ²⁰ Azẹnavọ, ọni ẹkatẹngwụ ẹnẹni razi wụ vi ẹnẹna razi rinẹvarama fini isọshimi ọnẹẹ mẹ; ẹnẹna razi zụvọdinẹ in ọfifẹkẹ arijẹnụ ọnri ori ana si igoonu, isiriva, iburonzi, irẹta ọnri ọchi mẹ --- isẹnẹni vi isene re me reẹtẹ, ẹ ma karẹyi, ẹ ma zụ zụsẹ. ²¹ Ẹzi varama fini ọza-ọwiwụ, irakụọ ọmimẹ, irẹka-ọsisẹ, navẹki uyi-oyoyi aanini.