¹ Ẹfi ọni Ozi-atẹmẹ fụ ẹsụnẹ ọfụshimba, di ineeku chiiji keri mẹ iwakati ocheva. ² Inaani, dim re angẹni ishimba ana dinẹ inọvidi Oshomoshi, da si ọpani ishimba chire wa ụvọ. ³ Angẹni ọsa ọ vẹ, dọ za ọnya igoonu ọna kụ eturari shi, dọ dinẹ tụni ọpẹtẹ eturari. Aa si eturari ọrụrụ yọ ki ọ si ọ bẹrẹ ozurenu anọdọwụ nini, doti ọ si ọ mẹ irafẹkẹ ini ọpẹtẹ eturari ana si igoonu mẹ ini ọvidi ogede. ⁴ Di areyi eturari ọnri ozurenu anọdọwụ nini shirẹ fiini ụvọ angẹni shirẹ ni ni ọvidi Oshomoshi. ⁵ Di angẹni ọnọ si ọnya eturari ọnọ, dọ kụ ira fini ọpẹtẹ shi o, dọ va ira ọnọ fụri ẹbẹba shiẹtẹ, di apavana Oshomoshi akarutu, dẹ ẹtẹ ee zizi, dọọ rinyẹrẹ, di nyanya ari vio vio, dẹ ẹtẹ aa jagodo. ⁶ Di angẹni ishimba ana za ọpani ishimba chaụvọ ee teni ẹngwụ ene vee fu ọpani ẹnẹ. ⁷ Angẹni ipaapa o fu ọpani aani, di irẹta Oshomoshi ọnri ira vafura anya. Aa va a shi ẹtẹ, dọ mẹ ki oche-ẹta ẹtẹ ọ rira vasha, oche-ẹta ọchi nin rira vasha, avi ofuofu nini bo dẹ rira vasha. ⁸ Angẹni ọfụụva o fu ọpani aani, de ne isọnyi ene vene irẹsụfa ọbani ọnaa rira na ngwụni irefu. Oche-ẹta irefu dọ si vi anya-anya pọm, ⁹ di oche-ẹta uye inenyi bo su vasha, shi oche-ẹta ẹpa ọna yini irefu vọnedu va sha. ¹⁰ Angẹni ọfụta do fu ọpani aani, di ụzọmi ọbani nyangada zina fini ovurukutu, dọọ za vene ọpa anaa siozee zụọza, dọọ sha tụra oche-ẹta okufa ọnri osue nini. ¹¹ Irẹsha ụzọmi ọnọ ọnọ vi Ẹchipa. Di oche-ẹta enyi ọnọ kụa nyirẹyi, di aza ẹrụrụ ẹrụrụ ene fu enyi ọnọ su fụvọ ọnyinyirẹyi aani. ¹² Angẹni ọfụụna o fu ọpani aani, di oche-ẹta ọyi, shi oche-ẹta ụfẹ ọnri oche-ẹta ụzọmi nin si vara. Di oche-ẹta enbo si vara ojioji; di oche-ẹta ọọdu ọnri oche-ẹta irafụ razi nyi ẹtofeyi. ¹³ Maa zamẹtẹ, dim wụ ki ibangụrụ onee shira inakaakana ovurukutu, ọ kowu shaa, dọ ka, "Oo du wu ku, oo du wu ku, oo du wu ku, ẹwụ nin ana yini ẹshẹ, fụvọ ọkụ ọpani ana vọ ọni angẹni ẹẹta ana vọ ee vee fu."