¹ Inaama isẹnẹni, dim re angẹni ẹẹna ana dinẹ tụni aka-ẹnina ẹshẹ, dẹ si ụkata-ụkata za ashi ọna yini aka-ẹnina ẹshẹ dinẹ ki asẹ kụ shi ẹshẹ, asẹ kụ shi irefu navẹki ọchi. ² Dim ze re angẹni ọsa ki ọ tụ fini aka ọnọ ọyii jinẹẹ fụrẹ, dọ za ọtẹrẹwa Oshomoshi ọna nyi ifẹ. Dọ si ọngwẹ tụẹba, do nowu karẹyi yi angẹni ẹnina ana si ụkata yi ki ẹẹ piva yi ẹtẹ ọnri irefu: ³ "Asụụ piva yi ẹtẹ navẹki irefu, navẹki ọchi nini netu ụmọni a ra si ọtẹrẹwa tuni ibe ozida Oshomoshi nin bo." ⁴ Maa wụ aza ya irika ana si ọtẹrẹwa tụra rẹsụ: aza akashi akashi oze ẹchẹshi tụra ẹbẹrẹva ọnri ẹẹna (144,000) ẹni ana mọ ọtẹrẹwa yi ini anda ọnyọnya ini irẹkụra Isrẹni: ⁵ akashi oze ewureva (12,000) ana mẹ ọtẹrẹwa yi ini anda Ijudiya nini; akashi oze ẹwụrẹva (12,000) fini andi Irubẹni nini; akashi oze ẹwụrẹva (12,000) fini anda Igadi nini, ⁶ akashi oze ẹwụrẹva (12,000) fini anda Asha nini; akashi oze ẹwụrẹva (12,000) fini anda Inafitari nini; akashi oze ẹwụrẹva (12,000) fini anda Imanasẹ nini. ⁷ akashi oze ẹwụrẹva (12,000) fini anda Isimọni nini; akashi oze ẹwụrẹva (12,000) fini anda Irẹvi nini; akashi oze ẹwụrẹva (12,000) fini anda Isaka nini; ⁸ akashi oze ẹwụrẹva (12,000) fini anda Izebununi nini; akashi oze ẹwụrẹva (12,000) fini anda Ijosẹfụ nini; akashi oze ẹwụrẹva (12,000) fini anda Ibẹnjamini, ẹni ana mẹ ọtẹrẹwa yi. ⁹ Inaama isẹnẹni, maa zamẹtẹ, dim re azọkọni ẹrụrụ --- fụri irẹkụravabẹ bo, irẹkụra renyi-renyi, aza bo ọnri irarẹ bo --- dẹ dinẹ tụni afụ ogede inọvidi Oziatẹmẹ. De chire auru ọvụọvụ, dẹ za adambara chaụvọ, ¹⁰ dẹ si ọngwẹ tụẹba dee nowu ka: "Ọdidọzatụ vana yi inụvọ Oshomoshi ọna yatụ tụni ogede, ọnri Oziatẹmẹ!" ¹¹ Angẹni nini bo vana dinẹ varakara ogede ọnọ, azẹkụ nini ọnri isẹẹna ana nyifẹ, dẹ vakuẹtẹ veyiku inọvidi ogede. Dẹẹ fẹkẹ Oshomoshi, ¹² dẹ ka, "Aami! Ugono, ụga, ụvira, avọọkụ, ụbani, ụkata, ọzụzụmẹ vi ayi Oshomoshi poro pooro! Aami!" ¹³ Inaani, di ọnya ini azẹkụ ẹnẹ, fọ mi ipẹpẹẹ ka, "Ẹni aza ẹnẹni vi kẹ, ene chire auru ọvụọvụ, ọnri ki izẹnẹ fụrẹ vẹ kẹ?" ¹⁴ Dim kaa yọ ka, "Ada, waa yẹ," dọ va kaa yi mi ka, "Ẹnẹni vana tụ fini Ụyọọri Ọbani fụvọ ọdọwụ. Ẹẹ nyina auru aanini ini anya Oziatẹmẹ, dọ kụa vụẹtẹ bẹnẹbẹnẹ. ¹⁵ Fụvavọ, ọnẹ si yini ọvidi ogede Oshomoshi, dẹẹ fẹkẹ ọọdụ shi irafụ ini itẹmpụrụ aani. Ẹzẹna yatụ tụni ogede vaa jajẹngwụ ku wa. ¹⁶ Ụngwẹ navẹki onyi ọi kụa kụ wa vụụvụrụ. Ọyi ọ zaa rụ wa, irivu ọ zaa da wa. ¹⁷ Fụvọki Oziatẹmẹ ọna yini akaakana ogede ọnọ vaa kụ waa zi, dọ zụ wa oze na ngwụni osue enyi ana nyifẹ, di Oshomoshi nyee ẹgọ fụrẹ wa eyi."