¹ Ẹfi ọni Oziatẹmẹ fụ ọnya ini ẹsụnẹ ishimba ẹnẹ, mee re, dim zẹ wụ ọnya ini isẹẹna ọna nyifẹ ẹnẹ mẹ si ọngwẹ ọnaa karutu venebiri apavana Oshomoshi kaa ka, "Waa vẹ!" ² Maa zamẹtẹ dim re ovurata ọvuọvụ. Di ẹzẹna shirẹ ẹ za ọpaa chaụvọ, da si ade yi ọ. Dọ jinẹ vẹ venebiri ọfụrẹkụ ọna vẹ ki ọnaa vaa fụrẹkụ. ³ Ẹfi ọni Oziatẹmẹ fụ ẹsụnẹ ọfụụva, dim wụ isẹnẹ nyifẹ ọfụụva ọ mẹ kaa ka, "Waa vẹ!" ⁴ Ụmavọ di ovurata ọsa jinẹ vẹ --- doo vii nyaa. Ẹzẹna shirẹ va na sioze yi ki ọ chema ẹngwụọrọ fiini ẹshẹ, doti anẹshẹ nin e roze wụ ẹngwụ vasha. Da si itakovi ọbani tụ ẹzẹna shirẹ ovurata ovivi nyaa ọnọ ụvọ. ⁵ Ẹfi ọni Oziatẹmẹ fụ ẹsụnẹ ọfụụta, dim wụ ki ọfụụta ini isẹnaa nyi ifẹ ka, "Waa vẹ!" Dim re ovurata ojooji, ẹzẹna shirẹ dọ za isa-ụmọ ọnyọgẹẹva chaụvọ. ⁶ Dim wụ ọngwẹ one vene ki fini akaakana isẹẹna ọna nyifẹ ọnọ fụrẹ, ki ọ kaa ka, "Ocheẹna ampo akụ vana kụ vi ikọvọ ẹẹva. Apaapa ocheẹna oze ẹta ọn zẹ kụ vi ikọvọ ẹẹva. Ama asụụ du angwẹ ọnri eche ivaini va sha. ⁷ Ẹfi ọni Oziatẹmẹ fụ ẹsụnẹ ọfụụna, dim wụ ọngwẹ isa ọfụụna ọna nyifẹ ki ọ kaa ka, "Waa vẹ!" ⁸ Dim re ovurata one venebiri ki ẹngwụ aa zi ọ. Irẹsha ẹzẹna shirẹ ọnọ vi Isu; di Ineeku ọrọkọtọ vatụra a. Aa si ụmọ yụ wa tụra ocheẹna ẹshẹ, ki ẹ si itakovi, ọshashi (ụngwẹ) ọnri ikụ, ọnri uye ụnọmi ọshimi nini ki ẹẹ siọ wụ aza vaa sha. ⁹ Ẹfi ọni Oziatẹmẹ fụ ẹsụnẹ ọfụụshi, dim re ifẹ aza ana wụ fụvọ irẹyi Oshomoshi ọnri ivenu ọnẹ sụvọza ini afụafụ ọpẹtẹ. ¹⁰ Dẹ si ọngwẹ tụẹba, de nowu ka, "Oshinọyi tụra isa bo, Ọnini ọnri Irẹiza, ishii vee zi wu nee tu kẹ, dụ wa va siatọ yi anẹshẹ nin, fụvọ anya ayi ẹnẹẹ mishi? ¹¹ Inaani da si auru ọvụoọvụ yi ọza ọnyọnya aanini; da kaa yụ wa ki ẹ dinẹ ne tu ụmẹ ana va sii wụ ezida vene ẹngwụ aanini, ẹnyara aanini ini ọnọru shi ini ọnyẹnẹ ana vaa wụ vene a mẹmẹ wụ wa. ¹² Ẹfi ọni Oziatẹmẹ fụ ẹsụnẹ ọfụshinọnyi, maa zamẹtẹ, dim re ki ẹtẹ o sheni, dọ judodo. Di ọyi vara oozi vene ita ụba ojoji, ụfẹ ana si gụraba doo vi poo venebiri anya. ¹³ Di ụzọmi nini ana yi ẹbẹẹba aa javọ nyẹtẹ, vene ki ashi ọshimi o nee sheni ọchi ifigi, di ẹtụtụ ẹzẹzẹ ee fuobe shiẹtẹ. ¹⁴ Ovurukutu do vurii veni upoto ana kara. Irẹsụfa keekere ọnri ẹtẹ ọnri enyi varakara bo vene jesi fini udi aanini. ¹⁵ Ini ụmavọ, Oshinọyi ẹshẹ nin, ọneeyiyẹ nin, oshirẹkụ nin, opisa nin, ọnụkata nin, aza bo, shi ọrishi ọnri ozireshi vene ne vutẹ tụni ụtafa ọnri afụrẹta ini ifege. ¹⁶ Dẹ kaa yi irẹsụfa ọnri irẹta ana yi izọ ka, "Zina va nya yi! Si yi tẹ fini ọvidi ẹzẹna yatụ tụra ogede ọnri ọikụ Oziatẹmẹ. ¹⁷ Fụvọki ọkụshi ọikụ ọbani aanini ọ vẹ. Ẹnẹ va zụụ dinẹ kẹ?"