¹ Inaani dim ze re angẹni ọsa ana bani nyangada ki oo chi fụrẹ ẹbẹeẹba vẹ. Dọ si egushi ma-auru chire, di ọgazi yi ẹbẹẹba iresụ aani. Di eyi aani vene ọyi, di afụ aani vene ira venebiri ọshẹ. ² Dọ si iwe ụpa oweyi ọna fụ sha chaụvọ, dọ si ụfụ ụvọọri aani tụra irefu, dọ si ụfụ ụvọọfa aani tụra ẹtẹ. ³ Dọ si ọngwẹ tụẹba nowu vene idu. Ẹfi ono nowu, di apavana Oshomoshi oze ishimba ẹnẹ karutu, dẹ kareyi anaa wụ tụẹshẹ. ⁴ Apavana Oshomoshi oze ishimba ẹnẹ mẹ karẹyi tụẹshe, mvaa chẹrisa, dim wụ ọngwẹ fụri ẹbẹẹba ka, "Teni irẹyi ọni apavana Oshomoshi ishimba ẹnẹni ka ẹtẹtẹrẹ, asọ nyi ẹzẹnụụ kaa yi. Asụụ chẹrẹ ẹ tẹtẹ." ⁵ Inaani, di angẹni ọnim re ki ọ dinẹ tuni irefu ọnri ẹtẹ, tana ụvọọri aani shi ẹbẹẹba. ⁶ Dọ si ẹzẹnọ ọviki ọ ra poro pooro, ọ na mẹ ineeku shi isa ana yinaani bo, dọ mẹ ẹtẹ shi isa ana yinaani bo, dọ mẹ irefu ọnri isẹnẹ yini irefu bo, dọ sheku ka, "Ọi kụa nyi otiturafụ naama. ⁷ Ama ini ọkụshi ọni angẹni ọfụshimba re vee fu ọpani aani, isa oshishozeyi Oshomoshi anatẹ yi yi, vaa vi ọmimẹ, vene ọ mẹ kaa yi ezida ọnri ọkisẹ aani nin." ⁸ Di ọngwe ọnim wụ fụri ẹbẹẹba zẹ karẹyi yi mi ka, "Waa na, na si iwe ụpa ọna fụ tẹtẹ, ọna yini ụvọ angẹni ọna si ụfụ ọnya tụra irefu, di ụfụ aani ọsa tụra ẹtẹ. ⁹ Inaani dim ne tu angẹni ọnọ ki ọ si iwe oweyi ọnọ yi mi. Dọ kaa yi mi ka," Di iwe ọnọni dụ wa ri ọ. Ọ vaa nyirẹyi ininẹ awụ, ama o vee shine ini irenu awụ vene ẹfụ." ¹⁰ Dim dọ iwe oweyi ọnọ fini ụvọ angẹni ọnọ, dim ri ọ. Oo shine vene ẹfụ ini irenu ami, ama mmẹ ri ọ da, di inẹ ami aa nyirẹyi. ¹¹ Inaani, di ọza ọnya kaa yi mi ka, "Ụ bẹdọ zẹ kisẹ inọpati aza, irẹkụravabẹ, irarẹ, ọnri Oshinọyi nini."