¹ Aa si ọchi ofoku dẹẹrẹ ọnya yi mi, da ki ma si ọ mẹ ọchi ana sii mọ isa. Da kaa yi mi ka, "Kwẹẹtẹ dụ wa mọ itẹmpụrụ Oshmoshi ọnri ọpẹtẹ aani, ọnri ẹnẹnaa fẹkẹ Oshomoshi inaani. ² Ama, asụụ mọ ofenje itẹmpụrụ, fụvọki a si ọ yi Ijẹntaini nini da. Ẹ vaa si ụfẹ ẹbẹrẹẹva tụrẹẹva kụfụụ shi ẹtẹ irẹkụra ọnini. ³ Mvaa si ụmọ yi onivenu ami ẹviva ki ẹ si ọ kisẹ ini ekushi akashinọnyi tụrẹbẹrẹta, dẹẹ kụ isẹmsẹ shi ẹngwụ. ⁴ Onivenu ẹnẹni ẹnẹ vi ọchi oniivi nini ọnri ọchi irakọpa ẹẹva ana dinẹ tụni ọvidi Ananyiẹshẹ. ⁵ Aviki ọ nyi ọnivi ana vaa misa ọshimii shi wa, ira dọọ jinẹ fineenu aanini, dọọ rụwaira. Ọzọnyọnyi ene ree si ki ọnọ mẹ ọshimi ka wa na vana vaa si ira ọnọnii wụ. ⁶ Onivenu ẹnẹni ẹẹ nyi ụmọ ene vee si gu ovurukutu shi, doti asi orishi zụ ini ẹfi ẹnẹ va sii kisẹ. Ẹẹ nyi ụkata ẹnẹ va sii vara enyi tụni anya, ọnri ụkata ẹnẹ va sii kụ ẹkatẹngwụ renyi renyi vẹ ẹshẹ ụmẹtụrụmẹ ene ree si. ⁷ Ẹfi ẹnẹ raa divenu da, uye ana vaa tụụ fini ụsi rọm rọm vẹ, vee pe waa kụrẹkụ. Ọ vaa fụrẹkụ ọnọ, dọọ wụ waa vasha. ⁸ Oku aanini vaa sụtụ gụ tuni oze irẹkụra ọbani (ọnaa si ẹfi ẹnyi shi Isodọmụ ọnri Ijipti) irasha ọna ya kani Ananyiyi aanini tụni ọchi avashi. ⁹ Aza renyi renyi, fụri irasha renyi renyi, ana nyi irare renyi renyi, fụri irekura renyi renyi, vaa si ẹkụshi ẹta rẹjiji vee re oku aanini. Ẹ zaa zẹẹ ki e ne wa tuni irikuta. ¹⁰ Ẹnẹna ra inẹẹsụ ẹshẹ ọnọni vaa jụjẹ, dẹẹ rupe tụa wa irẹsụ. Dẹẹ vana si isa tuu shi ẹngwụ, fụvọki ọkisẹ ẹviva ẹnẹni ẹẹ kụọ kata ẹnẹna ra inẹẹsụ ẹshẹ ọnọni ẹngwụ. Onivenu ẹẹva ẹnẹ ẹ sha kwẹẹtẹ fiini isu ¹¹ Ama, inaama ẹkụshi ẹta rẹjiji, di ifẹ ọtitụ vẹ fiidi Oshomoshi va ngwụ wa ẹngwụ, dẹẹ sha kwẹẹtẹ dinẹ. Angwashi ọbani vaa ngwụ ẹnene re wa ẹngwụ. ¹² Dẹẹ va wụ ọngwẹ ọbani fụrẹ ẹbẹẹba ka, "Shirẹ vẹ izọni!" Dẹẹ va shirẹ nẹbẹẹba na ngwụni egushi, di ọnivi aanini ee re wa. ¹³ Ini iwakati ọnọ, ẹtẹ vaa jagodo ọnọ si vi ki oche-ẹwu irẹkụra ọbani ọnọ vee wu. Aza akawụ oze ẹẹta tụra akashi (7,000) ene vee su ini ojagodo ọnọ, angwashi dọọ za ẹnẹna javọ rẹsụrẹsụ, dẹẹ sụgaa yi Oshomoshi ineeku ẹbẹẹba. ¹⁴ Okatẹngwụ ọfụụva ọọ zi parafu da. Re! Ọkatẹngwụ ọfụụta aa vẹ inọfirọfira. ¹⁵ Umotu, di angẹni ọfụshimba fu ọpani aani; inaani di ọngwẹ ọbani karẹyi ineeku ẹbẹba, dọ ka, "Ijọva ẹshẹ ọọ si vara ijọva Ananyiyi shi ọi Ikristi aani. Ọ vaa ri oshinọyi poro pooro." ¹⁶ Inaani, di azẹkụ ofurẹna ana yatụ tuno ogede inọvidi Oshomoshi vakuẹtẹ. Dẹẹ fẹkẹ Oshomoshi. ¹⁷ Dẹ ka, "Yaa si avọkụ yụ wụ, Ananyiyi Oshomoshi Ọnụkata bo, ana yinaaani ọmẹyani, ana yinaani vẹvẹvẹ, fụvọki waa si ụkata ọbani awụ fụrẹkụ da, dụụ shirogede da. ¹⁸ Irẹkụravabẹ nin bo vọnọ kụayi, ama ụmẹ ọikụ awụ o si tu. Ụmẹ o si tu ki a mishọọji yi enene fu su, dụ wa si ọgụ yi ezida awụ ana vi ọkisẹ yụ wa, ẹnẹna vi anọdọwụ, shi enene shangwa irẹsha awụ, shi onriwa, shi azewei shi azẹbani. Ẹfi o si tu ki enenee du ẹshẹ, ku we vuwairi." ¹⁹ Inaani, da na itẹmpụrụ Oshomoshi ana yi ineeku ẹbẹẹba sha, dim re apoti irẹzẹ inaani. Inyanya dọọ ri vio, apavana Oshomoshi dọọ rinyẹrẹ, apavana Oshomoshi dọọ karutu, ẹtẹ do jagodo, di orishi ee ne irẹta.