¹ Mee re ọtẹrẹwa obani ineeku ẹbẹẹba: ọnyẹnẹ ana si ọyi me auru chire, di ụfẹ yini ẹpẹẹpẹtẹ afụ aani, do ku ade ana nyi ụzọmi ẹwụrẹva. ² Doo zirẹyẹ, dọọ barẹyẹ, doo rumanya ini irẹyẹ ọnọọ ba. ³ Umotu, dim ze re ọtẹrẹwa ọsa ineeku ẹbẹẹba: Re! Mee re idụragọni ọvivi ana bani nyangada, dọ nyiirẹsụ ishimba ọnri ẹpani ishimba, do ku ade ishimba tụnẹẹsụ. ⁴ Dọ si omu aani shi oche-ẹta ụzọmi ẹbẹẹba nin kụra, doo newa vaa shiẹtẹ. Idụragọni ọnọ, dọ dinẹ pe ọnyẹnẹ anaa barẹyẹ, doo zi ki ụmẹ ọnọ raa mozi da, doti ọnọ za ozi ọnọ ma ri. ⁵ Di ọnyẹnẹ ọnọ ma oziọnọrụ; oziọnọrụ ana vaa si orobo enyisụẹ mẹ ijọva tụra irẹkụravabẹ bo ana yi ẹshẹ rẹsụ. Daa va si ụkata tụ ozi aani fụrẹụvọ na yi Oshomoshi, na ngwụni ogede aani. ⁶ Di ọnyẹnẹ ọnọ zue na ngwụni ụnọmi, izẹni Oshomoshi teni irasha tẹtẹ yọ, doti azụ si ẹkụshi akashinọnyi tụre ẹbẹrẹtata sio ọnyi-ozi. ⁷ Ọmeyani, irẹkụ yi ineeku ẹbẹba. Imaikẹni ọnri angẹni aani nin, dee pe idragọni ọnọ kụrẹkụ; di idragọni ọnri angẹni aani nin ẹn zẹ veyi ikụrẹkụ tu Imaikẹni ọnri angẹni aani. ⁸ Ama ụkata idụragọni ọzi fụ ana vaa mẹ ki ọ fụ irẹkụ. Fụvavọ, di ọn ri angẹni aani rei ve ku re irasha ya ineeku ẹbẹẹba. ⁹ Idụragọni ọbani ọnọ, ana vi isẹchichi ana yinaani fụrụmọrimọ, ọnaa shi Eshu navẹki Isatani, anaa ji ẹshẹ bo vene, de ne e chi va nyẹtẹ, shi ọn shi angẹni aani bo. ¹⁰ Inaani, dim wụ ọngwẹ ọbani fụri ineeku ẹbẹẹba: "Ọmẹyani, ọdidọzatụ ọ ngwụ da, shi ụkata, ijọva Oshomoshi ayi, ọnri ụmọ ọni Ikristi aani nyi. Fụvọki, ee ne ẹnẹnaa daaku ẹnyara ayi anọdọwụ nini, nyẹtẹ. ọni ọnaa si ọọdụ shi irafụụ daaku wa inọvidi Oshomoshi. ¹¹ Ẹẹ fụ irẹkụ ọnọ zirẹngwụ anya Oziatẹmẹ ọnri irenube aanini inọpati Ijesu, fụvọki ezi sirẹyi ẹshẹ aanini shi ẹ mẹ dakayẹ ki a va zụụ wụ ẹni fụvavọ. ¹² Fụvavọ, waa jụjẹ, ẹwụ ẹbẹẹba bo, shi ẹnẹna yinaani bo. Ama, ẹwụ ẹtẹ ọnri irefu, oo duwuku nini, fụvọki eshu o chi vẹ ve tu wu nini da. Ọikụ ọshimi o shi o inẹ, fụvọki ọọ yẹ ki ẹfi che ọnọn nyi. ¹³ Ẹfi ọni idragọni yẹ da ki ee ne ọni va nyẹtẹ da, dọọ dụ ọnyẹnẹ ana ma oziọnọrụ aavọ. ¹⁴ Ama da si avaka ẹviva unomi ibangụrụ yi ọnyẹnẹ ọnọ, doti o zu shira na ngwụ irasha ene teni tẹtẹ yọ tụni ụnọmi. Irasha ọnọni ọna va yee sio ọnyi-ozi mẹ irayi ẹta rẹjiji --- da si ọ fụri izọni isẹchichi ọnọ ya. ¹⁵ Isẹchichi ọnọ dọọ va enyi fini irenu aani vene ọshara enyi doti ọ zụ si ọ kụ ọnyẹnẹ ọnọ naa. ¹⁶ Ama di ẹtẹ mọgụvọ yi ọnyẹnẹ ọnọ, di ẹtẹ sharenu, do fu enyi ọni idụragọni ọnọ va shiẹtẹ fineenu aani. ¹⁷ Inaani, di idụragọni aa mọikụ ọshimi shi ọnyẹnẹ ọnọ, dọ kụ irẹkụ giri ne tu ezi-irama ọnyẹnẹ ọnọ, ẹnẹnọvi ki ẹ vaatụra ụmọ Oshomoshi, dẹ zụfụshiẹtẹ ini irenube inọpati Ijesu. ¹⁸ Inaani, di idụragọni dinẹ tụni ezi ini ụtọ irefu ọnọ.