¹ Inaani, dim re ineeku ọwọọwa ọnri ẹshẹ ọwọọwa, fụvọki ineeku ipaapa ọnri ẹshẹ ipaapa ẹẹ parafu da, shi irefu nyẹmbẹ ọi kụ yinaani. ² Mee re irẹkụra ọnini, Ijerusanẹmụ ọwọọwa one chi fụri ẹbẹẹba vẹ fiidi Oshomoshi, de teni ọ ẹngwụ tẹtẹ vene ozioshi ani ẹngwụ sẹrẹ onee zi ọva aani. ³ Dim wụ ọngwe ọbani ọnya fiini ogede ọnọ ka, "Re! ireshi ọni Oshomoshi ra, ọ vẹ va ya pe anẹshẹ; Oshomoshi vaa ra pe wa. Aza Oshomoshi ọnẹ vaa vi, Oshomoshi ọn nyẹmbẹ vaa ya pe wa, dọọ vi Oshomoshi aanini. ⁴ O vee nye ẹgọ fụrẹ wa eyi, isuọwụọza nyẹmbẹ ọi kụa yinaani, shi ọkikarẹsụ shi, navẹki une, navẹki isa a zi ọza. Isa ọkụkụ bo ẹ parafu da." ⁵ Di ẹzẹna yatụ tụra ogede ka, "Re! maa vara isa bo tụni ọwọwa." Dọ ka, "Chẹrẹ ọnọni tẹtẹ fụvọki irẹyi ẹnẹni vi irẹiza ọna va zụụ dọrenu. ⁶ Dọ kaa yi mi ka, "Aa mẹ isẹnẹni dạ! Ẹmi ọnọ vi Aafa ọnri Omega, Ipaapa ọnri Ọikọta. Ẹzẹni oonyi raa kụ, mvaa si enyi ọfẹ yọ fini enyi osue ọnaa si ẹshẹ yi aza. ⁷ Ẹzẹna ra fụrẹkụ vaa kụ isẹnẹni bo ogu, dim vi Oshomoshi aani, dọn zẹ vi ozi ami. ⁸ Ama anangwashi nini, ẹnẹna razi nyi ọdọwụ, ẹnẹnaa mẹ isaanyisi, ọwụọza, ọsẹrẹka, ọfẹkẹ ori, anẹbe nin, ipa aanini vana yini ira ọrọkọtọ ọna nyi emi ọyi ọnaa zira; ọnọni ọnọ vi isu ụpọfụụva." ⁹ Di ọnya ini angẹni ishimba ọna za ọnya ishimba one shi yi ọkatẹngwụ ishimba ọikọta, ve tu mi, dọ ka, "Waa vẹ. Mvaa si ọnẹ zụ wụ, ana vi ose Oziatẹmẹ." ¹⁰ Inaani, dọ si mi ini ifẹ na shirẹ irẹsụfa ọbani, dọ si irẹkụra Ijerusanẹmụ ọnini one chi vẹ fụri ineeku ẹbẹẹba idi Oshomoshi zụ mi. ¹¹ Ijerusanemụ ọnyi ụga Oshomoshi, ọnri ẹtofeyi aani aa danyerenyere vene ireweyi ẹbani ẹbani, dọ simai irẹta ene vene oreyi neene ọnaa shi Ijasipa. ¹² Ọvọ aani ọbani, dọ nẹba, dọ nyi ọchiọfọ ẹwụrẹva, di angẹni ẹwụrẹva yini ọchiọfọ aani ọzọọza. Da chẹrẹ irẹsha anda Isrẹni ẹnẹwụrẹva tụnaani. ¹³ Di ọchiọfọ ẹẹta yi aka izẹni ̣ọyi jinẹ fụrẹ. Ọchiọfọ ẹẹta yi aka ẹbẹẹba, di ̇ọchiọfọ ẹẹta yi aka ẹteẹ̣tẹ, di ọchiọfọ ẹẹta yi aka izọni ọyi yaa ngwụẹtẹ. ¹⁴ Ọvọ irẹkụra ọnọ nyi oshiẹtẹ ẹwụrẹva, da chẹrẹ iresha ọnitụ ẹwụrẹva Oziatẹmẹ tụnaani. ¹⁵ Di ẹzẹnee pe mi karẹyi za ọchi ana sii mọ isa ana si igoonu mẹ chaụvọ, ọnọ va sii mọ irẹkụ̣ra ọbani ọnọ, ọchiọfọ aani ọnri ọvọ aani. ¹⁶ Irẹkụra ọbani ọnọ vana da tụni ẹtẹ ọni irakasha ẹnina aani vi ẹbẹẹbẹ; ọmẹ gana, avọ ọmẹ zẹ gi gọdọ. Dọ si ọchi anaa si mọ ẹtẹ, dọ mọ irẹkura ọbani ọnọ, dọ si vi akawụ akawụ oze ishinọnyi ọni ụgọdọ aani vi (ugọdọ, ugana, ọnri ọninẹba aani, dọ viki ẹbẹẹbẹ ọnọ vi) ini Isitadiya. ¹⁷ Ọ zẹ mi mọ ọvọ aani, di ụrata ọvọ ọna si siọ kẹtẹ vi Ikubiti ẹchẹshi ọnri ẹbẹrẹva tụra ẹẹna, amẹ si ụvọ ọza mọ ọ (avọ ọni angẹni ọnọ mẹ zẹ mi mọ ọ). ¹⁸ Ọvọ aani vọna si ijasipa da, da si igoonu da irẹkụra ọbani ọnọ, ene vene oreyi neene. ¹⁹ Oshiẹtẹ ọvọ irẹkụra ọnọ vọna si irẹta ireweyi renyi renyi teni ẹngwụ. Ọi ipaapa vi ijasipa, ọfụụva vi isafaya, ọfụụta vi ageti, ọfụụta vi ẹmiradi, ²⁰ ọfụụshi vi ọnisi, ọfushinọnyi vi ikanẹriyani, ọfushimba vi ikirisoriti, ọfushinta vi ibẹriri, ọfushinna vi itọpazi, ọna gụ ẹẹwụ vi ikirisopirasi, ọna gụ ọ ẹwurọnya vi ijasiniti, ọna gụ ọ ẹwụrẹva vi amitisiti ²¹ Oze ọbani ẹwurẹva vi ireweyi renyi renyi ẹwurẹva; ọnyọnya inoze ọbani ẹnẹ vana si ireweyi ọnya mẹ. Igoonu ebebani ana nyi neene vene oreyi ọna si tụ oze irẹkụra ọbani ọnọ. ²² Me zi re itẹmpụrụ ọnyọnyi ini irẹkụra ọnọ, fuvọki Oshomoshi Ananyiyi Ọnụkatabo ọnri Oziatẹmẹ ẹne ̣vi itẹmpụrụ irẹkụra ọnọ. ²³ Ọzi nyi isaa si ọyi navẹki ụfẹ mẹ ini irẹkụra ọbani ọnọ fụvọ ẹtofeyi, ọnri ụga Oshomoshi ana sha tụra irẹkụra ọbani ọnọ, di Oziatẹmẹ vi ọpa aani. ²⁴ Irẹkụravabẹ keekere vana vaa zụsẹ zirẹngwụ ẹtofeyi irẹkụra ọbani ọnọ. Oshinọyi ẹshẹ ọnọni nini vaa si ifaari aanini ngwụni izọ. ²⁵ Azẹzee chire ọchiọfọ irẹkụra ọnọ inụmọọdụ, ọi vanaa nyi irafụ izọ. ²⁶ Ẹ vaa si ifaari aanini ọnri ụbani irẹkụravabẹ keekere ngwụni irẹkụra ọbani ọnọ, ²⁷ ọnri ki ọzaa nyi isọnyọnyi ọna nyi ẹvụvụ ana vaa ngwụnaani poro. Shi ẹnẹna mẹ isụshiọọnyi, shi ọjiọzavene nin ẹ zaa ngwụnaani, ọchishi ẹnẹna chẹrẹ irẹsha aanini tụni Iwe Ẹshẹ Oziatẹmẹ.