¹ Inaani, dim re angẹni o nee chi fụri ẹbẹẹba vẹ; dọ za ụkọkọrọ ụsi ana razi nyi ẹgẹ chaụvọ, dọ zẹ za ẹba ọbani chaụvọ. ² Ọ gụ idragọni ọnọ, ana vi oshuku isẹchichi, ọnạ vi eshu navẹki isatani, dọ za a chire mẹ irayi akashi. ³ O ne e ngwụ ụsi ana razi nyi ẹgẹ, do gu o, dọ si ẹsụnẹ sụnẹ ẹ. Ọ maan vi fụvọ di asọ kụ roze ji aza vene netu ki irayi akashi ọnọ ọ parafu. Inaama ọnọ, a vaa naa tụ ini ẹfi keere. ⁴ Inaani, dim re ogede ẹrụrụ. Ẹnẹna yatụ tụni ogede ẹnẹ vi ẹnẹna si ụmọ yi ki ẹ siọọ mishọji. Dim ze re ẹnẹna darẹsụ fụvọki ẹ divenu inọpati Ijesu ọnri irẹyi Oshomoshi. Ẹ zi fẹkẹ uye ụnọmi ọnọ navẹki ụmama aani ana bẹ, de ze yi yi ki ẹnẹ zi dọ ọtẹrẹwa aani tuni ibe navẹki inụvọ. Ẹ varama vẹshẹ, dẹ bẹrẹ Ikristi mijọva mẹ irayi akashi. ⁵ Azẹnẹ su anavọ ẹ zi sha kwẹẹtẹ poro netu ẹfi ọni irayi akashi mẹ parafu. Ọnọni ọno ̣vi ọshisha kwẹẹtẹ ipaapa. ⁶ Ẹdabẹrẹ ọnri ọnini ọnọ vi yi ẹnẹna bẹ tụni ọshisha kwẹẹtẹ ipaapa. Isu ụpọfụụva ọzi nyi ụkata inẹẹsụ azẹnẹni. Arufa Oshomoshi ọnri arufa Ikiristi ọnẹ vaa vi, dẹ va si irayi akashi bẹrẹ mẹ ijọva. ⁷ Irayi akashi ra si parafu, a vaa na eshu tụụ fiini ijaaru ana zachire tụ. ⁸ Ọ vaa jinẹ tụra na ji anẹshẹ nin vene ini aka-ẹnina ẹshẹ --- Igọgi ọnri Imagọgi --- doti ozu pere wa gụ zi irẹkụ. Ẹ vaa rụrụ vene ezi ini irefu. ⁹ Ẹ ziọ shirẹ na ngwụ oziẹshẹ ana yini ẹshẹ ọnọni keekere, dẹ varakara anọdọwụ nini izẹne pere tụ, ini irẹkụra ono sirẹyi aani. Ama, di ira chi fụri ẹbẹẹba, do vuwa irii. ¹⁰ Eshu ọna jụ wa vene, vọne ne ngwuni ira ọrọkọtọ ọnaa ri ọnri emiọyi ọnaa ri vioo, izọ one ne uye ụnọmi ọnri arụfa anapẹ ngwụ. A vaa mụyaa rụ wa ọọdụ shi irafụ poro pooro. ¹¹ Inaani dim re ogede ọvụọvụ ọbani nyangada, shi ẹzẹna yatụ tụnaani. Di ẹtẹ ọnri ineeku ẹbẹẹba kụafụ kuechi, de zue fini ọvidi aani, ama e zi re irasha ngwụ. ¹² Dim re ẹnene fu su --- azẹ̣bani nini ọnri aza kẹnẹ kẹnẹ --- dẹ dinẹ tụni ọvidi ogede, da fụ iwe nin shiẹtẹ. Umotu, da zẹ fụ iwe ọsa tẹtẹ --- Iwe Ẹshẹ. Isa ọna chẹrẹ tụni iwe ọnọ ọnaa sii mishọọji yi ẹnene fu su zirẹ ụkọrụvọ ọzọọza. ¹³ Di irefu tọmọ ẹnene fu su ana yinaani jinẹ vẹ. Di isuọwụọza ọnri ineeku ọrọkọtọ tọmọ ẹnene fu su ana yininaanini jinẹ vẹ, da mishọọji yụ wa zirẹ ụkọrụvọ aanini. ¹⁴ De ne isuọwụọza ọnri ineeku ọrọkọtọ ngwụni ira ọrọkọtọ. Ọnọni ọnọvi isu ọfụụva --- ira ọrọkọtọ. ¹⁵ Aaviki ọ nyi ẹzẹni irẹsha aani razi yini Iwe Ẹshẹ, dee ne e ngwụni ira ọrọkọtọ.