¹ Inama isẹnẹni bo, dim wụ ọngwẹ ene vene ọngwẹ azẹrụrụ fineeku ẹbẹẹba ka, "Alleluya. Ọdọtu, ụga ọnri ụkata vi ayi Oshomoshi ayi. ² Ishọọji aani vi irẹiza, dọ vọrọ, fụvọki ọ mishọọji yi ọsẹrẹka ọbani ọnọ ana kụ ivi itutu ọmimẹ para anẹshẹ ini itutu asụ aani. Oo siatọ anya ezida aani ọni ọsẹrẹka ọnọ si ụvọta aani jishiẹtẹ da." ³ Dẹ zẹ karẹyi ụpọfụva ka; "Alleluya! Areyi aani tụụ shirẹ fini ẹngwụ aani poro pooro." ⁴ Di azẹkụ ofurẹna ẹnẹ ọnri isẹẹna ona nyifẹ̣ ẹnẹ vakuẹtẹ, dẹ si irẹsụ kẹtẹ, dẹ fẹkẹ Oshomoshi ọna yatụ tụra ogede. Dẹẹ kaa ka, "Aami. Alleluya!" ⁵ Inaani di ọngwẹ fiini ogede ọnọvẹ, dọ ka, "Sụga yi Oshomoshi, ẹwụ nin ezida aani bo, ọna nyi angwashi aani, shi ẹnẹna razi zika bẹrẹ, shi ọnụkata nin." ⁶ Inaani, dim wụ ọngwẹ one vene ọngwe azẹrụrụ, do vene ọkụ enyi ọrụrụ, ọnri apavana Oshomoshi ọnaa karutu, di irasha bo e sheni, dọ ka, "Alleluya! Fụvọki Ananyiyi ọ shirogede, Oshomoshi, ọnaa mijọva tụra aza bo irẹsu. ⁷ Navọ yaa jụjẹ, di inẹ ayi oo shine kokoro, di yaa sụga yI Oshomoshi fụvọki upe ọsisi ọnẹ ga Oziatẹmẹ o si tu, ose aani o teni ẹngwụ tẹtẹ da. ⁸ A sioze yọ ki o chire auru ininẹni ọnaa jira, dọ ni ẹtẹrẹ, do zoza kokoro" (fụvọki ininẹni ozoza ọ dinẹ yi ọmimanasẹrẹ aza ọnini). ⁹ Di angẹni ọnọ kaa yi mi ka, "Chẹrẹ ẹ tẹtẹ ka, Ẹdabẹrẹ ọno ̣vi yi ẹnẹna tushi ki ẹẹ vẹ ini ọnẹ ọsisi Oziatẹmẹ." Dọ zẹ kaa yi mi ka, "Ẹnẹni vi irẹyi irẹiza Oshomoshi." ¹⁰ Dim vakụẹtẹ tụni ọvidi aani, di maa vaa fẹkẹ ẹ, ama dọ kaa yi mi ka, "Navọ asụụ vọvọ mẹ! Ẹmi nyẹmbẹ vi ozida vene wu, dim zẹ vi ọnyara awụ ọna sụvọza ivenu Ijesu. Fẹkẹ Oshomoshi, fụvọki ivenu inọpati Ijesu vi ifẹ ọkika isẹ." ¹¹ Inaani, dim re ka, ineeku ẹbẹẹba ọ fụ sha, ma zamẹtẹ, dim re ovurata ọvụọvụ. Ẹzẹna shirẹ ọnaa shi anadọrenu ọnri irẹiza. Oze ọna vọrọ ọnọ zii mishọọji, ọnọ ya zẹ kii kụrẹkụ. ¹² Irii aani o vene ira ọnaa za, di ade ọrụrụ yinẹẹsụ aani. A chẹrẹ irẹsha tụ ẹngwụ, ọnọ vi ki ọzi nyi ẹzẹna yẹ, ọchishi ọn renya ọnọ yẹ. ¹³ O chire auru ọna tụ fini anya; irẹsha aani vi Irẹyi Oshomoshi. ¹⁴ Di angẹni irẹkụ ana yineeku ẹbẹẹba vatụra a, de chire auru ininẹni ọvụọvụ ọna ni. ¹⁵ Di itakovi ọna rẹ kokoro tụ fineenu aani; ọni ọnọ vaa ka ẹkụravabẹ bọ, dọ si ụvọ enyisụẹ mijọva tụrawairẹsụ. Ini okoro eche ọikụ ọbani Oshomoshi ọnọ ya kụọrọ ọikụ ọbani ani. ¹⁶ Da chẹrẹ irẹsha ọnyi tụni auru aani ọnri usi aani: "Oshinọyi oshinọyi nin bo, ọnri Ananyiyi ananyiyi nin bo." ¹⁷ Dim re angẹni ọna dinẹ tụni ọyi. Dọ si ọngwẹ tụẹba karẹyi yi unomi nin onee shira inẹbẹẹba ka, "Waa vẹ nini, pere ẹngwụ gụ nin fụvọ upe ọbani Oshomoshi." ¹⁸ "Waa vẹ, wa va ri uye oshinọyi nin, uye oshirẹkụ nin, uye ẹnẹnaza irẹkụra kuokuvọ, uye ovurata ọnri ẹnẹnaa shirẹ wa, ọnri uye irẹkụravabẹ bo, ọnri uye aza bo, shi ẹnẹna dọtu da ọnri ọrishi, ẹnẹna razi nyi ọmimẹ ọnri ọnụkata nini" ¹⁹ Mee re uye inavi ọnọ ọnri oshinọyi ẹshẹ nin ọnri ọkurẹkụ aanini. Ee pere ẹngwụ gụ doti e roze pe ẹzẹna shirẹ ovurata ọnri ọkurẹkụ aani kụrẹkụ. ²⁰ Da va za uye inavi ọnọ ọnri ọkisẹ anapẹ ọnaa mẹ ẹtụravọ inọvidi aani. Ẹtụravọ ọnoni vọnọọ sii ji ẹnẹna dọ ọtẹrẹwa uye inavi ọnọ, dẹẹ fẹkẹ ụmama aani, vene. Ẹnẹviva vone vee ne reyi reyi na ngwụni ira ọrọkọtọ ọna ri ọnri emi ọyi ọnaa rira. ²¹ Da si itakovi ọnaa tụụ jinẹ fineenu ẹzẹna shirẹ ovurata ọnọ wụ ẹnẹna vọ. Di unomi keekere vẹ va ri uye aanini.