¹ Inaama isẹnẹni bo, dim re angẹni ọsa enee chii fụri ẹbẹẹba vẹ. Ọ nyi ụmọ kokoro, di ụga aani sha etofeyi tụra ẹshẹ ọnọni. ² Dọ si ọngwẹ tụẹba nowu ka, "Ibabirọni irẹkụra ọbani ọneeyiyẹ ọnọ, ọ si ẹdụ sụ, ọ si ẹdụ sụ! Ọọ si ẹngwụ aani vara ireshi azeeshi nini, irasha ovivutẹ yi ifẹ azeeshi tụrifẹ azeeshi, irasha ovivutẹ yi unomi turunomi ọna razi ni, ana nyọzishẹrẹ. ³ Fụvọki ẹshẹ keekere e fu ini eche irẹka ọsisẹ aani. Oshinọyi ẹshẹ keekere nini e pe e mẹ itutu asụ da. Osofu ẹshẹ ọnọni ẹ vara opisa zirẹgwụ ụkata ẹshẹ irẹka ọsisẹ aani." ⁴ Inaani dim zẹ wu ọngwẹ ọsa fineeku ẹbẹẹba ka, "Tụ jinẹ fiinẹngwụ aani, ẹwụ nin aza ami, doti asụụ ne pe e nyụvọ tụni aichama aani nini, doti asụụ na kụ ẹngwu kụ ikụ aani ana garashi nini. ⁵ Aichama aani o shi na ka ineeku ẹbẹẹba, ana mẹ ki Oshonoshi ọ tamayi isọshimi ọnọ mẹ bo. ⁶ Si o atọ vene ọ mẹmẹ si aza atọ, Dụvọ oze ẹva tụni atọ ọnụụ ve si o ini isọshimi ọnọ mẹ bo; ipa ọnọ si ka eche ụyọọri yi aza, vọọ mẹ avaavọ oze ẹẹva yọ fu. ⁷ Vene ọ mẹmẹ si ẹngwụ aani tuẹbẹba, dọọ mẹshẹ avụkavụka, avọ ụ mẹ ra si ụyọọri yọ nin, vabẹrẹ inoodu. Fụvọki oo ro ini ọtụtụrụma aani ka, 'Oshinọyi ana shirogede, ana nyi ụmọ ọnim vi; ma zi vi osoku, ma zaa si eyi gẹrẹ orere.' ⁸ Fụvavọ ini ọkụshi ọnya, ikụ ọnri ụyọọri aani vaa vẹ: isuọwụọza, orere ọnri ọshashi. Ira vaa ri ọ ira vaasha bo, fụvọki Oshomoshi Ananyiyi vi Ọnụkata, ọni ọnọ vaa mishọọji yọ. ⁹ Oshinọyi anẹshẹ nin ene pe mẹ itutu asụ, dee pe e mẹ imọrimọ tụri imọrimọ, vee sune, dẹẹ jiorere, ụmẹ ene ze re areyi anni ọnaa shirẹ nẹbẹẹba ẹfi ọnọ ra rira. ¹⁰ Ẹ vaa dinẹ tụrasha ọgọdọ, di angwa shi wa, ụmẹ ene ze re ụyọọri aani, dẹẹ ka, "Nyeiruwa, nyeiruwa, ẹwụ irẹkụra ọbani ọni eyi yẹ, Ibabirọni, irẹkụra ọbani ọna maan nyụkata aavọ! Ini iwakati ọnya chọ di ụyọọri awụ maan dinẹ tu wu." ¹¹ Osofu ẹshẹ ọnọni nin e sune yọ, di ẹngwụ aanini vashi, fụvọki ọi ku nyi ẹzẹnaa shi isa-ofu anni--- ¹² isa-ofu vene igoonu, isiriva, ireweyi renyi renyi, ininẹ ozoza, ita ipọpụrụ, ita siriki, ita ovivi, ọchi eturari renyi renyi, ọnya ụmọ renyi renyi, ọnya ọkatarishi renyi renyi ọna si ibọrọnzi, enyisuẹ, irẹta ọvụọvụ ọkatarishi nini mẹ, ¹³ eturari isinamọni, isipayisi, eturari ọnaa jiraa tụ, eturari renyi renyi ọsa, eche, angwẹ, ayi ozoza, akụ, ụnọ, atẹmẹ, ovurata ọnri ikẹkẹ ovurata, ọrishi nini ọnri ifẹ aza. ¹⁴ Ẹtụtụ ọnụ waa si ẹchi ẹngwụ awụ bo si ọ si jụwavọ. Ụbani opisa awụ bo ọnri ọvi ana vatụra bo ẹ si pevu; aza ei kue re poro pooro. ¹⁵ Osofu isẹnini bo ana zirẹngwụ aani vara opisa vaa kavaana yọ, dẹ na dinẹ tụrasha ọgọdọ fụvọ angwashi ụyọọri anni, dee sune, dẹ kowusha, dẹẹ jiorere. ¹⁶ Dẹẹ ka, "Nyeiruwa, ẹwụ irẹkụra ọbani ọneeyiyẹ, irẹkụra one chire auru ininẹni ozoza, ita ipọọpụrụ ọnri ita ovivi, ọna si igoonu teniẹngwụ, bẹrẹ ireweyi renyi renyi! ¹⁷ Ini iwakati ọnya chọ, ogu ẹnẹ bo ẹ ta vurii. "Oshiresụ ẹẹpa bo, anụkọrọ ẹpa bo, ẹnẹnaa si ̣ẹpa bo, ẹnẹni ọriri ọnri ofifu aanini vana fineenyi, dẹ dinẹ kavana yọ tụrasha ọgọdọ. ¹⁸ Dẹ kowusha e me re areyi ọnaa tụ ẹfi ọni Ibabirọni aa rira. Dẹ ka, "Yere irẹkụra ene vene irẹkụra ọbani ọnọni ọni eyi yẹ kẹ?" ¹⁹ Dẹ kụ edudu kurẹsụ, dẹ kowusha, dẹẹ jiorere, dẹ karẹsụshi, dẹ ka, "Nyeiruwa, ẹwụ irẹkụra ọbani ọni eyi yẹ, irẹkụra ọni ẹnẹna nyi ẹpa tuni irefu bo ya vara opisa fụvọ ogu aani. Fụvọka ini iwakati ọnya chọ, ẹ ta vuri bo. ²⁰ "Waa jụjẹ fụvavọ nin ẹwụ ineeku ẹbẹẹba, ẹwụ nin anọdọwụ, ẹwụ nin ọnitụ Oshomoshi, shi ẹwụ nin ọkisẹ, fụvọki Oshomoshi ọ mishọọji yọ da fụvọ isọshimi ọnọ mẹ ka wụ vẹ nin!" ²¹ Di angẹni ọbani ọnya si irẹta one vene irẹta ọkụọsẹ ọbani, do ne e na ngwụni irefu, dọ ka, "Aani ọna mẹ vaa za Ibabirọni, irẹkụra ọbạni ọni eyi yẹ ọnọ, daa si ọikụ ne e ngwụni irefu, dee me ku re poro pooro. ²² Isa-ofu ẹnenee fu ijita, ọmashẹ nin, ofu-ofere nin shi ofu-ọpani nin, azẹi kụa wụrẹyi aanini ininẹ awụ poro pooro. Ọzi nyi anụkọrụvọ ọnyọnyi ene ve kuu re ini akaakana awụ. Ọzi nyi irẹta ọkụọsẹ ọna va kụụ wụrẹyi ini akaakana awụ nin. ²³ Ẹtofeyi irakọpa ọi kụa sha ininẹ awụ poro pooro. Oi kụ nyi ẹzẹna vaa wụ ọngwẹ ọmụsha anaa si ọnẹ ọnri ozioshi anaa nyiọva ininẹ awụ poro pooro, fụvọki osofu awu ẹnẹ vi ozi Oshinọyi ẹshẹ ọnọni, dụụ si irakụọ ọmimẹ ji irẹkụravabẹ bo vene. ²⁴ Ininẹ aani, ee re anya ọkisẹ nin ọnri anya anọdọwụ niṇ, shi anya ẹnẹna wụ bo ini ẹshẹ.