¹ Di ọnya ini angẹni ishimba ana za ọnya ishimba chaụvọ vẹ ve tu mi, dọ kaa yi mi ka, "Waa vẹ. Mvaa siọ zụ wụ, ivi ọna jiyi ọsẹrẹka ọbani ọna yatụ tụnẹẹsụ enyi ọrụrụ. ² Ọni ọni Oshinọyi ẹshẹ nin ee pe sẹrẹka. Eche irẹka ọsisẹ aani ọnaa mẹrẹ anẹshẹ bo. ³ Inaani, di angẹni ọnọ si mi ini ifẹ na ngwụni ụnọmi, izọ dim re ọnyẹnẹ ọna yatụ tụra uye inavi ovivi ọna chẹrẹ irẹsha isaanyisi ku ẹngwu. Uye inavi ọnọ ọ nyi irẹsụ ishimba ọnri ẹpani ẹẹwụ. ⁴ Ọnyẹnẹ ọnọ ọ kụ ẹnya ipọpụrụ ọnri ovivi, dọ kụ igoonu, ọmọ ọnri iriwei ọsa shi ẹngwu. Dọ za ipa igoonu ọnọ vi ki isa ọshimi ọshimi ọnọ mẹ ọnri ẹvụvụ irẹka ọsisẹ aani, ono shi ininẹ aani ọnọ si chauvọ. ⁵ Da chẹrẹ irẹsha tụni ibe aani, ọni ọshafụsha aani vi ka: "Ibabirọni Ọbani, ọnyi ọsereka nin bo ọna nyụvọ tụni imọrimọ bo ana yini ẹshẹ." ⁶ Dim re ki ọnyenẹ ọnọ o fu anya anaa mẹrẹ ẹ, fụvọki o fu anya anọdọwụ nin ana ji shi ẹtẹ ọnri ẹnẹnọvi ki aa wụ fụvọ ọdọwu aanini ini Ijesu. Ama, ẹfi ọnim re e, do shimeyi kokoro. ⁷ Ama, di angẹni ọnọ fọ mi ka, "Ọmẹzi di irẹyi ọnọni meen shuweyi kẹ? Mva shaafụ sha yụ wụ, isẹni ọnyẹnẹ ọnọ ọnri uye inavi one chema a dinẹ yi, uye inavi ọna nyi irẹsu ishimba, ọnri ẹpani ẹẹwụ ẹnẹ. ⁸ Uye inavi onu re ọ bidi yini ẹshẹ, ọi kụ yinaani ọmẹyani, ama ọ va jantụ jinẹ vẹ fiini ụsi ana razi nyi ọtẹfi. Ụmavọ dọọ nọ irasha ono ve yee vurii. Ẹnẹna ra ini ẹshẹ, ẹnẹna razi chi chẹrẹ irẹsha aanini tụni lwe Ẹshẹ fụrẹ ẹfi ana si ẹshẹ kẹtẹ, o vee shuweeyi ụmẹne re re uye inavi ana bidi yinaani, ana razi kụ yinaani ọmẹyani, ama ana va jantụụ vẹ. ⁹ Ọtụtụrụma ụvira ọni irẹyi ọnọni si. Irẹsụ ishimba ẹnẹ vana dinẹ yi irẹsụfa ishimba ọni ọnyẹnẹ ọnọ yatụ tụ. ¹⁰ Dọ zẹ di dinẹ yi oshinọyi ishimba. Ẹẹshi inaanini ee vurii da, ọnya yi yinaani, ọnya ọ navọ ọi vi vẹ; ụmọnọ ra vẹ, ẹfi keere ọnọ vaa mẹ. ¹¹ Uye inavi ọna bidi yinaani, ama dọ razi kụ yinaani ọmẹyani nyẹmbẹ vi oshinọyi ọfụshinta; ama ọnya ọno ̣vi ini Oshinọyi ofushinta; ama dọ zẹ vi ọnya ini oshinọyi ishimba ẹnẹ, ọn nyẹmbẹ vene nee vurii. ¹² Ọpani ẹẹwụ onuu re vi oshinọyi ẹẹwụ ọna razi nyi nyi ijọva, ama ẹ vaa dọ ụmọ oshinọyi ini iwakati ọnya vabẹrẹ uye inavi ọnọ. ¹³ Enbo vana nyi inẹ ọnya, dẹ si ụkataa ọnri ụmọ aanini yi uye inavi ọnọ. ¹⁴ E vee pe Oziatẹmẹ kụrẹkụ. Ama Oziatẹmẹ vaa fụ wa irẹkụ fụvọki ọni ọnọ vi Ananyiyi ene funa ananyiyi nin, onri Oshiọyi ene funa oshinọyi nin --- ẹnẹna vabẹrẹ ẹnẹ vi ẹnẹna shi, ẹnẹna ni, ọnri ẹnẹna nyi ọdọwụ netuẹtẹ. ¹⁵ Di engẹni ọnọ kaa yi mi ka, "Enyi onuu re izẹni ọsẹrẹka ọnọ yatụ tụ vana dinẹ yi aza, azọkọni, irẹkụravabẹ nin ọnri irarẹ renyi renyi. ¹⁶ Ẹpani ẹwụ onuu re --- shi ọnshi uye inavi vaa nyishẹrẹ ọsẹrẹka ọnọ. Ẹ vaa tụọ avọ osusu, dẹẹ tụọ afuafu, ẹẹva ri uye ẹngwụ aani, ẹẹva si ira riọ ụpẹngwụ aani bo fiẹm. ¹⁷ Fụvọki Oshomoshi ọ siọ tụ wa ọtụtụrụma da ki ono si ki ẹ mẹ isẹnẹni ọnọ si zẹ si ụkata ọnẹẹ sii mẹ ijọva yi uye inavi ọnọ netuẹfi ọni irẹyi Oshomoshi va sẹ. ¹⁸ Ọnyẹnẹ onuu re aavọ vi irẹkụra ọbani ọnaa mẹ ijọva tụra oshinọyi ẹshẹ nin bo.