¹ Maa wu ọngwẹ ọna nẹẹba kọọ shi angẹni ishimba fini itẹmpụrụ ka, "Na wana va ọikụ Oshomoshi ọna yini ọnya ishimba ẹnẹ shi ẹshẹ. ² Angẹni ipaapa ọ naa dọ na va ọikụ Oshomoshi ọna yini ọnya aani shi ẹshẹ; di ikenebe ọna nyọzishẹrẹ chaka gidọ shi ẹnẹna nyi ọtẹrẹwa uye inavi, dẹẹ fẹkẹ ụmama aani. ³ Angẹni ọfụụva ọ va ọikụ ọna yini ọnya aani shi ininẹ irefu. Dọ vara anya, vene anya oku one su tẹtẹ, di isa ana nyi ifẹ bo ini enyi su va sha. ⁴ Angẹni ọfụụta ọ va ọiku ọna yi ini ọnya aani shi ininẹ okufa ọnri osue enee si, di enyi enbo vara anya. ⁵ Dim wụ ki angẹni ẹnyi ẹ kaa ka, "Ẹwụ ọnọ vi ọmanasẹrẹ --- ẹzẹna ya, ọna bidi ya, ẹzẹna vi ọnini --- fụvọki wa mishọọji isẹnẹni bo da. ⁶ Fụvọki ẹẹ ji anya anadọwụ ọnri ọkisẹ nin shi ẹtẹ dụụ si anya yụ wa fu; isẹnẹ sẹre ̣wa vọnọ." ⁷ Dim wụ ki ọpẹtẹ ọ voshi ka, "Eeva, Oshomoshi Ananyiyi Ọnụkata fu bo, ishọọji awụ bo vi irẹiza ana dinẹ tụni ọmimanasẹrẹ." ⁸ Angẹni ọfụụna ọva ọikụ ọna yini ọnya aani shi inẹẹsụ ọyi, da si oze yi ọyi ki ọ si ira ri anẹshẹ. ⁹ Di irivu ọshimi da anẹshẹ, dẹẹ ka isaanyisi shi irẹsha Oshomoshi, ọna nyi ụkata tụra ụyọọri ẹbani ẹnẹni irẹsụ. E zi rinẹ varama, ẹ zi zẹ si si ụga yọ. ¹⁰ Di angẹni ọfụụshi va ọikụ ọna yi ni ọnya aani shini Ogede uye inavi, di oozi oshi izẹnọ ya mijọva aani. Dẹ tọ irarẹ aanini fụvọ ọmẹmẹ zi wa tu. ¹¹ Dẹẹ ka isaanyisi shi Oshomoshi ọna yi ineeku fụvọ ụyọọri ọnri anava aanini, ama ẹzi zẹ rinẹ varama fiini ọshimi ẹnẹ mẹ. ¹² Angẹni ọfụshinọnyi ọ va ọikụ ọna yini ̣ọnya aani shi ini okufa ọbani Uferetisi. Di enyi aani bo wara zẹtẹ doti a zụ siọ fụ oze sha yi Oshinọyi nini ẹ̵na vaa vẹ fini aka oni ọyi jinẹ fụrẹ. ¹³ Mee re ifẹ arimani ẹẹta ana si mai irivu ẹmẹ jinẹ fiini irẹnu uye inavi ovivi ọshimi ọnọ, uye inavi, ọnri ọkisẹ anapinẹ ọnọ. ¹⁴ Fụvọki ifẹ azeeshi anaa mẹ isishishozeyi ẹnẹ vi. Dẹẹ jinẹ na ne tu oshinọyi anẹshẹ nin bo doti ẹ zụ kụ wa irẹsu gẹ fụvọ irẹku ọkụshi ọbani Oshomoshi ene fu keekere. ¹⁵ ("Re! Venebiri oyi ọnim vaa vẹ! Ẹdabẹrẹ ọnọ vi yi ẹzẹna sieyipeẹtẹ, dọ si ẹfi bo chire auru aani doti asọ va na jinẹ ni ni ẹshẹẹshẹ daa si afụafụ aani ọnri ụshiọnyi aani re.") ¹⁶ Aa kụ enbo vabẹ tụ irasha anaa shi Amagẹdọni ini irẹkụra Iburu. ¹⁷ Inaani, di angẹni ọfụshimba va ọikụ ọna yini ọnya aani shi ini ashi. Inaani, di ọngwẹ ọbani jinẹ fiini itẹmpụrụ ini ogede, dọ ka, "Ọọ ta mẹ!" ¹⁸ Di inyanya ri, do furutu, di apavana ishinẹba karutu, di ẹtẹ jagodo --- ẹtẹ ọzi vọọ ji jagodo yẹẹyẹ fụrẹ ẹfi ana za si vẹrẹ aa ra ini ẹshẹ, ẹtẹ ọnọ vana jagodo bọm bọm. ¹⁹ Irẹkụra ọbani ọnọ vana ga tu oze ẹẹta, di irẹkụra osa nin ana yini irẹkụra obani ọnọ vana chaka vasha. Inaani, di Oshomoshi tamayi Ibabirọni ọbani, dọ si ipa keeche ọikụ ọshimi aani oshiishii, dọ siọ yọ. ²⁰ Di irẹkụra ọni enyi varakara bo vurii, di irẹsụfa nin bo pevu. ²¹ Di oriishii irẹta Oshomoshi ana rata vene itarẹnti ọnya aa zụụ nya wa irẹsụ fụri ẹbẹẹba. Dee chi Oshomoshi eku fụvọki ụyọọri oriishii irẹta Oshomoshi anaa zụ ọzi vi isa che.