¹ Inaani, dim ze re ami ọsa fụri ẹbẹẹba, dọ bani, dọ vi oshishozeyi: Angẹni ishimba yiizọ ana za ụyọọri ishimba, ụyọọri ẹnẹ ọnọ vi ụyọọri ọikọtaa, fụvọki zirẹngwụ aanini ọni ọikụ Oshomoshi va yaa taa mẹ ² Dim re isene vene irefu ọna simai oreyi ọni ira vafura. Ẹnẹna dinẹ gụrẹ irefu ọnọ vi ẹnẹna fụrẹkụ uye inavi ọnri ụmama aani, shi irika ana dinẹ hi irẹsha aani. Dẹ za ijita ọni Oshomoshi si yụ wa chaụvọ. ³ Dẹẹ jashẹ Imosisi, ozida Oshomoshi, ashẹ ọnẹ sii sụga yi Oziatẹmẹ: "Ụbani ọnri oshishozeyi ọni ọmimẹ awụ vi, Oshomoshi Ananyiyi, ọna vi Ọnụbani ene fu bo. Ọna sẹrẹ ọnri irẹiza ọni ọmimẹ awụ vi, Oshinọyi irẹkụravabẹ bo. ⁴ Ene re zee shiangwa awụ, Ananyiyi, dọọ zẹ sụga yi irẹsha awụ kẹ? Fụvọki ẹwụ renya kẹnẹ ọno ̣vi ọnini." Ẹshẹ keekere vaa vi ni ọvidi awụ vẹ vaa fẹkẹ wụ, fụvọki a si ọmimẹ awụ inoze ana sẹrẹ, zụ da." ⁵ Inaama isẹnẹni bo, maa zamẹtẹ, dim re ki itẹmpụrụ ọna nyi ajẹngwu ivenu ọ na tẹtẹ ineeku ẹbẹẹba. ⁶ Di angẹni ishimba ọna za ụyọọri ishimba chaụvọ jinẹ fini irasha ana vi ọnini fu keekere. Auru ininẹni ọnaa vụ bẹnẹbẹnẹ one chire, dẹ da irachẹrẹ igoonu kurachi. ⁷ Ọnya ini isa ẹẹna ana nyi ifẹ ọ si ipa igoonu ishimba ene shi yi ọikụ Oshomoshi, ọna ra poro pooro, dọ si ọ yi angẹni ishimba ẹnẹ. ⁸ Di itẹmpụrụ shi yi areyi ana fiini ụga ọnri ụkata Oshomoshi. Ọ zi nyi ẹnẹna zụ ngwụnaani netu ẹfi ọni ụyọọri angẹni ishimba ẹnẹ ta mẹ bo.