¹ Maa zamẹtẹ dim re Oziatẹmẹ, ki ọ dinẹ tuni irẹsụfa Izayọni. Ẹnẹna dinẹ pe vi akashi oze ẹchẹshi tụra ẹbẹrẹna tụra ẹẹna (144,000), ẹnẹna chẹrẹ irẹsha aani ọnri irẹsha Ada aani tuni ibe aanini. ² Dim wụ ọngwẹ fụrẹ ẹbẹẹba ọnaa sụrẹyi vene enyi ọna rụrụ, dọọ karutu vene apavana Oshomoshi. Ọngwe ọnọ oo ze vi vene ọmaashẹ nini enee fu ijita. ³ Dẹ jashẹ ọwọwa inọvidi ogede, inọvidi isẹẹna ọna nyifẹ ọnri azẹkụ nini. Ọzi nyi ẹzẹna zụ kọsụẹ ashẹ ọnọ, ọchishi aza akawụ oze ẹchẹshi tụra ẹbẹrẹnatụra ẹẹna (144,000) ọna shii fini ẹshẹ ọnọni. ⁴ Ẹnẹni ẹnẹ vi ẹnẹna razi si irẹyi ọnyẹnẹ kụ ẹvụvụ para ẹngwụ aanini, fụvọki ẹ mẹ ẹngwụ anini ọnini ini irẹyi asụ. Ẹni ̣ẹnẹ vatụra Oziatẹmẹ, irasha tụrirasha ọnọ ra nọ. Ẹnẹni vana shi fini akaakana anẹshẹ, da sụ wa mẹ ẹtụtụ ipaapa yi Oshomoshi ọnri oziatẹmẹ. ⁵ Azẹzi re apinẹ ini irenu aanini; ẹ zi nyi ivi ọnyọnyi. ⁶ Dim re angẹni ọsa enee shira ini akaakana ashi, dọ za irenube ọiza ẹshẹ poro pooro chaụvọ ono vee showu aani yi anẹshẹ bo --- anda bo, irarẹ bo, ọnri aza bo. ⁷ Dọ si ọngwẹ tụẹba, dọ ka, "Nyi angwashi Oshomoshi, dụ wa sụga yọ nin. Fụvọki ụmẹ ishọọji aani o si tu. Fẹkẹ ẹ, ọni ọnọ mẹ ineeku, dọ tụ ẹtẹ, irefu ọnri enyi ọnaa tụụ fiini ẹtẹ ọnri irẹta." ⁸ Di angẹni ọsa --- angẹni ọfụụva --- vatura ọi ipaapa, dọ ka, "Ibabirọni irẹkụra ọbani ọneeyiyẹ ọnọ, ọ si ẹdụ sụ, ọ si ẹdụ sụ; ọni ọnaa mẹ ki ẹshẹ keekere ee fueche irẹka ọsisẹ vene e." ⁹ Angẹni ọsa --- ọfụụta --- dọ vatụra wa, dọ si ọ̣ngwe tụẹba, dọ ka, "Aaviki ọzọnyọnyi ọ na fẹkẹ uye inavi ọnọ ọnri ụmama aani, dọ dọ ọtẹrẹwa tuni ibe navẹki ụvọ, ¹⁰ o ze ve fii fu ini eche ọikụ Oshomoshi, eche ọikụ aani ọna razi va ẹnyi fura ana ka shi ipa ọikụ aani. Ẹzẹne re fu o vana vaa si ira ọnri emi ọyi mụyaari inọvidi angẹni ọnini Oshomoshi ọnri Oziatẹmẹ. ¹¹ Areyi ụyọọri aanini vana vaa tụ shirẹ poro pooro; ẹnẹnaa fẹkẹ uye inavi ọnọni ọnri ụmama aani, shi aza bo ana dọ ọtẹrẹwa irẹsha aani, ẹ zaa nyi ifoshi ọọdụ shi irafụ. ¹² Ẹnẹna vi ọza ọnini ẹ navọ dẹ nyi ọsiẹngwụdọ ọnri ọdọwụ ini irẹyi Oshomoshi, ẹnẹna si ụmọ Oshomoshi ọnri ọdọwu ini Ijesu mụkọrọ." ¹³ Dim wụ ọngwẹ fụri ineeku, ka, "Chẹrẹ ẹ tẹtẹ ka: Ẹdabẹrẹ ọnọ vi yi ẹnene su ini Ananyiyi. Avọ ọmẹ vi, fụvọ de zu shifẹ fini ụkọrọ aanini, fụvọki ụkọrụvọ aanini vaa vatụra wa," avọ Ifẹ Ọnini mẹ ka. ¹⁴ Maa zamẹtẹ, dim re egushi ọvụọvụ. Ọza ene vene ozi anẹshẹ dọ yatụ tụni egushi ọnọ. Do ku ade igoonu, dọ zaa ọbọnọkọ ạna rẹ chauvọ. ¹⁵ Di angẹni ọsa jinẹ fini itẹmpuru, dọ si ọngwẹ tuẹẹba karẹyi yi ẹzẹna yatu tuni egushi ka: "Si ọbọnọkọ awụ, dụ wa dụ wa nyima ọfifa isirarẹ. Fụvọki ụmẹ ọna sii fa isirarẹ o si tu, ọmẹviki isirarẹ ẹshẹ onọni ̣ọ vi da". ¹⁶ Inaani, di ẹzẹna yatụ tụni egushi ọnọ mii ọbọnọkọ aani kara ẹshẹ, dọ fa isirarẹ ẹshẹ. ¹⁷ Angẹni ọsa ọ zẹ jinẹ fini itẹmpụrụ ineeku, dọn nyẹmbẹ zẹ za ọbọnọkọ ana rẹ chaụvọ. ¹⁸ Avaavo ọni angẹni ọsa nin mẹ zẹ jinẹ fini ọpẹtẹ ọna yaa ri eturari irạ, ọnọ nyi ụmọ tụra ira ọnọ irẹsụ. Dọ si ọngwẹ tụẹba karẹyi yi ọzẹna za ọbọnọkọ ana rẹ chaụvọ kạ, "Si ọbọnọkọ awụ ana rẹ du we pere ẹtụtụ ivaini fini ụbazi ẹshẹ, fụvọki ẹtụtụ aani bo ẹ ta vii." ¹⁹ Di angẹni ọnọ mii ọbọnọkọ aani shi ẹshẹ, do pere ẹtụtụ ivaini ẹshẹ gụ. Do nee ngwụni okoro eche ọbani ọikụ Oshomoshi. ²⁰ Okoro eche ọnọ vana da tụni akajinẹ irẹkụra, di anya ee sii finaani, do shi netu ụgọdọ orupa ọna sii sụ ovurata irenu, do shi oziẹshẹ akashinta (1,600).