¹ Inaani, di angẹni ọnọ si okufa ọni enyi ẹshẹ yee si zụ mi, di enyi ọnọ ni neene vene ikirisita. Enyi ọnọ venee sii fini ogede Oshomoshi ọnri ogede Oziatẹme, ² dọ zi akaakana irẹkụra ọnọ parafu. Di ọchi ẹshẹ dinẹ tụni irakasha ẹviva okufa ọnọ, dọọ si ụfụụfẹ tụ ẹtụtụ renyi renyi oze ẹwụrẹva. Avi ọchi ọnọ vene sii si aza ana yi irẹkụravabẹ keekere ikụ. ³ Ọi kụa nyi irẹyi ekuochi ọnyọnyi. Ogede Oshomoshi ọnri ogede Oziatẹmẹ vana vaa yini irẹkụra ọbani ọnọ, di ezida aani aa fẹkẹ ẹ. ⁴ E vee re eyi aani; a vaa chẹrẹ irẹsha aani tụ wa ibe. ⁵ Irafụ ọi kụa yinaani; ọi kụa nyi ki ee si ẹtofeyi ọpa navẹki ẹtofeyi ọyi izọ, fụvọki Oshomoshi Ananiyiyi vaa sha ẹtofeyi tụra wa. Ẹ vaa mijọva poro pooro. ⁶ Di angẹni ọnọ kaa yi mi ka, "Irẹyi ẹnenị vi irẹiza ọna nyụfụshitẹ. Ananyiyi, Oshomoshi ifẹ Ọkisẹ nini, ọno tụ angẹni aani ki ọ va si isẹnẹ va jantụ mẹ zụ ezida aani." ⁷ "Re! Maa vẹ ini ọfirọfira! Ẹdabẹrẹ ọnọ vi yi ẹzẹna ra si ẹtoore ọna chẹrẹ tụni iwe ọnọni mụkọrọ." ⁸ Ẹmi Ijọọnụ ọnọ sụtọ wụ irẹyi ẹnẹni bo, dim zẹ si iri ami re isẹnẹni bo. Efi ọnim wụ, dim ze si iri ami re wa, dim vakuẹtẹ ki ma fẹkẹ angẹni ọna si irẹyi ọnọni bo zụ mi. ⁹ Dọ kaa yi mi ka, "Asụụ vọvọ mẹ! Ẹmi nyẹmbẹ vi ozida vene wụ, shi ẹnyarawụ ọnri ọkisẹ nini, shi ẹnẹnaa si irẹyi ọna yini iwe ọnọni mukọrọ. Fẹkẹ Oshomoshi!" ¹⁰ Dọ kaa yi mi ka, "Asụụ sụnẹ irẹyi ẹtoore iwe ọnọni, fụvọki ẹfi aa kavaape. ¹¹ Ẹzẹna ra vi ọzọshimi, ọ navọ ọọ mẹ isọshimi nọvidi. Ẹzẹna ra vi ọsẹrẹka, ọ navọ ọọ mẹ itutu asụ nọvidi. Ẹzẹna ra vi ọmanasẹrẹ, ọ navọ ọọ mẹ isẹna sẹrẹẹ nọvidi. Ẹzẹna ra vi ọza ọnini, ọ navọ ọọ mẹ ọnini aani nọvidi." ¹² Re! Maa vẹ ini ọfira ọfira. Maa za ọgụ ọnim va sii yi ọzọọza zirẹngwụ ụkọrụvọ aani chaụvọ. ¹³ Ẹmi ọnọ vi aafa ọnri omega, ipaapa ọnri okeke, enyima ọnri ikọọta. ¹⁴ Ẹdabẹrẹ ọnọ vi yi ẹnẹna nyina auru aanini doti ẹ zụ nyi ụmọ ọne ̣va sii ri fini ọchi ẹshẹ, shi ụmọ ọnẹ va sii para oze ọbani fu ngwụni irẹkụra ọbani ọnọ. ¹⁵ Irezi nin ẹnẹ yini ẹshẹẹshẹ irẹkụra ọbani ọnọ, shi ọnrakụọ nin, ọsẹrẹka nin, ọwụọza nin, ẹnẹnaa fẹkẹ ori nin, shi ẹnene sirẹyi apinẹ ọnri irikishi. ¹⁶ Ẹmi Ijesu ọnọ tu angẹni ami ki ọ va divenu inọpati isẹnẹni yi ichọọhi bo. Ẹmi ọno ̣vi ẹpa ọnri ozirama Idevidi, dim vi ụzọmi ọnẹnẹ ọnaa za bẹnẹbẹnẹ. ¹⁷ Ifẹ ọnri Ozioshi ka "Waa vẹ!" Navọ ẹzẹna ra wụ irẹyi ọnọni ọ kaa ka, "Waa vẹ!" Ọzatụrọza ọni oonyi raa kụ, ọ navọ doti ọọ vẹ, ẹzẹnọ ra ngwụeyi, ọ navọ ọ va ini enyi ẹshẹ ka ọpa ene re zeeyi fu. ¹⁸ Maa divenu irẹyi ọnọni yi aza bo ana wụ irẹyi ẹtoore ọna yini iwe ọnọni: Aaviki ọnyi ẹzẹna si bẹrẹ wa, Oshomoshi vaa da ụyọọri ana chẹrẹ tụni iwe ọnọni bẹrẹ ẹshẹ ọzọnọ. ¹⁹ Aaviki ọ nyi ẹzẹna si fini irẹyi ẹtoore ọna yini iwe ọnọni, Oshomoshi vaa da ọ ọgiga ọnọ vọrọ ki ọzọnọ ọ nyi fini ẹshẹ aani, shi ọgiga ọnọ vọrọ ki ọ nyi ini irẹkụra ọnini ọbani ọnọ ọna chẹrẹ inọpati aani tụni iwe ọnọni. ²⁰ Ẹzẹna divenu irẹyi ẹnẹni ka, "Avọmẹvi! Maa vẹ ini ọfira ọfira." Aami! Waa vẹ, Ijesu Ananyiyi! ²¹ Ọiza ọfẹ Ijesu Ananyiyi ọ va ya bẹrẹ ẹwụ nin bo. Aami.