¹ Di Ijesu kaa yụ wa ka, "Ini irẹiza, ma kaa yụ wụ nin ki azẹnyi yi izọni ene rezee su dọ tangwa va nyi ki e re ki ijọva Oshomoshi ọ vẹ bẹrẹ ụkata aani. ² Inaama ọkụshi ishinọnyi, di Ijesu si Ipita ọnri Ijẹmsi shi Ijọọnụ, dẹ gẹ zi na shirẹ Irẹsụfa ana nẹba, di ẹnrenya kẹnẹ yi izọ. Inaani, di Ijesu varẹngwụ tuweyi. ³ Di auru aani kụa da mana mana, dọọ vuẹtẹ bẹnẹbẹnẹ, dọ vụẹtẹ netu ka ọzi nyi ọnyinita ana vọọ va zụụ nyinita ini ẹshẹ dọ vọọ vụẹtẹ." ⁴ Inaani, di Enaija ọnri Imosisi fụrẹshi wa, dee pe Ijesu karẹyi. ⁵ Di Ipita kaa yi Ijesu ka, "Ọzụọzisa, ozoza ki yaa yi izọni, navọ ya ji ajẹngwụ ẹẹta; ọnya vi ayi awụ, ọnya vi ayi Imosisi, dọ ọnya vi ayi Enaija." ⁶ (Ọi kụ yẹ ọmẹ vaa ka, fụvọki angwa o shi wa.) ⁷ Di egushi vaku wa. Ọngwẹ ọnya dọ jinẹ finaani vẹ, dọ ka, "Ozi ami ọnim ngwayini yi. Batọ tuni irẹyi aani nini." ⁸ Ụpọnyụpọnya, ẹ mẹ vareyi, ei ve ku re ọzọnyọnyi, ọchishi Ijesu renya. ⁹ E mee chi fini irẹsụfa, di Ijesu kawọnọ ki asẹ ka isene re yi ọzọnyọnyi, ọọzi vi ki Ozi Ọza sha kwẹẹtẹ fini isu da. ¹⁰ Dẹ si isẹnẹni bo tuni ayi, ama dẹẹ fọ ẹngwụ isue ka, sẹnẹvi ọshafụ sha "ọshi sha kwẹẹtẹ fini isu." ¹¹ Dẹ fọ ọ ka, "Ọmẹzi di ọyofi nini kaa ka, "Enaija ọnọ vidi vaa vẹ?" ¹² Di Ijesu kaa yụ wa ka, "Irẹiza yọ ki Enaija ọnọ vidi vẹ dọ va isa bo rama tudi aani. Ọmẹzi da chẹrẹ ka Ozi Ọza vaa rụya ini oze ọrụrụ ọnri ki aza vana vee re e chẹgẹ sụvọza vene ẹzẹna razi nyi ọnọ bẹri? ¹³ Ama, ma kaa yụ wụ nini ki Enaija ọ vẹ da, dẹ misa ene zeweyi sho venebiri iwe ọnini mẹ ka inọpati aani." ¹⁴ Ẹfi ene ve tu eziafụ aani, de re ki azọkọni nini ẹ varakara wa, di ọyofi nin e pe wa nyi ẹshankata. ¹⁵ E me re Ijesu kẹnẹ, do shuweeyi, di azọkọni ẹnẹ zuechi ne tu o, dẹ kụ ọ. ¹⁶ Di Ijesu fọ eziafụ aani ka, "Yere ishankata ọnụ wee pe wa nyi nin kẹ?" ¹⁷ Di ọzọnyi ini azọkọni ẹnẹ tuoshi ka, "Ọzụọzisa, ma si ozi ọmụsha ami ve tu wụ. Ọọ nyi ifẹ azeeshi ana razi navọ ki ọzụ karẹyi. ¹⁸ Dọọ taaku, dọọ sẹ ẹ riẹtẹ; doo kuafụfụ ineenu, dọ kụ anyi gẹ, di ẹngwụ aani ta shirẹyi. Ma kaa yi eziafụ awụ ki e pe mi dụọ jinẹ fini ẹngwu aani, ama ẹi zụ mẹ." ¹⁹ Dọ tuoshi ka, "Ẹwụ nini evereze, ana razi nyi ọdọwụ, yere ẹfi ọnim va yaa pe wụ nini tu kẹ? Yere ẹfi ọnim va pe wu nin siẹngwụdọ tu? Si ọ ve tu mi." ²⁰ Dẹ si oziọnọrụ ọnọ ve tu o. Ụmẹ ọni ifẹ azeeshi ọnọ re Ijesu, ụmụmọ dọ mẹ ki agiri ọ za oziọnọrụ ọnọ. Ọ sẹdụ nyẹtẹ, doo kuafụfụ ineenu. ²¹ Di Ijesu fọ ada aani ka, "Yere ẹfi ọnọ fụrẹ maan ya?" Di ada aani ka, "Ọ mẹ fụrẹ vi ozueyi." ²² Ụpẹrika ono si ne ngwụ ini ira navẹki ini enyi, doo sioze ki ọnọ wụ ọ. Miyarẹwụ, aaviki ọ nyi isa ọnụ va zụụ mẹ tụọ, vayayi dụ wa mẹ ọgụvọ yi yi." ²³ Di Ijesu kaa yọ ka, "'Ụ vanaa fọ ka aaviki ụ va zụụ mẹ ẹ'? Isa bo vi ọmimẹ yi ọza ana nyi ọdọwụ." ²⁴ Ụmumo, ada ozi ọnọ do nowu tuẹshẹ ka, "Maa dọwu! Mọgụvọ yi arimadọwụ ami!" ²⁵ Ijesu me re ki azọkọni ẹnee zuechi vẹ, dọ tụ ifẹ azeeshi ọnọ ofuvọ ka, "Ẹwụ ife azeeshi evuvu ọnri ụtọ ogigu, maa si ụmọ kaa yụ wụ, jine fụrẹngwụ, asụkụ varama ngwụ ini ẹngwụ aani." ²⁶ Di ifẹ azeeshi ọnọ nowu tụẹshẹ, dọ mẹ ki agirii ọ za oziọnọrụ ọnọ ẹtẹtẹrẹ, dọ jinẹ fini ẹngwụ aani. Do si vene ki oziọnọrụ ọnọ o fusu, netu ki azẹrụrụ vanaa kaa ka, "O fusu." ²⁷ Ama, di Ijesu za a ụvọ kwẹẹtẹ, di ozi ọnọ kwẹẹte dinẹ. ²⁸ Ijesu mẹ ngwụ ireshi, di eziafụ aani bebe fọ ọ ka, "Ọmẹzi di raizụ dụ ifẹ azeeshi ọnọ jinẹ kẹ?" ²⁹ Dọ kaa yụ wa ka, "Azẹ ma zụ dụ ẹngwụ ẹnẹni jinẹ ọchishi ki zirẹngwụ ozurenu ọtitụ." ³⁰ Ẹ jinẹ fi izọ de zi Iganini parafu. O zi si ki ọzọnzọnyi ọ yẹ izẹni ẹn ya, ³¹ fụvọki ọọ zụ eziafụ aani isa. Dọva ka yụ wa ka, "Avaa si Ozi Ọza chire anẹshẹ nin ụvọ, dẹẹ wụ ọ. Aa si ọ wụ da, inaama ẹkụshi ẹẹta, dọ varama sha kwẹẹtẹ." ³² Ama irẹyi ọnọni o zi ye eziafụ aani, angwashi ọi va navọ ki ẹ fọ ọ. ³³ Inaani, dẹ ngwụ Ikapanọmụ. Ẹfi ọnọ ngwụ ireshi da, dọ fọ wa ka, "Itọọni isọnụ waa ni inoze nin kẹ?" ³⁴ Ama de chi o riji. Fuvọki e bidi ee pẹngwụ nyi ẹshankata ini oze ka yere ezene fu inaanini. ³⁵ Ọ mẹ yatụ, do shi eziafụ aani ẹwụrẹva vabẹ, dọ kaa yụ wa ka, "Ọọ nyi ọza enee si ki ọ naa vi ọdọvidi, ọ savọ vi ọnekeke ini aza bo ọnri ozida yi aza bo da." ³⁶ Ijesu ọ si ozioweyi ọnya dọ siọ tuni akaakana aanini. O chema chaụvọ dọ kaa yụ wa ka, "Ọzatụrọza ana ra dọ ẹngwụ ozioweyi ọnọni ³⁷ ini irẹsha ami, ẹmi ọnọ zẹ di dọ aavọ; aaviki ọ ọnyi ọza ana dọ mi, ọzi vi ẹmi renya ọnọ dọ, ọ zẹ di dọ ẹzẹna tụ mi vẹ." ³⁸ Di Ijọọnu kaa yi Ijesu ka, "Ọzụọzisa, yee re ọzọnyi ọ naa si irẹsha awụ dụ ife azeeshi jinẹ fini ẹngwụ aza, di za dinẹ, fụvọki ọ maa vatụra yi." ³⁹ Ama di Ijesu kaa yụ wa ka, "Asụ za a dinẹ, fuvọki ọzinyi ọzọnyọnyi ana vaa mụkọrọ oshishozeyi ini irẹsha ami ana vaa firaa varama na karẹyi ọshimi inọpati ami." ⁴⁰ Ọzatụrọza ana razi kachire yi, vana ya bẹrẹ yi. ⁴¹ Ọzatụrọza ana ra si ipa kenyi yụ wụ fu fụvọki ọi Ikiristi onụụ vi, ma kaa yụ wụ ini irẹiza, ọgụ aani ozee vu. ⁴² Ọzatụrọza ana ra mẹ ki ọnya ini ezioweyi ẹnẹni ki ọ mẹ abojinye, ọva dashi yọ ki a sụ irẹta-ọkụayi za ọbẹ, dee ne ngwu ini irefu. ⁴³ Ụvo awụ ra mẹ kụ wa mẹ abojinye, da a kụra. Ọ dashi kụ wa ngwụ ini ẹshẹ poro pooro bẹrẹ ụvọ ọnya, funa ku wa nyi ụvọ ẹviva dụ wa ngwụ ineeku ira ene re me mi. ⁴⁴ Afụ awụ ra mẹ kụ wa mẹ ọbajinye, daa kụra. Ọdashi ku wa ngwụ ineeku ọiza rẹngwu irẹjiji funa kụ wa ngwụ ineeku ira, izọni ikokoromi aanini re me su, di ira aani re me mi. ⁴⁵ Ụfụ awụ ra mẹ kụ wa mẹ abojinye, daa ne ta; ozoza ku wa vi ọjafụ na ngwụ ini ẹshẹ popooro funi ki wa nyi ụfụ ẹviva, dụụ na ngwụ ineeku ira, ⁴⁶ izọni ikokoromi aani re me ye su, di ira aani re me ye mi. ⁴⁷ Iri awụ ra mẹ ku wa mẹ abojinye, tuọ ne ta. Oozoza ku wa si iri ọnya ngwụ ineeku ọiza, funi ku wa nyi iri ẹviva de ne wu ngwụ ineeku ira, ⁴⁸ izọni ikokoromi aanini re me ye su, di ira aani re me mi. ⁴⁹ Fụvọki, a vaa si iraa mẹ ẹngwụ aza bo ọ nyi ushine anọ. ⁵⁰ Anọ vi isa ozoza, ama ushine anọ ra si finaani, ụ mẹmẹ vaa mẹ ki ọ varama nyi ushine? Navọ dụ wa nyi anọ ini akaakana awụ nin, di ẹngwọrọ ọ yini akaakana awụ nini."