¹ Ijesu ọ kwẹẹtẹ fi izọ, dọ nọ ọkakooro Ijudia na ngwụ akajinẹ Okufa Ijọdani, di azọkọni nin ze ve tu o. Dọ zaa zụ wa isa venebiri ọ mẹ mii mẹ. ² Di Ifarasi nin ve tu o dẹ zaa mọọre, dẹ fọ ọ ka, "Ọwa vọrọ ki ọva, o yi ose aani?" ³ Dọ voshi ka, "Yere ụmọ ọni Imosisi mẹ yụ wụ nin kẹ?" ⁴ Dẹ voshi ka, "Imosisi ọ si oze yi ọnọru ki ọ chẹrẹ iwe ivenu ono si yi o, dọtangwa va dụ ọ." ⁵ Di Ijesu ka, "Fụvọ ọtụtụrụma ọkata awụ nini ọnọ si chẹrẹ iwe ofi ọnọ. ⁶ Ama fini ivẹrẹ ẹshẹ, 'Oshomoshi vana mẹ wa ọnọrụ ọnri ọnyẹnẹ.' ⁷ 'Fụvavọ, ọnọrụ vaa fụrẹ ada aani ọnri ọnyi aani ụvọ dọọ vabẹrẹ ose aani, ⁸ di ẹnẹviva si vabẹ ini ẹchẹngwụ ọnya. Fụvavọ ẹi kwaa vi ẹchẹngwụ ẹẹva; ẹchẹngwụ ọnya ẹnẹ kụ vi. ⁹ Fuvavọ, isẹni Oshomoshi kụvabẹ da, asi ọzọnzọnyi ga wa shi." ¹⁰ Ẹfi ẹnẹ yi ineeshi, di eziafụ aani zẹ fọ ọ inọpati irẹyi ọnọni. ¹¹ Dọ kaa yụ wa ka, "Ọzaturọza ene re yi ose aani, dọ na nyi ¹² ọnẹ ọsa vana sẹrẹka. Ọnyẹnẹ ana raa fụrẹ ọva aani ụvọ, dọ na nyi ọva ọsa, vana sẹrẹka." ¹³ Umotu dẹ kụ ezioweyi aanini ve tu Ijesu ki ọ si ụvọ kani ụwa, ama di eziafụ aani tu wa ofuvọ. ¹⁴ Ẹfi ẹni Ijesu voo re, inẹ aani ozi shine tụọ, dọ ka yụ wa ka, "Navọ di ezioweyi ẹnẹni e ve tu mi, asụụ za wa dinẹ, fụvọki ẹngwụ aanini ẹnẹ nyi ijọva Oshomoshi. ¹⁵ Ini irẹiza, ma kaa yụ wụ nin, ọzatụrọza ana razaa dọ ijọva Oshomoshi vene ozioweyi, ọnọvi ki ọ zaa ngwụ inaani." ¹⁶ Inaani, do chema ezi ẹnẹ chaụvọ, dọ sụvọ tụra wa irẹsụ, dọ tuozurenu ẹdabẹrẹ yụ wa. ¹⁷ Ẹfi Ọnọ vẹrẹ ụsoze aani, di ọnọrụ ọnyi zuechi ve tu o, do kuẹtẹ tụọvidi, dọ fọ ọ ka, "Ẹwụ Ọzụọzisa Ọza Ọiza, sọnọvọri ki ma mẹ ana vaa si mi nyi ẹshẹ poro pooro kẹ?" ¹⁸ Di Ijesu ka, "Ọmẹzi dụ waa shi mi ọza ọiza kẹ? Ọzinyi ẹzẹna vi ọza ọiza, ọchishi Oshomoshi renya. ¹⁹ Waa yẹ ofi Oshomoshi bo: 'Asụụ wụ oza, asụụ sẹrẹka, asuu yuyi, asuu divenu apina, asụụ mọzari, si ụbani yi ada awụ ọnri ọnyi awụ'." ²⁰ Di ọnọrụ ọnọ ka, "Ọzụọzisa, isẹnẹni bo vọni maa mẹ mmẹ furẹ vi ozueyi. ²¹ Di Ijesu re, do sirẹyi aani. Dọ va kaa yọ ka, "Ọ nyi isa ọnya ana vọ wụ. Na na isa ọnụụ nyi bo, dụ wa siọ yi onriwa nin, ụ vaa nyi ogu tụ ineeku ọiza. Ọọ ta wụ mẹ dụ wa vavẹ, dụ wa vatụra mi." ²² Ama di ẹngwu aani si vashi fụvọ irẹyi ọnọni; di ọnri inẹ-odu fi izọ, fụvọki ọ nyi ogu ọrụrụ. ²³ Ijesu o reẹtẹ varakara dọ kaa yi eziafụ aani ka, "Ọmẹ vaa ngwẹngwụ tu yi ẹnẹna vi opisa dẹ va zụ ngwụ ini ijọva Oshomoshi!" ²⁴ Irẹyi ọnọ ka aani, dọvi isene shi eziafụ aani eyi. Ama di Ijesu varama kaa yụ wa ka, "Ẹwụ nin ezi, ọmẹ vaa ngwẹngwụ tu dava zụ ngwụ ini ijọva Oshomoshi! ²⁵ Ọ rẹngwụ yi irankụmi ki ọ zi iri ọrishi parafu funi ki opisa ọ ngwụ ini ijọva Oshomoshi." ²⁶ Irẹyi ọnọni o shuweyi ẹtẹẹtẹrẹ, dẹẹ kụa fọ ẹngwụ ka, "Yere ọza ana va kụ zụ dọọtụ avọ kẹ? ²⁷ Di Ijesu re wa, dọ ka, "Aavi ini ayi ẹyi ọza yọ, ọzi vi mẹ, ama ọzi vọ vi yi Oshomoshi. Fụvọki isa bo vi ọmimẹ yi Oshomoshi." ²⁸ Di Ipita vẹrẹ dọ kaa yọ ka, "Re, ya navọ isa bo, dii vatụra wụ." ²⁹ Di Ijesu ka, "Ini irẹiza, ma ka yụ wụ, ọzi nyi ọzọnya ọnọviki ọ furẹ ireshi aani ụvọ, navẹki ọnyara aani ọnoru, navẹki ọnyara aani ọnyene, navẹki ọnyi aani, navẹki ada aani, navẹki ozi aani, navẹki ẹtẹ aani, fụvọ ami ọnri fụvọ irenube ọiza, ³⁰ ene rezee ree dọ varama ụpẹ ẹchẹshi ini ẹshẹ ọnọni: ireshi, ẹnyara, ọnyi, ezi ọnri ẹtẹ, vabẹrẹ ụyọọri fụvọ ọdọwụ; shi ẹshẹ poro pooro anaa vẹ. ³¹ Ama azẹrụrụ ana yi ọvidi ọmẹyani, vee keke; ẹnẹne keke ọmẹyani, vaa dọ ọ ọvidi." ³² Ẹmẹ yini oze a shirẹ nọ Ijerusanẹmụ, di Ijesu tụọvidi aanini. Do shi eziafụ aani eyi, di ẹnẹna vatụra wa shiaangwa. Inaani, di Ijesu zẹ shi eziafụ aani ẹnẹwụrẹva tụoboka, dọ vẹrẹ a kaa yụ wa isẹnẹ vaa mẹ ọni ini ẹfi ene re zee ku: ³³ "Re nini, yaa shirẹ nọ Ijerusanẹmụ, izẹnẹ va yaa si Ozi Ọza chire arụfa obani nin ọnri ọyofi nin ụvọ. Ẹ vaa mishọji isu yọ, dẹ va si ọ chire Ijẹntaini nini ụvọ. ³⁴ Ẹ vaa mẹ isiya, ẹ vaa wọrọ atẹ ku o, ẹ vaa nya inori, dẹ va wu ọ. Ama inaama ẹkụshi ẹẹta, ọ vaa sha kwẹẹtẹ." ³⁵ Ijẹmsi ọnri Ijọọnu, ana vi ezi Izebede, de ve tu Ijesu, dẹ ka, "Ozuọzisa, yee si kụ wa mẹ isatụrisa ọnii re fisue aani yi yi." ³⁶ Dọ fọ wa ka, "Su wee si ki ma mẹ yụ wụ nin?" ³⁷ Dẹ ka, "Navọ di ya yatụ pe wu ini ụga awụ, ọzọnya ọ yini akụvọri awụ di ọzọfụva yini akụvọọfa awụ." ³⁸ Ama di Ijesu voshi, ka, "Wa zi yẹ isa ọnụ wee fisue nin. U we ve zuu fu fini ipa ụya onim ve yee fu? Navẹki ụ wa va zụụ siengwụdọ isami ana vaa mẹ yi mi nin?" ³⁹ Dẹ kaa yọ ka, "I va zụụ mẹ ẹ. "Di Ijesu ka, "Ipa ọnim vee fu finaani, u vee fu finaani nini. Isami ana vaa mẹ yi mi, avaa mẹ ẹ yụ wụ nini. ⁴⁰ Ama, aivi ẹmi ọ vaa ni ọza ana vaa yatụ tụ akụvọri ami navẹki akụvọfa ami; e teni ọ tẹtẹ yi ẹnẹna va si ọ yi da." ⁴¹ Ẹfi ẹni eziafụ aani ẹẹwụ anavọ wụ inọpati irẹyi ọnọni, dẹ vẹrẹ a mọiku shi Ijẹmsi ọnri Ijọọnu. ⁴² Di Ijesu va shi wa pẹngwụ, dọ ka, "Waa yẹ nin ki ẹnẹnee re vene ọdọvidi Ijẹntaini nin vanaa mirifuna yụ wa, di azẹbani aanini a mụmọ tụra wa irẹsu. ⁴³ Ama ọzi vọvaavi ini akaakana awụ nini. Ọzatụrọza ene ree si ki ọ naa nyi ụbani ini akaakana awụ nini va savọ vi ozida, ⁴⁴ di ọzatụrọza enee si ki ọnọ vi ọdọvidi ọ savo vi ọrishi aza bo. ⁴⁵ Fụvọki Ozi Ọza ọzi vẹ ki a va mozida yi ọni, ama ọ vẹ ki ọnọ mozida yi aza, di ọnọ si ẹshẹ awụọni tẹtẹ, doti a si ọ dudi yi azẹrụrụ." ⁴⁶ Ẹ zi ọ tu Ijẹriko. Ẹfi ọni Ijesu ọnri eziafụ aani bẹri azọkọni a varama fụrẹ Ijẹriko, Ibatimaosi oguri anaa pa isa, ana vi ozi Itimaosi, dọ yatụ tuni ụtọ oze. ⁴⁷ Ọ mẹ wụ ki Ijesu aani Inazarẹti ọnaa paraafu, do vẹrẹ e nowu ka, "Ijesu, Ozi Idevidi, nyi ayụva yi mi!" ⁴⁸ Di azẹrụru a tu oguri ọnọ ofuvọ ka ọ navọkụ. A maa kaa yọ ki ọ navọkụ, avọ ono mee nowu tụọ ka, "Ozi Idevidi, nyi ayụva yi mi!" ⁴⁹ Ijesu ọ zụfụdinẹ, dọ ka, a shi ọ yi ọni. Ẹ shi oguri ọnọ, dẹ ka, "Nyi ayọọvi! Kwẹẹtẹ! Ọọ shi wụ.' ⁵⁰ Ọ tụ auru ne ta, do ji kwẹẹte, do ve tu Ijesu. ⁵¹ Di Ijesu tuoshi ka, "Su wee si ki ma mẹ yụ wụ?" Di oguri ọnọ ka, "Irabayi, mee si ki maa si iri ami reẹtẹ." ⁵² Di Ijesu kaa yọ ka, "Waa na. Ọdọwụ awụ ọ fụ wụ ikụ sha da." Ụmụmọ dọ vẹrẹ dọ ku zụ e reẹtẹ, dọ vatụra Ijesu na ini oze.